好人卡太多 所以愛神憐憫我?: 4.6

我地入左7仔買枝野飲同hea左陣，
班友終於到齊，可以開波。
 
今日可以話係驗收呀蚊有冇聽書既日子，
雖然琴晚的確係學識左d基本野，
但始終落斜轉彎依d其實要靠佢自己領悟。
 
「嗱！今日就踩去南生圍嗰邊然後再番黎依度，大家enjoy啦！」Judy講
 
「鬥唔鬥快先今次？」Tommy問


Tommy雖然係個死肥仔，但出乎意料佢踩車的確有一手。
 
「唔好啦，慢慢踩，依段路其實好靚又舒服。」我提議
當然啦…我主動係想顧及呀蚊既安全…
踩得太快佢跟唔到就唔好啦。
 
「哦咁好啦…」Tommy略顯失望
 
我地一行十個人邊準備邊吹下水，話咁快就可以上車啦。
 


咁岩我企喺最後面，前面既人個body shape可以話係一覽無遺。
不過…都係嗰句…呀蚊真係最正…
但其實Judy都真係幾唔錯…
 
「嗱！咁開始啦！」Judy講
 
一開始果然係Tommy負責帶路，始終佢經驗比較好。
而我就喺呀蚊後面，唔太放心佢。
 
不過踩踩下發覺我自己都幾多疑，呀蚊真係踩得幾順下…


其他人睇佢都唔會發覺佢係個新手…
 
踩到去山貝河，嗰度景色一如既往真係好靚。
水清沙幼、鳥語花香。
同呀蚊可以一齊踩單車enjoy香港咁靚既景真係夢寐而求，
不過可惜依度有其他相識既人…
下次可以去佢單獨去玩就好…
 
如果你話山貝河係超靚，
咁平日既米埔真係個人間天堂。
大自然，實在太美妙。
 
我地踩到去農場嗰邊就停左一停，
去左食每個經過都會買既豆腐花。
不過唔知係我唔鐘意豆腐花定點，


我又唔真係唔太覺得特別好味道。
 
「呀蚊，依碗你既…」
我都好識咩叫gentleman既…
更何況我依家係佢男朋友…
一傳出我地不和或者感情變淡的話…
Miss Cheung就會秒殺我嫁啦…
 
「唔該晒~」佢塊面熱到紅卜卜
一滴一滴既汗水從佢既面額慢慢流落黎，
絕對睇得出佢頭先踩得好認真。
 
「點呀，仲掂唔掂…」我問

「嘻！當然得啦！」睇黎我問黎都曬氣


 
「好啦，如果大家抖夠就行啦！」Tommy再次發號施令
 
「Go~」呀蚊依然精力充沛
 
「呀…你地行先啦…我有d唔係好舒服…」Judy捂住自己個肚
 
「咁不如再抖多陣？」Tommy問
 
「唔洗啦…你地行先…」
 
「唔好勉強啵靚靚…」呀蚊都出聲幫口
 
「不如我留喺度陪你？其他人行先？」Tommy追問
 


「唔得…Tommy你負責帶路…」
 
「咁呀明你睇住靚靚得唔得？」呀蚊問我
 
「好啦…」我答
 
「你小心d呀…」我提醒呀蚊依個新手
 
「知啦長氣！唔該你睇住靚靚啦！到時電聯啦！」
 
「嗯…」
 
我望住佢地重新開始起行，
佢地既影離我越黎越遠…
慢慢已經再睇唔到…


 
「呀明…」
 
唔知係我睇錯定點…
Judy既面上竟然浮上一絲笑意…