012




暴走者!

我拎起支棒球棍,用盡全力扳落消防員一邊膊頭!

佢隻差啲要車落我塊面的手掌,即時冇力垂低!咁佢另一條手臂已經冇咗,即係話我已經廢咗佢雙臂!





但係佢對腳先係硬嘢!

佢對消防靴又厚又硬,連鋼閘都踢到飛起,呢個時候又一腳想印埋嚟!

我撲過去抱住佢膝頭哥!

「啊啊啊啊啊……」

然後將佢推返入條後樓梯!





我直將佢重重推跌落條樓梯度,然後雙腳跳起踩爆佢個肺!

Puuuuuuuuul!

佢唔知嘔咗幾多嘢出嚟,噴哂落我塊面度!

我眼都唔眨,對住佢個頭,雙手揸實哂支棍,一下扑落去!

碰!





好似爆西瓜咁濺開哂!

呢個消防員嘅屍身狀態差過裘錦龍好多,相對冇咁實淨,算係好對付。

我隨便喺地下一撈,執返0.2隻夜之眼都好,暴走者竟然仲剩低兩秒,我趁機標返出街,踎低執返起度爛鐵閘!

我一揪起度閘,即時兩、三隻踩緊喺上面嘅喪屍,飛哂出馬路!

我拎住個鐵閘,好似玩鏈球咁轉咗一圈,甩開兩邊街口街過嚟嘅喪屍,然後就衝返入後樓梯,棟返起度閘!

當然度閘已經彎哂,我係隨便卡喺度,再拎起保安啲櫈吓雜物等塞住!

冇錯,我而家唯一生路,只有走上幢唐樓!





借道樓上啲走廊,再諗點樣爬過隔離樓,搵辦法繞過個街壘,去到聖母醫院!

Yrrrrrrrrrr!

一時間街外喪屍搶食,彼此競爭,反而卡住咗喺度爛閘前,似乎可以頂到一分半分鐘……

暴走者完結。

我隨手喺保安個位拎起條毛巾,捏埋一舊敷喺額頭額角啲位……

好快就吸滿哂血水。

我用條毛巾包住支筆,成舊掉出街口!

霎時引開咗唔少喪屍,有啲仲喺樓上撲落嚟……咁樣令度爛閘一時承受冇咁大壓力。





呢個時候,我先燃燒點素,幫傷口止血。

「大鑊……腫起得好大舊。」

主要出血位喺眼角,而家出現發炎保護,逼到我左邊眼皮最多開到一半……我左邊視野至少冇咗30度角。

但止咗血就好,否則條路根本行唔到落去。

我正想𨈇過消防員條屍上樓,但及時瞄到佢條腰仲掛咗啲裝備,至少有部份仲喺度……

「啊啊啊啊啊啊啊……」

我拎住個小型滅火筒,噴住化學噴霧咁衝上樓!





因為我一上條後樓梯,啲屍叫聲就多到好似紅館演唱會咁!仲多過我喺屋企落嚟嗰時!

我諗唔明點解會有咁多喪屍出到嚟!

但我已經封死咗走返出街條路,我只能夠上樓!我噴到一條想迎面仆落嚟嘅喪屍懵懵哋,然後用棒球棍閘佢條頸,將佢壓埋牆!

係個我估有八十歲嘅廢老嚟,本來就已經爛哂。

我用隻韌帶重建過嘅手踭嚟批佢!一批兩批三批!加埋佢後腦撼牆嘅衝擊,個頭已經爆哂!

攞眼!

照辦煮碗,沿路搞掂咗三隻,咁啱都係啲廢老。

總算上到一樓,一望過條走廊,不期然就屌咗出嚟。





我喺沙田大,出世就住所謂嘅新型大廈,又冇咩朋友,所以我冇上過呢啲舊唐樓,完全唔知道係點。

我見到成條一樓走廊,都係俾我嚇醒嘅喪屍。

因為啲單位嘅門口,幾乎九成都係開住嘅。

有啲單位用嚟做樓上鋪,咩中醫啊美容鋪啊X氏宗親會咁,呢啲單位全部用推門,唔會上鎖。

而啲廢老屋,因為而家係夏天,好多人平日都開哂門,甚至日頭係鐵閘都開埋,踎喺門口抖涼。

因為我上到嚟時,見到好多待機喪屍,正係坐返喺佢哋自己門口啲櫈仔度!

喪屍會留存住一啲生前嘅習慣性動作記憶。

所以唔似龍蟠苑,或者仲會有幾多倖存者喺度挨緊。

呢啲黃大仙唐樓,可能已經淪陷哂!

想要穿過呢條走廊,根本唔可能!

我只能夠狂噴滅火筒,繼續往上衝!但係動靜已經生起,樓上越來越多喪屍都集中過嚟樓梯度,仲開始有啲廢老喺唔知幾樓跌落嚟!

有個可能有九十幾歲嘅阿婆,一嘢責咗落我背脊度!

我反射性一個摀身,將佢拋去樓梯中圈,佢直跌落地下無哂聲。但係咁,佢已經喺我後頸留低咗四條血痕。

有啲阿婆鍾意留好長指甲。

我一路殺上條樓梯,沿路撲落嚟嘅全部都係廢老!人口老化程度好高……但總好過見親都大隻佬消防員!

「好彩呢幢樓冇人開健身房!唔係就大鑊!」

我經過二樓、三樓、四樓……情況只有越嚟越差!主要係被驚醒活化的喪屍越嚟越多!想要借走廊諗辦法爬過隔離樓係冇可能……

「唯有上天台!」

但係嚟到五樓……條樓梯已經俾喪屍塞到實哂。

係塞到跌唔到落嚟嗰隻!

我甚至冇信心,開住暴走者可以成功衝到過去……一被截停就會被淹沒!

我福至心靈。

我將支滅火筒塞落堆喪屍度。

然後喺後褲袋抽出一把手斧……喺條消防員身上擸返嚟。

開埋暴走者!

一斧頭斬落支滅火筒度!
已有 0 人追稿