因為EX 我成為左一個禿頭嘅毒撚 然後遇到一隻猫: 58. 早已碰面
「阿偉，黎緊四強嘅比賽，我想比個任務你，如果你做到，果場嘅正選就係你!」疑似隊長同教練係一次練習前捉左阿偉去一邊單獨傾左幾句。
「咩任務?」聽到有機會出場林志偉即係一臉興奮兩眼發光。
「我地黎緊嘅對手有一個好厲害嘅射手，基本上場場佢都係對方得分最高嘅球員，佢地嘅戰術好多都圍繞住佢做。黎緊場比賽，我想搵你專責涷結佢。」
「我? 真係將個咁重要嘅任務交比我?」長期坐冷板凳嘅林志偉唔敢相信。
「雖然你打籃球唔係打左好耐，但我地都見到你嘅努力，而且發現你係防守方面好有天份。你靈活敏捷，反應快又夠搏唔易認輸，身體機能好而且專注力亦好強，比你mark住其實都幾難纏，唯一不足係差少少經驗… 所以黎緊場波，我地諗住搵你去涷結對面個主力，然後我地其他人再負責佢地另外兩個主力。只要你mark得實佢，我地就有好大機會贏。 你有無信心?」隊長認真地講。
「有! 」人生第一次被交負重任，林志偉並無怕，相反仲好興奮。
「咁黎緊衣兩日我地會主力訓練你防守一個射手同埋點破對方pick，好彩我地隊都同樣有一個好勁嘅射手可以比你練習~」隊長續道。
「敏敏，講個好消息你聽呀! 」當晚林志偉一食完飯就急不及待打比阿敏。
敏:「咩好消息? 」
「今日隊長同我講，黎緊場比賽會派我打正選呀! 」林志偉好興奮咁講道。
「咁叻? 恭喜你呀!」聽到阿敏都好替林志偉開心。
「Yes~ 等我打抵埋佢地你就可以正式做我女朋友喇~」林志偉心入面好似已經諗到同阿敏步入左教堂咁笑到見牙唔見眼。
「車，等你贏左先算啦~ 不過難得有機會，你一定要好好把握比心機呀!」阿敏鼓勵道。
「知道! 但你可唔可以黎睇我比賽?」林志偉問。
「可以~」阿敏當然唔會拒絕。
到左比賽當日，林志偉果然成為左正選。而佢為左表示決心，仲剪左個陸軍裝嘅頭添。
「阿偉，對方15號就係你嘅目標，只要衣場你唔比佢拎超過6分，我好有信心贏嘅就係我地，做唔做到?」隊長搭住林志偉膊頭講。
「無問題!」林志偉望一望對方嘅15號，又望一望看台上正同樣望住佢嘅阿敏，然後充滿自信同殺氣咁講。
「竟然係咁? 原來林志偉係佢…」天上嘅我忍唔住講。
因為佢地口中嘅15號就係我，原來林志偉就係當年學屆四強專門負責湅結我果個對手。原本都有少少面熟，直至見佢剪左個陸軍裝我就即刻認得出係佢。
「呵呵呵，衣個世界有時真係好細架咋~」貓仙人笑住講。
「當年佢都真係比左唔少苦頭我嘅…」諗返起當日情況，我都不得不承認對方嘅難纏確實比左唔少苦頭我。
首次正選就獲派重任，加上有阿敏黎幫佢打氣，林志偉士氣當然十分高漲，搏晒老命完全唔吝嗇自己體力仲對我充滿住殺氣，唔知我地比緊賽可能有人會以為我殺左佢全家添。所以衣場波我都真係打得好辛苦，基本上要拎到波都唔係一件易事，因為佢除左mark我其他野就真係乜都唔做，進攻都只係負責傳下波駁下腳。
不過始終佢經驗尚淺，所以間中我都仲可以偷到雞入到波，但同之前幾場就真係差好遠。最重要係佢進步得好快，基本上同一招第二次用就已經失去左功效，有兩次我仲直程比佢拍走左我射出去嘅波添… 無錯，我比佢guard臭左兩次。學神宗一郎話齋，明明以為已經擺脫左佢，但到出手一刻佢又突然再次出現係面前，真係唔想再諗起當時嘅畫面…
