E02

「廢老!」

我將裘錦龍隻手揪返出嚟時,震哂手咁將勾咗出嚟嘅腸臟解開,再塞返入廢老個肚度……

費老雖然雙唇蒼白,但好似冇事發生咁。

一直盡力渣穩部車!





貨車轉出最後一道右彎,嚟到星河明居同龍蟠苑之間條『龍蟠街』。龍蟠苑個迴旋處已炒哂車轉唔到入去。

條屍河仲一直追緊嚟!

「我、我喺度停車俾你……你要自己行入去。」費老已經連眼都張唔開。

「唔得!」

留得費老喺度,佢唔會再開車,唔使幾秒就會俾屍河淹沒……





「同我轉入前面荷里活廣場!」

荷里活地下有個寬敝啲嘅中庭位,嗰度雖然未至於安全,但至少可以避過最猛烈嗰浸『洪峰』。

費老已進入彌留,最後幾乎係我幫佢扭軚嘅!

部貨車就咁撞咗落商場扶手電梯邊……

「費老!唔好閤眼啊!」





我係咁扯返醒佢,而喺我哋身後,屍河已汹湧流過成條龍蟠街,一直沖出龍翔道……

「聽住!我係有信心救得返莎倫,先至走回程呢一趟嘅!」

「我、我有好幾副隱形眼鏡,仲有聖母嘅血清!你、你等等……」

佢噤住我隻手。

「唔好喺啲廢老身上嘥心機……」

佢指住自己個肚,「唔講喪唔喪屍,剩係呢啲傷都冇得救㗎啦……」

「留住啲物資……去救咗自己條女先,俾我……都會咁做。」

「莎倫……呢個名好熟……」





費老最後笑咗笑,「係喎,當年我同老婆係有打算生小朋友,仲已經改埋名……如果係……女,就叫莎倫……」

「去救……莎倫……」

「唔得!」

我係咁搖費老:「你只係想我掉低你,令我覺得救莎倫係為咗完成你心願啫!」

「唔准閤埋眼啊!」

「如果連你都救唔到,我救得到莎倫嗎?」

我啲眼淚水已經滴濕哂佢件衫……








E03

……我終於返到嚟。

由於我哋住嗰層樓,之後已經俾我清場過一次,所以我返到嚟時,雖然仲係夜晚,但狀況大致平靜,只係偶爾仲聽到啲遙遠嘅屍叫聲。

如果唔係聞到屍臭,差啲以為呢場屍疫,只係一場幻想。

喺我前面,就係我呢一行嘅起點……我將耳仔貼落度大門上,聽咗一陣。

然後,我用約好嘅暗號敲門。





再敲。

並無回應……

咁我只好用《碎骨者》,儘可能唔發出聲音咁,將個門鎖整爆。

我慢慢推開道大門入去。

記得臨走時,莎倫係瞓喺客廳張梳化度,而家呢張梳化,漸漸影入我眼簾……

梳化上面冇人。

我走到梳化前面,除咗大量沾有綠色鼻水嘅紙巾,未見到有其他痕跡……

屋企只有睡房關咗門。





莎倫之前講過嘅嘢,喺腦海迴響:

『朗天!朗天……你聽我講。我應該仲挨到半日,煮多一次飯俾我食,然後……將我鎖埋喺房,或者鎖返喺我哋本來間屋。』

眼淚已經喺我眼眶泛起。

我走近到門前,試吓個把手……

道門係從裏面反鎖咗嘅。

我跪咗喺道門前……我隱約聽到,好輕微好輕微,用指甲刮緊度門嘅聲音。

「莎倫,」

我勉力維持住正常語氣,同裏面嘅人講,「係我啊!對唔住啊遲咗少少返嚟,你係咪好肚餓啊?」

「我而家就煮飯俾你食……」

「我煮好咗……就叫你出嚟食吖……莎倫……莎倫啊!莎倫……」

……

……

……

……

……

(奇蹟成立。)

喺我俾眼淚遮住哂嘅視野裏面,睇到一線曙光……

原來,已經日出了。

我對住呢一線曙光,綻起一抹從心而發嘅微笑。

(孤城英雄.Chapter 1.End。)




《屍河明居鑽石山》全文完。




後話:

全文17萬字有多,但其實係我近年作品裏面字數最少嘅……不過既然睇得到尾,即係應該唔嫌字數太多,希望大家過足癮啦!

我覺得一個故,係要留低啲餘韻,個結尾先好睇,因此我亦留低咗足夠暗示各人最終結局嘅線索,未有畫公仔畫出腸就完咗個故事。

如果覺得IG追文唔方便,或想順序重溫,我亦已將成個故放咗喺《紙言》同《Penana》兩個地方,我IG Followers太少貼唔到Link(煩請大家幫我多多宣傳),請Google『屍河明居鑽石山,紙言』或『屍河明居鑽石山,Penana』就會搵到。

對阿暖其他作品有興趣,都可以喺紙言或Penana搵到,我個人比較滿意嘅作品有《黃泉逆仙錄》同埋《重煉傳說》,不過兩篇都係用書面語寫。

我鍾意喺網上全文免費發表,希望有心想支持嘅人先自發支持。

如果你真係好鍾意呢個故,亦唔介意支持吓我繼續免費出故呢個咁傻仔嘅行為,可以透過Penana「打賞」或「訂閱」,少少哋一個月幾十蚊咁贊助吓,當請我飲杯咖啡。又或者你可以去我官網「warmisland.com」訂閱VIP,不過通常係《重煉》讀者先會買嗰邊。

最後講續集。

我唔知會唔會有第二季,只係知道我最少會休息到八月。因為我要籌備「暖島出版」喺今年書展嘅擺檔。暫時冇計劃《喪屍》出書。如果有第二季,我都諗緊會係繼續將程朗天呢邊條線講落去,定喺同一個世界裏面用新主角再開單元。但如果用新主角,第二季肯定會見得返第一季啲角色,可以知道佢哋後來係點,甚至新主角會同程朗天合作,或者為敵。

感謝各位支持!一有作品最新消息,將會繼續喺IG發表!遲啲見!

阿暖

阿暖IG:@warmislandpublishing  ;  或在Facebook搜尋有「阿暖」專頁。
已有 0 人追稿