「跟住落嚟我哋要審視嘅就係內閣“覺醒”嘅政綱。

佢哋表示喺學生同學校通訊方面,學生會將會設立郵箱同埋網上google form,提供同學一個匿名嘅渠道去反映畀學校聽佢哋諗緊啲乜。學生會會每星期寫封信畀學校反映情況。

喺文化方面,內閣會維持學校一直以嚟嘅傳統文化,繼續保持學生會固有舉辦嘅團體活動。

喺財務方面,內閣會徹底查閱過去一直以嚟嘅財務報表,以確保所有挪用學生會經費嘅舉動得到揭發,並且嚴懲。內閣會公開學生會嘅財務報告,以畀同學查閱同埋監督學生會嘅運作,絕對唔會再出現好似今次學校旅行嘅事件。

同一時間,內閣希望表達佢哋爭取公義嘅立場,要求覆核同埋平反冤假錯案,包括懲罰喺自修室非禮事件屈人嘅蘇家祺同學等,並且停止包庇部分同學,以及要求副校長蘇sir停止講大話,公開真相。





內閣“覺醒”表示佢哋唔係代表十個人嘅聲音,而係代表所有見到一系列事件而忍無可忍嘅同學。

喺了解完內閣“覺醒”嘅政綱之後,我哋一齊睇下網上觀眾有咩反應。

Kiki So就話,呢一個內閣根本唔係為同學服務,而係堅持推銷陰謀論去博曝光率。

Audrey Chan就話,呢一個內閣冇為同學爭取福利,隔離個內閣起碼成功爭取珍珠奶茶店九折福利。

Xander Lam就話,認為好多人其實不滿咗好耐,相信沉默嘅大多數會認同呢個內閣嘅政綱。





幾個禮拜之後就係投票日,大家有幾個禮拜時間決定邊一個學生會嚟過可以代表到你嘅諗法同埋理念,到時記得踴躍投票!」

xxxxxxxxxxxxxxxxxxxxxxxxxxxxxx
「又食茄汁豉油撈麵,因住腎虧呀。」

「收皮啦國鋒。」

「咁祝你身體健康,年年有今日啦。」

「邊個?咦,子芊?你哋做咩一齊落嚟呀,拍緊拖呀?」





「唔係。子芊認同“覺醒”嘅理念,咪諗住做義工幫下手囉。」

「話時話,你兩個麻甩佬有冇見到呢兩個禮拜學校入面基本上周圍都係“安榮”鋪天蓋地嘅宣傳?」

「有呀,一樓樓梯口仲有大陸雞嘅大頭,真係睇見都想嘔。

周圍都係 周圍都係 點解日日都見到佢地大頭咁滯...」

「阿方,唔好唱Black Mirror住。雖然喺校園電視台做出嚟嘅民調,“覺醒”係大概贏五個percent。但係,台長認為選情唔太樂觀,因為經費不足嘅關係,好難夠打宣傳戰。」

「班友咁多錢嘅,大陸雞屋企開金礦?」

「等陣先,我有一個idea。」





xxxxxxxxxxxxxxxxxx

「Ok喎子芊,呢個係可以喺質詢大會上面應用嘅題材,到時逼佢哋一定要正面回答。」

“覺醒”內閣副主席此時進入了課室。

「台長,我同秘書研究咗你之前叫我哋追查嘅嘢,你可以喺答問大會去質詢。」

「太好啦,佢哋而家喺度牙刷刷,誇張到副校長蘇sir朝朝企喺學校門口捉邊條女條裙太短都用緊“安榮”出產嘅嗰一把競選扇。」

「點止呀,佢哋嘅“競選小物”仲有斜孭袋、貼紙、校曆表等等,質詢嗰日一定要大力反擊。同埋我哋一定唔可以鬆懈,因為民調有誤差值,再加埋佢哋部宣傳機器更強,我哋一有鬆懈就輸硬,知唔知道?」


Ig: marx_ice_
https://instagram.com/marx_ice_?utm_medium=copy_link