#######################
「唔該曬你幫我啪咗個掣。」

「冇問題啦,我知道個總掣喺邊嘛,舉手之勞嚟。」

「禮拜二可唔可以幫多我一個忙?」

「絕對冇問題。」

「我一定會報答你!」





#######################
「歡迎收睇最新一集“汕頭透視”,我係你哋嘅主持人鐘國鋒。今日根據大家喺我哋校園電視台個網站上面投票所得嘅結果,我哋將會講解“選舉舞弊疑雲”呢一個題目。

係,我澄清先,喺校園電視台個網站上面嘅投票並冇任何選舉舞弊㗎。

講起“選舉舞弊”的四個字你會諗起啲咩。台灣?南韓?普京?拜登?共產黨?我記得有啲人會話“共產黨先會做票”,但係我想講呢一句一定係錯誤同唔準確嘅,因為係共產黨執政嘅國家並冇差額選舉。好啦,扯遠咗喇。每次喺社會上面出現呢類型嘅指控,大部分人都會批評係“陰謀論”,且認為提出“陰謀論”會破壞嗰個地方嘅穩定。

但係如果一件事係有足夠嘅證據去證實返陰謀論入面嘅猜測,咁“陰謀論”已經唔再係“陰謀論”。我知道頭先嗰句好廢,但係,幾百年前“地球係圓嘅”都係陰謀論,甚至提出呢個觀點嘅人都可能畀人殺頭,我哋應該要為提出所謂陰謀論而冇畀人殺死感覺到開心,哈哈。





乜嘢係科學精神?就係大膽假設,小心求證。接住落嚟講嘅所有嘢都係根據客觀嘅事實去作主觀嘅判斷,並不代表本台嘅立場。

首先係一啲同學嘅口供。有請校園電視台記者張子謙。」

「你好呀,請問你中幾㗎?」

「中一。」

「你投咗邊個內閣?」





「安榮。」

「點解嘅?」

「票站門口嗰個老師叫我咁投㗎。」

「好嘅,唔該曬。」

「多謝記者嘅採訪,喺票站如果真係有老師教同學去投票比特定一個候選內閣,有選舉舞弊嘅嫌疑。

其次今屆學生會選舉大家反應踴躍,熱烈嘅氣氛吓係大家都去咗投票。今年投票都係有史以嚟最高嘅一次,有108%!

嗰8%可能係幽靈,亦可能係種喺學校嘅盆栽,可能係學校入面每一部冷氣,佢哋都分分希望投下神聖嘅一票。我哋最終嘅得票結果比起可參與投票嘅學生人數為多,係一個重大嘅疑點,校方需要就呢個問題回應。

第三就係學校唔容許內閣“覺醒”嘅助選團入去點票現場監票,所以呢個選舉係唔係真係公平公正令人懷疑。





喺未回答呢啲問題之前,貿然去進行新一屆內閣嘅宣誓活動係魯莽並且危險嘅,後方需要對於以上嘅疑點提出回應以釋除學生嘅疑慮,否則只會增添更加多嘅混亂。

學生會嘅選舉係一個好好嘅渠道係同學去選擇究竟由邊個內閣去代表佢哋,但係前提係個選舉必需要公平、公正、公開。如果選舉結果唔能夠反映選民嘅意願,選舉就失去咗佢本身嘅意義。

多謝收睇本集嘅汕頭透視,下星期再見。」

汕頭論壇 @shantou_forum

#0103 學校應該係喺未徹底咁釋除大家對於選舉舞弊嘅疑問 就唔應該舉行新內閣就職典禮 聽日放學之後我哋一齊去副校長室門口抗議!
306 likes

@_jaychan_ 實到
122 likes





@dybs_bfk45 好
57 likes

@slodcbcnrodhns 一定要畀一個回應!
43 likes

@chris_wong G持
11 likes

@tongn_samm 垃圾蘇sir
2 likes

@hei.1209 明顯有嘢隱瞞啦






Ig: marx_ice_
https://instagram.com/marx_ice_?utm_medium=copy_link