《屍河明居鑽石山》（是咁的，我發現打喪屍有得升呢）: 203

003

喪屍會殘留死前一啲強烈記憶，作為本能行動嘅依據。

佢一路望住我一路爬過嚟，好似喺度質問我，頭先點解唔救佢……而且佢嘅動靜，已經引起咗附近一、兩條喪屍嘅注意。

我驚到即刻縮返埋喺窗簾後面！

我唔知佢識唔識得上樓搵我，抑或會直接爬牆上嚟，呢度只係三樓……我咬住牙咁伸手出去，關好哂屋企啲窗，希望可以阻截到啲氣味！





「嗄！嗄！癡那線！」

唔好再留離喺窗邊！

我要知道到底發生咗咩事！

我返入房，見手機已經充咗三成電，即刻拎返嚟睇……

爆哂WhatsApp。





未接來電都有好幾個。因為我長年較震機（我聽域好窄，九成時間聽唔到鈴聲，試過成個班房啲人睥住我，我係最後一個聽到電話響……從此嬲得滯長設靜音），而我斷片時又一直拎住部機，所以隔離房嘅沈莎倫呢兩日都聽唔到吧？

我第一時間，睇咗麥包同埋莎倫俾過我嘅WhatsApp先。

星期二凌晨三點幾：

莎倫：『朗天你喺邊？麥包受咗傷，唔知係咪俾野狗咬親！急症室爆哂線，Uber都Call唔到！你可唔可以Call架的士過嚟，接佢落去睇醫生！』

呢個時段，莎倫打咗六、七次電話俾我……諷刺嘅係，當時我就喺自己房斷緊片，同佢哋只係一門之隔。





清晨五點幾：

麥包：『朗天，唔好返嚟！』

我相信當時麥包已經知道自己咩事。

我收到麥包最後嘅WhatsApp係：

『對唔住，朗天。』

之後莎倫匿埋喺自己房，有俾WhatsApp我亦有Call我，啲Message主要係問我出面咩事，睇唔睇到新聞之類……

佢Share咗好多突發新聞嘅Link俾我……

———————————————





雖然我話自己冇咩朋友，但係我有做小小網上生意，幫人代Bid日本限量動漫或偶像嘢等，同好多客有往來，雖然都係傾吓收錢啊交貨啊之類，但我亦有加入一啲討論日本嘢嘅群組，有時會吹吓水交換吓新品情報咁。

因此，除咗莎倫，我亦收到好多人訊息，好多轉貼嘅新聞Link。

可惜嘅係，全部都點唔到入去！

死網！

我手機仲收到Wi-Fi訊號，但連唔到上網。固網寬顏同埋流動網絡都死哂。

因此我只能睇到啲Link嘅標題同前兩句：

『青山走犯？癲佬於咬市追人嚟咬，4死2傷，1警危。』





『救護車衝落天橋，懷疑傷者失常掙扎，救護員棄車……』

『旺角多處出事！政府緊急呼籲民眾，切勿前往該區。』

『搶米！』

『屍港事件已成國際頭條，世衛召開緊急會議……』

『多國緊急撤僑，唯機場已受感染。機場跑道因墜機大火，多班航班於火海中繼續亡命起飛……』

『聯合國決議鎖港棄港？大批民眾不理危險，上街請願……』

最新收到嘅訊息係星期三下午，嗰時已話全港九成通訊系統死機……

我再次確認一下而家時間：





星期四。

從星期二晚旺角出事，到而家只係過咗兩日……

鎖港？

「無可能！SARS都無可能傳得咁快！」我撓哂頭都諗唔明，「究竟而家全香港有幾多喪屍？」

點解可以傳到入哂屋！

我收到嘅大部份Message，都係問緊差唔多嘅問題。

至於香港出事，點解咁快全世界都知，呢個我冇懷疑，因為社交網絡發達，人人都係直播主；而國際快速放棄咗我哋……





我諗係因為我哋有過太多前科！

如果我仲上到網，估計將會睇到，FB啊IG之類，鋪天遍地都係『香港末日』……

正當我開電腦再試吓上網時，突然諗起一樣嘢……

我成身震哂！

我老豆老母呢？

我打開通訊錄，WhatsApp等等，將我父母嘅號碼解除封鎖……我向來同屋企人關係好差，有次仲喺做節時吵大鑊，我推跌咗我老母，結果成家人扔哂嘢叫我躝出屋企……我由嗰時起就Block鳩哂佢哋。

四個月啦。

解哂Block之後，等咗一陣，一片靜默。無Message。

唔知係佢哋已經當冇咗呢個仔，定係Server網絡全部死哂，有Send過Message都Load唔返落嚟。

我好頹咁嘆咗口氣。

我老豆老母住沙田，如果手機聯絡唔到，我唔知可以做到啲咩……

然後我又諗起另一個對我重要嘅人。

「阿詠呢？」