好彩我果隊仲有阿希同技安，所以兩隊都仍然勢均力敵，直至最後阿希抽筋離場，然後林志偉果隊終於反超前我地，比賽去到最後一個攻勢。
「對方9號已經離左場，所以進攻重任應該一係係中峰5號，一係就個射手15號。阿偉你今日守得好好呀，真係做到只係比佢入到6分，只要守埋衣球我地就贏喇! 加油呀鎮南!」隊長把握最後一次暫停講道。
衣個時候，林志偉仍然保持高度集中，入晒狀態。佢知只要守埋衣球，佢嘅任務就完結球隊可以殺入決賽。雖然已經好累，但只要佢望一望看台上嘅阿敏，佢就覺得自己有返力量。仲有最後十秒，對方嘅板斧佢已經心中有數，佢有信心佢可以KO對方嘅15號，即係我。
其實林志偉最後會輸，好可能係因為佢太心熊，由或者對自己太有自信，睇低左我睇低左籃球衣項活動。當佢自以為已經睇通晒我所有技倆，又想好型咁以一個block shot作為終結去迎接阿敏，結果最後就反而因為咁比我嘅假動作呃左，起跳想block我球射波，而我就順勢帶波過左佢，再以一球騎射終結左衣場比賽。
結果就係因為衣個失誤，佢地四強止步，而我最後亦拎左8分，林志偉做唔到隊長比佢嘅任務，所以好自責覺得係自己嘅責任。一方面佢好內疚，一方面佢亦為做唔到阿敏男朋友而好失望。
「對唔住呀隊長，做唔到你要求累大家輸左場比賽…」
「傻啦，你令佢拎到只係8分其實已經超額完成，坦白講我無諗過你真係差d做到… 所以唔好自責，輸係成隊嘅責任，而你已經做得好好~」隊長拍一拍林志偉安慰佢。
「但係…」林志偉仲未釋懷。
「而且你仲有下年嘛~ 好好記住衣種輸嘅感覺，然後努力下年贏返!」隊長再講。
「知道…」
醫院波後阿敏就走左過黎安慰林志偉。
「唔緊要啦，我未見過咁努力嘅你，你已經打得好好架喇…」
「打得好就唔會輸啦… 不過我一定會報仇! 敏，你可唔可以等多我一年?」林志偉好有火咁講。
「好~ 不過一年架咋，下年再輸我就同第二個男仔一齊~」本身其實如果林志偉再問，阿敏係會答應，因為佢已經見到自己想見嘅野。見林志偉咁搏命又真係鍾意籃球，佢嘅目的已經完成。不過見林志偉自己咁講，佢都唔介意利用自己再推佢一把，睇下佢下年有咩成績。反正佢都唔急要同對方一齊。
之後一年，林志偉差唔多日日都打籃球，然後終於係一年後佢中三果年，幫學校拎左學屆冠軍，然後阿敏亦守承諾同林志偉一齊左。因為為目標全力拼搏嘅林志偉真係好charm，加上勤做運動令佢變成高大靚仔又fit嘅一個型男，所以本已經芳心暗許嘅佢自然更欣賞同鍾意對方。
「佢地個故事同我都有少少似喎…」見佢地兩個隻手終於拖埋一齊，天上嘅我又忍唔住講。
「中學d戀愛故事，黎黎去去都係大同小異架啦…」貓仙人木無表情咁講。
「不過我無諗過原來我同阿敏係中學果陣就已經見過對方…」我又有d感觸咁講。
貓仙人:「人地果陣已經係校花黎架喇，不過你果陣個心淨係得你個初戀，邊會留意到其他人呀~」
「咁照計佢地應該都幾好呀，林志偉又唔似花心果d人，點解之後阿敏會變成咁?」我想像唔到原因。
「只可以話上天總係鍾意作弄人啦，無風無浪佢地會覺得悶…而同一時間正如你地所講，變幻原本就是永恆。」貓仙人少有感觸咁講。