《屍河明居鑽石山》（是咁的，我發現打喪屍有得升呢）: 506

506




當我回過神嚟嘅時候，我已經入咗聖母醫院嘅範圍。

我而家喺後花園入面。

我平日約阿詠中午食飯盒嘅地方。





喺我面前，有三條喪屍企咗喺度，不過好奇怪，佢哋全部戴住防毒面具，而且著住啲醫生袍或者護士服，以屍體嚟講算係相當乾淨，又冇咩爛。

其中兩個，拎住支竹竿，竿頭仲綁住開山刀，刀尖向住我。

中間嗰個，仲拎住把……霰彈槍？

我發覺自己五感都開始模糊，只係隱約睇到佢哋三個都舉住塊透明防暴盾……而且佢哋睇起嚟極度緊張，我一想郁動，就對我大喊大叫。

「講嘢啊！嗌出聲啊！」





佢哋好似不斷咁對我講：「再唔出聲我就開槍！」

我唔知勾起咗邊條反射神經。

我笑咗笑，同佢講：

「我應該……仲係人嚟。」

對方都應該係人嚟……





然後我視野就快速跌落地面。

———————————————

今次同上次喺老人院時唔同：

我並未完全『斷片』，仲保持住小小意識。

我好似隱約聽到，有啲聲音喺度討論緊應該點樣處理我呢個Case，但係我唔記得實際佢哋講咩，只係聽到一啲關鍵字時，會特別觸動神經而令我驟然一醒。

例如『感染率』、『隔離』、『深切治療』、『反噬處理』之類……

我伸手拉住其中一個人嘅衫袖，全場突然靜哂，甚至我仲聽到有人拎起武器的鋥鏘聲。





我清咗清喉嚨啲濃痰，問佢：

「阿詠……有冇事？」

「點會冇事！」

有人忍唔住就鬧咗出嚟：「Carlos施條癲佬，竟然變態到呢個地步！真係想像唔到！」

「唔好講其他嘢騷擾佢住！」

另一個人低頭望住我雙眼，同我講：「好多謝你救返詠……阿詠！唔使擔心，佢仲喺度。」

『仲喺度』嘅意思，除咗生還，亦代表咗佢『冇屍變到』。

喺而家咁嘅環境，呢個就係唯一值得慶幸嘅消息。





「只不過阿詠而家休息緊，情況雖然會有少少危險，但我哋會控制住……」

「而家輪到你個Case。」

然後佢用戴住外科手套嘅手指，撐開我眼皮，再用一支光線有啲奇怪嘅電筒，照我瞳孔。

「Serial No.024，你係最後一個喺我哋醫院領到呢副Con嘅實驗體，程朗天先生。」

「係阿詠介紹嚟嗰個。」

「唔怪得會咁落力救阿詠，原來係識得！真係好彩……」

「我哋遲啲先自我介紹返，」





照我眼嗰個男人話：「我哋唔知你係由邊度開始走過嚟，但剩係睇住你點樣橫渡條屍河，甚至用屍身鋪出一條路嚟越過我哋醫院嘅路障，仲識得過後拆返，喺你咁嘅傷勢同埋預計感染率之下可以做到呢啲事，我哋非常震驚！」

「因此我哋有理由相信，你透支咗遠超過自己基本能力嘅技能，而家有嚴重生命危險。」

「所以我哋甚至都未敢幫你噴水柱做清潔，怕你心臟承受唔住。」

「要為你逐步清理外部感染，同時要慢慢中和你透支後嘅反噬效應。你放心，呢度仲係安全，你即管放鬆心情喺度抖吓……」

「反正而家呢個時勢，應該冇咩可以急……」

就係呢句說話刺激到我。

「你哋唔使旨意……幫我打麻醉針！」

我一手拍甩佢手上支針筒！





我拉住佢領口，將佢成個人扯到幾乎同我鼻貼鼻：「我有嘢要趕住做，喺度攞完嘢就要返番去！」