人妻出軌的二三事: 64 分手 2
雖然係阿Mark誤會，但係我親手製造機會俾佢誤會，阿Mark質問得啱，點解佢話幫我叫車，我唔接受呢？
唔清楚別墅嘅地址，我可以向Leonard問清楚。
我到差唔多兩點先返到屋企，做法事無可能攪到咁夜，仲要比我自己預算嘅遲咗超過一個鐘，兼且飲到酩酊大醉，阿Mark點會相信我係清白。
佢親眼睇住Leonard攬住我嚟錫，更加令到我同佢之間嘅縫隙無得填補，亦都係駱駝背上面最後一條羽毛。
～～～～
阿Mark唔返嚟晚飯嘅日子更加多，過往佢打完波就同波友食飯飲啤酒，我唔相信而加佢打波次數多咗，可能只係逃避返屋企。
間中聽到佢同波友傾電話，隱約知道佢舊女友要求同佢復合，但係我唔敢問，亦無資格去問。
阿Mark亦再無同我同床，每晚佢等到囡囡瞓著咗就搬啲枕頭被鋪出廳，朝早囡囡起身之前就搬番入房。
有時囡囡喺廳做功課，又或者玩電腦遊戲玩得夜，佢一係就陪住囡囡，囡囡唔想佢陪，佢就返入房，上吓網，向朋友發短訊，直至囡囡去瞓覺。
就算係一齊喺房裡面，佢都同我保持一定距離。
我相信佢心意已決，唔再俾機會我同佢重新和好。
「Mark，你無必要為咗隱瞞囡囡，勉強同我一齊！」
「我係為咗囡囡好，以佢咁嘅年紀，受嘅苦難唔應該咁多！」
「囡囡係我嘅，你唔需要付出咁多！」
「囡囡係你嘅！哈哈，你講得無錯，但係我一直當佢係我親生，當佢係我哋兩個嘅囡囡！」
「Mark，我表達得差，我意思係我母女欠你太多，我唔應該因為囡囡而阻住你，對你太唔公平！」
「你一直同一個唔想要囡囡嘅人來往，對囡囡公平咩？！」
「我⋯⋯」
我唔可以否認，Leonard返咗南美之後，繼續有透過短訊、視頻又或者電話同我保持聯絡。
我同Leonard通訊，只因為除咗阿Mark，我真係再無朋友。
雖則Leonard無停過講要接我過去南美洲，同佢一齊生活，我知佢對我係逢場作戲，只係希望返嚟嗰陣時有個性伴。
Leonard無當我係純粹朋友，阿Mark就更加唔相信我同佢係純友誼。
「Mark，我做人做事一直以嚟都一蹋糊塗，你唔信我係理所當然，我哋兩母女更加唔應該係你結識女朋友嘅絆腳石！」
我一直咁喊。
「我會同囡囡解釋，等佢接受，Mark，我打算搬出去！」
阿Mark沉默咗幾分鐘。
「慧，你無經濟能力搬出去，你同囡囡暫時喺度住啦，我搬返阿媽度。」
年幾之前，我自殺俾阿Mark發覺，及時救番我，之後佢怕我俾附近嘅街坊指手劃腳，指指點點，佢賣咗自置嘅公屋，喺第二區買咗呢個單位同我一齊生活。
我點可以霸佔咗佢日後同太太嘅愛巢。
囡囡經過咁多災難，佢變得好成熟，唔需多解釋，佢都明白到目前嘅處境，可能佢冷眼旁觀，已經一早察覺唔妥。
租咗地方搬出，我同阿Mark正式分開咗。
我好徬徨，而加份兼職人工好低，根本養唔起我同囡囡，唯一係靠手頭上十幾萬積蓄。
Leonard知道我處境之後，佢勸我唔好咁硬頸，必要時可以動用我一直無理過，木谷留俾我，我甚至唔知道有幾多錢嘅銀行存款。
佢又勸我去咖啡室學吓嘢，攞番分應得嘅人工，又有一技之長，我一日有收入，一日都唔需要領木谷嘅情。
佢更加好認真咁同我講，叫我倒不如接受佢提供俾我嘅經濟援助。
雖然無講出口，佢嘅意思等於包養我，我當然唔會接受。
生活迫到埋嚟，我嘅積蓄差唔多用晒，無得選擇，硬住頭皮上木谷間公司。
「我哋等咗好耐，你終於上到嚟，我可以完成主席俾我嘅仼務。」
