好人卡太多 所以愛神憐憫我?: 4.4

今日食完lunch之後，我就照慣例買左包檸茶比佢。
我依然寫左張memo紙比佢：「加油！今日照舊…」
 
如果依個日子可以一直維持落去，
大家keep住依份情誼又幾好呢…
 
「呀明依排你就爽啦，成日見你係度甜笑。」坐我隔離既tommy講
 
「下有咩，兄弟你有所不知啦…」真甜同真甜差好遠嫁…
 


「咩有所不知？」
 
「冇…依排我教呀蚊踩單車，不過佢學極都唔係好識姐…」我差d講漏嘴
 
「踩單車有幾難，你地兩個更加冇問題啦…」
 
「點解？」我問
 
「最好你就同佢有d身體接觸，比較易去控制同調整佢既姿勢，教起上黎都方便d啦係咪先。」
 


「身體接觸？」
 
「唉到時你明嫁啦…到時唔好得把口去講同做示範，要真真正正落場教。」
 
哇…肥仔你教人的確有一手…
 
……
 
「哈囉！」
今次我遲過呀蚊到


雖然其實依家先17:50…
不過早d到點都可以比個好d既印象人既…
 
「Hello，行啦！今晚一定教識你！」
事後諗番起，我依句野怪怪地…
 
呀蚊同琴日著得差唔多，
只係琴日件白短t變左件背心t，
更加令人想望多幾眼佢白滑既肌膚…
不過我依家先留意到原來佢對腳幾有肉地，
但又唔係肥嗰種，
咁當然又唔係成條柴嗰種啦…
 
「你今次係咪一定教得識我嫁…聽日就係班會活動啦喎…」呀蚊有d沮喪
 


「放心啦！一定得既！」其實琴日都學識得七七八八，係差邊踩車邊平衡
 
「嗱！記住！當你隻腳向後『young』有d衝力既時候你就可以開始踩，唔洗太急，但如果太慢都唔得嫁！」
 
「即係點呀…」呀蚊用佢水汪汪既眼睛望實我
 
可能Tommy講得岩…有身體接觸係在所難免…
 
「嗱！即係咁…」我用手調整佢既坐姿，佢握住個handrail既力度，同埋隻腳既幅度
 
哇…真係好滑…
 
「明未？再試下踩出去…唔洗怕，我係後面慢慢推你…」
 
我喺後面幫呀蚊平衡重心，而佢亦都開始慢慢向前踩到一段仔直路


 
「得得地…係…加油…」我慢慢放手
 
依個情況就好似細細個父母教自己踩單車咁，
不過唔同既係個氣氛…
依家…我諗喺旁人眼中我地會係一對真真正正幸福既情侶…
 
我望住呀甜越踩越遠、越踩越快…
呀蚊佢…終於得左啦…
 
「Yeah~~~」隔住咁遠我仲聽到呀蚊既歡呼聲
 
佢既笑容，充滿住洋溢同興奮…
原來…開心係會傳染比人…
依種感覺…係咪就係叫做幸福呢…


我忍唔住都笑起上黎…