學校禮堂的小房間【少甜】: 2/ 獨處

果日之後，唔知點解我下意識留意佢多咗，仲比我發現佢真係換咗啲濶身啲嘅褲！莫非佢一直以黎真係唔知自己啲褲太貼身，比我一講就改咗？唔係掛⋯ 

星期一放學後，畫劇社排練，作為畫劇社中堅份子嘅我當然留守到最後一刻！ 喺學校禮堂台後面有一個畫劇社專用嘅雜物房，入面放滿我哋嘅道具、服裝、音響等等。 排練咗兩個幾鐘，大家真係好有效率咁⋯走人，又留低我一個收拾殘局！ 

正當準備喺雜物房離開之際，我頂你個肺，點解聽到有人喊咁？日光日白唔係有嘢嘛？我鼓起勇氣行入去雜物房巡視，越行越驚⋯⋯ 

「嘩！」 嚇死我！最入個位有個人喺度！ 
「喂！你⋯你做咩事喺度？呢度係畫劇社專用架喎！」 
「對唔住呀⋯我一開頭以為無人喺度所以入左黎，點知你地會用呢度我就唔好意思出返去」 
嚇得我⋯⋯原來係一個人！但係點解呢個人唔著校服喺度出現？ 


「咁一係你出黎啦，我要鎖門喇。」
 「你可唔可以唔好講出去？」 
「唉吖！你唔好咁婆媽啦，我講出去做乜？你阻住我閂門呀」 

竟然係周Sir！雖然佢已經無喊，但係好明顯佢有喊過嘅痕跡。我完全無諗過牛高馬大嘅周Sir會有呢一面，佢平時都好陽光好受其他同學歡迎架嘛！ 

「你⋯無咩嘢呀嘛？」 
「無事無事，唔好意思我阻住你。」
 「喂！你喺我地頭咁樣好唔啱規矩喎，你唔講低你嘅事，我唔比你走架！」



 周Sir有啲愕然，然後佢突然笑左出聲。我發現我未試過真係望清楚佢，原來佢都真係幾可愛，單眼皮，笑起上黎幾甜，但又有一個唔匹配佢嘅身高同埋……體型，原來佢真係幾大隻！