負責見我嗰位小姐，攞咗啲文件出嚟，解釋俾我聽，我係股東，但佢哋仍然派人負責咖啡室嘅營運同埋管理，直至我有新嘅通知俾佢哋。
Leonard又越洋同我安排去咖啡舖做學徒。
間咖啡店唔係好大，木谷明白規模大啲嘅公司，我做唔嚟，一間小店可以俾我自給自足，不過我唔想用佢啲錢，淨係打佢一份工，收佢一份糧，喺佢個户口提出嚟應急嘅，我一定填番落去。
為咗謀生，早日償還番攞咗户口啲錢，我俾足心機學習，希望早啲上手。
幾個月後從囡囡口中知道陳Mark結婚婚嘅消息，佢同舊女友復合，結婚係遲早嘅事，傷心痛苦少不免，不過我有個女要撫養，唔到我頹廢，唯有叠埋心水，專心做嘢，湊大囡囡。
～～～～
老公一家對我嘅憎恨無減低過，唯獨對囡囡嘅愛錫一直無變，耐不耐父女都會見面，甚至接佢去嫲嫲度玩幾日。
分居期差唔多夠，老公突然話約埋我同囡囡去玩，我怕佢要攞番囡囡嘅撫養權，木谷死咗，Leonard又喺第二度，無人可以幫我。
囡囡好耐無出去玩，老公陪佢玩得好開心，一直無提過其他嘢，只係問吓Leonard對得我好唔好。
「我而加同囡囡兩個人生活，你呢？」
我無謂向佢講咁多過去嘅嘢。
同女拳手分手後，佢都係一直單身，以佢嘅性格同女人緣，唔愁無女人喺佢身邊。
玩咗一日，佢送我哋返屋企，囡囡坐喺中間瞓著咗，老公隔住囡囡拉我隻手過佢度拖住，我無反抗，俾咗我一家三口溫馨感覺。
「一點綠」捧住盤早餐，同我打第一句招呼開始，幾年過咗，命運拉住我走入色慾深坑，墮落到無法挽救，我有啲傷感，眼框紅起上嚟。
「上你度參觀吓？」
落咗車，佢一手拖囡囡，一手拖住我，一齊上咗我屋企。
經濟能力所限，我租個單位好細，打開門就一眼睇晒，所謂開放式，係連廚房都無，業主喺單位嘅盡頭做咗一個地台式儲物櫃，我喺升高咗地台放張床褥，床邊掛張布簾做間隔，就當係房，另一邊當做廳。
至於浴室細到門無，都係喺門口掛一幅膠簾。
屋企得一張木摺檯，兩張木摺櫈，食飯，囡囡做功課，而加招呼老公都係靠佢。
囡囡習慣咗自我照顧，佢攞咗啲衫準備沖涼，但係有個男人喺度，雖然係爸爸，佢都唔好意思當住佢面前除衫。
「你入裡面一陣啦！」
我望到囡囡好尷尬企喺度，唔知點做，就叫老公走去床褥嗰邊，同佢拉埋布簾。
「果然係得兩母女！」
囡囡入咗去沖涼，老公拉返開條布簾。
「無乜必要呃你！」
佢坐喺床褥，趁我唔為意，就拉我落床褥，攬住我，想鍋落我度。
「囡囡喺裡面呀！」
我揞住佢個口。
「殊，唔好唔大聲咪得囉，錫一陣先啦！」
老公唔理咁多，捉住我隻手錫落嚟。
我一直都愛老公，佢喺屋企一向係發號施令，我習慣服從佢，再無抵抗，任得佢錫。
同阿Mark分開之後，最多都係俾習慣好西化嘅咖啡師傅喺教我嗰時揸吓隻手，攬吓條腰，再無同男人親近過，平靜咗嘅心俾老公激活番。
錫得兩錫，我肉緊到攬實老公，由得佢同我「茄輪」，摸我身體。
怕囡囡隨時沖完涼出嚟，我一直提心吊膽，留意住浴室裡面嘅水聲，水聲一停就即刻推開老公，扣番好俾佢解開咗嘅bra。
「今晚我喺度瞓！」
老公喺我耳邊講。
佢留低嘅目的係乜好清楚，我有啲矛盾，同佢分開咗咁耐，佢而加話要人我就俾佢，我有啲唔服氣。
如果話同佢無晒感情，我又認為唔係，就算上次佢打傷我，都係一向以為我係個乜都唔識嘅師奶仔，當發現我同Leonard有姦情，佢更加嬲，一時火滖，控制唔住脾氣。
事後我無怪佢，事關係錯在我先對佢不忠。