017




自從嗰一晚,我哋正樓上個單位,就冇停過喪屍叫。

佢哋會唔會爬落嚟?

尤其係沖涼時,因為莎倫堅持要開電熱水爐,啲蒸氣透出去時,好明顯聽到樓上啲喪屍都被引哂過嚟廁所位。





但係莎倫唔可以唔沖涼。

仲一沖就沖個幾鐘,沖到啲水凍哂都繼續沖,梘液反反覆覆咁搽好幾次……仲喺度自慰。

係,佢開始日夜喺度自慰。

沖涼以外,就係喺個女仔間房。佢話佢冇辦法喺清醒時聽住樓上啲屍叫聲。

做完攰,就可以瞓得著,咁亦令佢每日瞓著嘅時間,超過十六個鐘。





最初仲會遮遮掩掩,唔發出聲音,到後來連房門都只係半掩,甚至我喺廚房煲飯時,佢都可以喺廳做……

而由於替換嘅而經著哂,莎倫甚至唔著內褲,平日就咁著住件透透哋嘅睡衣出嚟食飯……

佢明顯係特登,睇吓我幾時忍唔住。

你問我冇動搖過咩?

一定有。





但係與此同時,佢越咁樣做,只會令我越堅定:一係最初就咩都唔諗搞咗佢,之前扮哂聖人唔搞,後來又搞返,咁算點?做人最衰仔就係反口覆舌,我過唔到自己嗰關!

再講,我亦好驚當我轉軚話想搞時,會被莎倫報復性拒絕:

『而家唔使你啦,同我死開啦!』

「嗯……啊……」

呻吟出聲,就可以遮蓋樓上嘅屍叫聲。

我冇睇過有喪屍劇做出過類似劇情……原來設身處地,人嘅性欲係會被焦慮激發。

咁我有冇打飛機?





冇。

因為我一打,佢一定會知。

我唔想俾佢笑:青頭仔唔敢仆嘢,剩係識匿埋喺度Chok。

……

而除咗自慰,莎倫就喺度不斷咁食嘢。

焦慮暴食症。

咁其實我自己都有呢個傾向,有時就算唔肚餓,都好想咩都塞入口塞滿個胃佢,咁樣好似個心係會定啲。

但係莎倫嘅嚴重程度係我嘅好幾倍。





佢完全冇自制能力。

我已經返過本來屋企,將啲糧食全部運返過嚟。本來預計可以頂到兩個禮拜嘅乾糧零食,三日食哂。

而當冇嘢食而又捽碟捽到痛時,莎倫只有踎喺梳化上面咬手指。

咬到出哂血……

我好心痛,因為莎倫對手出名好靚,之前仲做過手Model……

咁我只能儘可能煲嘢俾佢食,因為佢唔識調味,自己焗過一次雜菜粥好難食,只有繼續倚賴我……

一拎啲嘢食出嚟,佢係唔會客氣咁搏命食,咁我亦唔可能唔食嘢,只好同佢鬥快……屯糧因此快速消耗。





咁落去唔挨得好耐。

「我要出去搵吓,有冇其他空屋有嘢食剩低。」

鎖住門嘅,我冇能力爆入去,唯有撞手神睇吓呢一層或者樓上樓下,有冇類似打開度門,裏面又冇人嘅空屋。

我反而唔係太想遇到倖存者,畢竟件事發生得咁突然,大家都唔會有咩存糧。

我儘量唔諗人性喺面對末日時嘅醜惡。

莎倫掹住我唔俾我走,佢好驚剩低自己一個人……

「我、我同你一齊去……」

「轉角位就有一隻喺度遊遊吓,你同我講笑?」





我保護唔到你啊!

「我只係喺呢層巡吓,最多上落一層樓,擸夠嘢食即刻返嚟!好冇?乖!留喺度等我……」

「可唔可以幫我睇吓有冇替換衣物……」

佢講緊底衫褲吧?

洗衣機咁撚嘈,連莎倫都唔夠膽開。

「好,幫你留意吓。」

「同埋衛生巾……我喺個女仔房搵唔到。」

「……好。」

——————————————

冇錯,我打算闖過嗰個轉角,呢條係走出去嘅必經之路。

轉角後面就係後樓梯,甚至可以上落到其他層數……但呢個只係Plan B。

Plan A係,我要搞掂轉角後面嗰條屍,然後希望另一邊走廊嗰八家人裏面,至少有一家係開住門嘅。

「聽住,莎倫,陣間無論發生咩事,只要我唔係完完整整咁返嚟,你都絕對唔好開門!」

莎倫不住點頭。

開門放麥包入屋,呢件事佢冇可能唔記得。

呢日係第六日正午。

我唔需要莎倫隨時開門接返我入去,因為如果我搞唔掂,最好就係死喺出面。

確認莎倫喺入面反鎖哂大門同鐵閘,拎住一個平底鑊嘅我,

一步一步咁,

行向嗰個轉角。
已有 0 人追稿