其實每一次玩完我都好多嘢諗。
又再一次去認識自己。呢一面係我黑暗既一面。
到底我想要啲咩?我單身咗一年,上一個女朋友係我既私奴。
同佢一齊好開心,但係同時成件事開始慢慢變咗質。
唔再係主奴…慢慢去到情侶…再慢慢去到唔知邊個要聽邊個話…我開始迷失咗自己。
去到嗰一剎那,我知道我離唔開佢。
不過換嚟既係背叛。
我直接刪哂我同佢既 twitter account…刪哂所有既相,片。
唔想再喺呢個圈度。
直至我見到小美畀個麻甩佬非禮,我見到佢既眼神…我懷念以前做S既時候既征服感,人哋要向我求饒,擁有生殺大權既感覺…




講到尾,我都係想滿足自己自大既一面。
我到宜家都仲係唔知道自己既目的,我係咪仲係一年前迷失既細路?目標?我有穩定既工作仲唔夠咩?生存唔係就係咁㗎咩?開心?
我好似好耐無真係心好暢懷咁笑。
另一半?係我宜家無,但係有女…
(叮~你有條新訊息~)
(喂,幾時得閒再見我啊?)
喺巴士度空緊空,諗緊人生目標呢啲既嘢時候…小美msg 我,而我身邊都只係仲係得我一個。
(做咩啊?咁快就掛住我啦?)
(得唔得閒啊?我睇戲被人甩底啊,陪我睇啊~)
(Ok啊,我啱啱放工,喺巴士喳,我轉車過嚟搵妳。)




(好,我等你啦,多謝你啊!)
啱啱諗到另一半…小美其實都係個幾好既選擇啊…
---------------我係分隔線---------------
『喂,被甩底既小妹妹,點啊?今晚睇咩戲啊?』
『鬼片啊,你唔怕㗎啦?』
『唔係掛,妳早講啊,鬼片我就唔嚟啦!!』
『咁惡㗎…咁我都買好咗飛啦嘛…』
又係呢個楚楚可憐既樣…佢既眼神好熟口面…
好啦,面對住呢個人畜無害既可憐樣,又真係嬲唔落既…
『好啦好啦…陪你睇啦…』




『都話你最好㗎啦~咁我哋去買爆谷嚕~睇戲唔食爆谷又真係差咁啲嘢咁~』
入到戲院坐咗喺最後一排。
『點解要坐咁後呢?』
『咁坐後啲…遠啲…好似無咁驚啊嘛…』
『妳呢啲女人真係犯賤…又要驚但係又要死去睇。』
『咩喎…咁鬼片就係咁吸引㗎咩…』
套戲開始咗無幾耐就不停咁嗰啲咁既死人音效啊,啲鬼又唔知點跳出嚟啊…
嚇到我同佢都係咁叫。
佢最過份既係成盒爆谷都嚇到跌埋落地…
我盒爆谷啊…
我仲諗住真係頂唔順就數爆谷㗎嘛…
喺盒爆谷跌落地嗰一刻…佢都好似隻兔仔咁跌入咗我既懷抱…
嗰一刻…我望住咗小美,聞到佢既香水伴隨住佢既體香…
我既身體好自然反應咁攬實咗佢…佢既頭就直接埋咗喺我心口…慢慢我聽到佢開始大聲咁喘氣…聲音有啲抽畜聲…
原來佢係嚇到喊咗出嚟…




我隻手又好自然反應咁輕輕撫摸佢既頭…聲帶發出咗啲好溫柔既字句去安慰佢…
一切既一切都令我諗返起前女友…
當初就正正係同佢睇完咗套鬼片,我正式向佢表白,許下咗好多山盟海誓,而佢由私奴轉成我既正式既另一半。
佢當初都係好似小美咁…
嚇到喊咗出嚟,好有一種一定要保護佢既衝動當時充斥住我既內心。
慢慢我已經無再留意套死人戲講緊咩,無再聽到啲鬼鍊咁既音效…
我淨係留意到小美既喊聲…佢既味道…同我既回憶…
一直去到套戲既彩蛋都完…
職員打開燈既嗰一刻。我成個人醒咗…而我哋既姿勢同一般既情侶無疑。
小美既側臉就正正貼住我既心,聽住我既心跳,我左手就攬住咗佢,手掌仲輕撫緊佢既頭…
小美好大反應咁成個人跳起咗,紅都臉哂咁望住我。
『多…多謝妳。』
---------------我係分隔線---------------
直到出咗戲院。
『Sorry啊,啱啱有無嚇親你啊…我喊到成個豬頭咁。』




『還好啦…不過嚇到咁就咪鬼去睇鬼片啦…』
『咁係因為…我…』
『多謝你啊,無乘機抽我水,好男人,大大加分啊!』
『咁多謝啊,不過…講時講,妳跌咗我盒爆谷,我唔理啊,下次買返畀我食!』
『好啦,聽日仲要返工,我走啦,送妳去坐巴士啦。』
『咁快就走啦?好啦咁…』
今晚,我同小美依舊係各走…各路。
其實我聽日係放假㗎…只係我怕我再對住小美,我會忍唔住。
喺離開之後…我望住小美既背影,我發現佢同我既前女友既背影開始慢慢重疊…
已有 0 人追稿