翻版林明禎身邊戴眼鏡嗰條𡃁小劉行咗過來解開我同大學生身後條鐵鏈,佢捉住我嘅手臂扯我起身,可能我嘔得太耐成個人都浮浮地又暈暈地,一企起身又腳軟坐番低,另一條𡃁就走過來捉著我另一隻手臂,兩個人一齊扯住我起身行。我呢到係用扯來形容佢地嘅動作,因為佢地完全冇顧忌我係一個病人,好粗暴咁扯起我,我成對手俾佢地扯到好鬼死痛,同時間又反胃,好辛苦…

出咗我地嘅車卡,向前行咗兩卡就來到一個門口貼著醫務室嘅房,房入面得張床同一張細細地嘅辦公枱同凳,仲有啲醫院嘅白簾喺張床隔來,床隔來有一個到頂嘅啡色櫃,嗰個應該就係藥櫃。佢地豆咗我去張床到訓低,再解開埋我地兩個對手扣,一訓低啲胃酸流向食道我又開始想再嘔,大學生拎咗個紙袋俾我,我即刻拎著來對住佢乾嘔,之後佢拎咗支水俾我飲,飲完之後好少少,我就合埋眼訓喺到休息一陣。

我啱啱一合埋眼就聽到道門俾人閂咗,然後好似有人俾人打咗幾錘,之後悶哼一聲就靜番落來。我即刻打開眼睇下發生咩事,冇戴眼鏡條𡃁訓咗係地下到,翻版林明禎俾小劉用手巾掩住咗個鼻同口,過咗一陣佢就暈咗。發生緊咩事,點解會咁嘅?大學生全程都剩係企係我床邊,小劉拉咗佢地兩個去間房嘅一個角落到用繩綁起佢地,再塞咗條毛巾落佢地個口到。

「食咗佢。」大學生塞咗粒膠囊落我個口到,我正想吐出來睇下咩來嘅時候,佢又補多咗句:「唔想繼續嘔就食咗佢。」所以我嘔都係佢計劃嘅一部份,頂,我嘔得咁辛苦佢就輕輕鬆鬆跟著我行入來,佢早啲同我講嘅話我同佢掉轉做行過來嗰個咪好囉。呀,係喎,我唔係讀醫架喎。

係我個腦諗埋啲亂七八糟嘅嘢嘅時候,大學生行咗過去拎走翻版林明禎口入面嘅毛巾,塞咗粒藥入佢個口到,然後行去枱到拎咗枝水,顎高佢個頭倒啲水入去再用手掩住佢個口。翻版林明禎好似俾突如其來嘅水濁親醒咗,佢好嬲咁望著大學生係咁發出啲「嗯嗯」聲想反抗佢嘅動作,但都無補於事,最後佢都係被迫吞咗啖水。大學生好快又用毛巾塞著佢把口,好休閑咁行過去張辦公凳到坐低。佢地係咪想逃獄所有先捉著翻版林明禎同佢條𡃁,但係佢塞咗粒藥俾佢食又係咩意思,想殺人滅口嘅話小劉就咁勒死佢地就攪掂啦?





大學生見到我一臉疑惑,就話:「Sorry,呢個係我地諗到最好嘅辦法,小劉係我嘅同伴,我地喺你嘅飯入面落咗啲令到你嘔嘅藥等佢地會帶你來醫務室,張醫師都係我地做咗啲小動作洗走咗佢,如果唔係佢地唔會俾我陪你過來。」

「…你地係咩人?點解要咁做?」

「未正式同你介紹自己,我叫孟翰瓏,啲人都叫我阿瓏,之前同你講嘅嘢我都冇呃你,我係港大嘅醫學生,但係我未畢業就已經停咗學,之後俾反疫苗組織「燎」招攬咗做幹事。雖然我未完成大學課程,但係一個普通醫生要識嘅嘢我都識晒,我阿爸係醫生,由細到大佢都灌輸好多醫學知識俾我。」

一時間我唔係好反應得切,所以阿瓏都係未打針嘅?政府又話除咗我之外成個香港嘅人都去咗打針嘅?我問:「所以你都係冇打過針嘅?」

「冇錯,「燎」嘅所有成員都冇打過針,組織嘅創辦人,亦即係我地嘅會長,發現政府谷針背後嘅陰謀,所以就創立咗呢個秘密組織去…」





阿瓏講講下嗰陣,角落頭傳來一陣痛苦嘅呻吟聲,翻版林明禎滿頭大汗,面色蒼白,佢個口俾毛巾塞著咗所以講唔到嘢,不過睇得出佢好痛苦。阿瓏行咗過去,係佢面前踎低,好邪氣咁笑咗下然後問:「係咪好痛?」翻版林明禎望住佢係咁點頭,佢再問:「我頭先俾咗一粒藥你食,食完每隔十分鐘就會全身劇痛抽搐。乖乖地聽我話我就俾解藥你,ok?」呢一刻嘅阿瓏同呢兩日相處嘅阿瓏好似兩個人咁,依家嘅佢冇咗嗰種入世未深嘅稚氣,我見到佢依家個樣都覺得不寒而慄。佢俾我粒藥應該唔係啲咩毒藥掛,我到依家都冇事應該冇嘢嘅,再加上佢喺嗰個咩「燎」嘅反疫苗組織應該係企係我嗰邊嘅因為我同佢地一樣冇打針。

翻版林明禎已經痛到有氣無力,係咁點頭,阿瓏又拎走塞住佢口條毛巾,放咗粒藥落佢個口到就用手掩住佢個口,等佢冇得亂嗌。佢急不及待咁吞咗粒藥,過咗陣佢就冇再呻吟。阿瓏同佢講:「半個鐘之後我會再俾藥你食,但係你依家一嗌我就可以即刻令你比頭先痛苦十倍。」佢放開佢隻手,翻版林明禎好嬲咁望著佢,問:「你們是誰?想幹什麼?他們發現我們被綁住你們就死定了!」

「我剩係想你做一樣嘢,帶我地去疫苗防控中心。」

「你們要去幹什麼?那裡是軍事重地你們進不去的。」

「所以咪要你帶我地去囉。」佢又露出嗰種邪笑,我依家先發現原來佢個樣可以咁奸詐,等我仲以為佢係陽光男孩。
已有 0 人追稿