《屍河明居鑽石山》（是咁的，我發現打喪屍有得升呢）: 405

005

我食哂啲紅蘿蔔同牛油……然後我諗到樣嘢，掉轉頭喺啲廚櫃度係咁摷。

「搵到啦！」

魚．肝．油！

老人院最多就係呢啲乜鳩營養補充品。





因為我頭先望住舊生豬膶，好想就咁生食咗佢，而個字幕亦強烈建議我咁做……因為肝臟含有極豐富維他命A。

但我過唔到自己嗰關。

而家可以食魚肝油！

老人院有就咁飲嘅魚肝油，亦有魚肝油丸（Kawai哩！），就咁飲嘅出面好少見，可能有啲老人老到唔識吞嘢啩？

我成枝魚肝油隊哂……個口感傑到飛起。





枝嘢果然係補藥嚟，我飲完睇嘢即時清楚咗（當然係由於我消化能力升咗兩次呢，加上有『字幕』喺後面做嘢），或者裏面仲有其他營養素，我身上啲傷勢好得好快，體力亦源源不絕出翻嚟。

甩過骹隻膊頭亦消咗腫，唔再痛，而且我感到又好力咗一級！

同上次唔同，醫好傷勢後，冇咩疲勞感。

可能我頭先喺騎樓斷咗片時，系統已經幫我釋放消除咗疲勞。

老人院好多魚肝油存貨，剩係我開呢個櫃就有成六、七枝。





「我飲咗一支，而家《夜之眼》進度係？」

（0。）

「我屌你牙！又話可以食嘢食到生隻眼出嚟？」

（合成夜之眼所需點素，已由共需收穫10枚，下降至只需收穫9.8枚。）

即係話一定要用喪屍材料，先至合成到《夜之眼》，但吸收維他命A可以降低升呢門檻……

但係我飲成枝魚肝油，又食蘿蔔又食牛油，只係取代到0.2隻夜之眼收穫？

好唔抵喎！

但係我諗，我應該唔會再返嚟，有得飲就飲哂佢先。





我一口氣飲咗三枝魚肝油，又係飲到想嘔再飲唔落去嗰隻……

門檻由9.8輕微下降到9.5。

效率超低。

我有諗過好唔好帶兩枝上路，但可能我跌兩次喺地就爛哂……魚肝油丸都係同樣，帶唔走。

我見煲好水，直接沖落罐加營素度，先倒一半落個湯碗，再斟凍滾水落個罐度溝稀佢。

隊！

我而家嘅食慾係俾營養主導，否則嘅話，我冇可能飲得落呢啲嘢。





兜嘢好杰，杰過糊仔，我係每啖要𡁻兩吓先吞到落去嗰種……

我只係飲得落大半罐，個胃已經漲哂。

字幕顯示，我需要嘅各種微量養份啊，礦物質維他命之類，已經補充到爆瀉！

即係話，我好健康（好似係？）！

廚房有塊鏡，我照一照，黑眼圈已經冇咗，塊面多返啲肉，我諗我至少補返5磅體重，只比正常輕咗幾磅。

輕咗嘅可能都係脂肪。

而我生返出嚟嘅應該有幾多係肌肉，一來劇烈運動刺激肌肉生長，二來，加營素都有好豐富蛋白質，係生長肌肉嘅主要營養素。

我仲揦返褲袋拃花生出嚟剝埋佢，不過大半已經責爛咗……照食。





大致上補充返到八成以上嘅健康狀態！

而且體能應該有提升，尤其疑似斷過中指嘅一邊手掌，握力強咗好多。

「係喎！仲有生果未食。」

雪櫃有特別一格保鮮櫃，分開只放生果，我都未得閒打開嚟睇……不過就咁睇落，好似擺咗個椰子喺入面？

我一打開……

Yrrrrrrrrrrrrrra！

我嚇到一下彈開，個背脊大大聲咁撞到個櫃！





「邊、邊個擺個人頭落個生果格度！」

係一個屍變咗嘅人頭，係另一個阿姐嚟！

而且個頭仲識郁，個嘴咬吓咬吓咁……但係郁得好慢，應該係低溫降低咗佢活性。

好似送個頭俾我咁。

我短暫開咗陣SAM狀態，拎起個頭掉落鋅盤，再攞起個砧版壓落去，壓爆咗之後先伸隻手落去撈眼，盡量迴避嘔心畫面……

咁已經係留低最少心理陰影嘅方法。

當知道做完嘔心嘢過後要承受後果，我有少少後怕，非必要時唔係太敢做。

總算攞返一隻《夜之眼》。

用嚟做《暴走者》儲備嘅（頭先大斷片同HPA時，亦已將個暴走者冷卻時間歸返零）。

我正想去返阿伯個床位，補食啲甜嘢……

『嗚……想我跌落去……冇撚咁易……』

騎樓外面有聲。

我伸個樓出去一望，見到頭先嗰條廢老，竟然仲單手扶住個騎樓，冇跌到落去！