起舞吧!愛與舞蹈的感覺: 6
「起身啦盈盈」好唔容易先訓著，去到唔知咩時候就比芝詩嘅聲音嘈醒左…
「咁早叫我起身做咩喎，琴晚差啲就…」一路望電話一路講呢句，點知就…
「樂盈姐姐，今日得唔得閒幫我睇下呢條片？」冇錯，就係依旋比左條雙簧管嘅片我，而片入面嘅主角，就係佢阿哥…
「orz…」一直發出呢種聲音，芝詩走左去我身邊一齊睇電話都唔覺…
「嘩，佢做咩比呢條片你」「依旋比我架…」復左佢之後就一直望住電話發呆…
「小姐你有情飲水飽就得，但我好肚餓呀，快啲啦」過左唔知幾耐就比佢打斷左思路，而影天琴日條訊息突然出現係我腦海之中，究竟點復佢好呢？
「芝詩你今日係唔係冇野做？」「嗯，做咩？」呢一個早餐會議，一直討論緊嘅話題就係影天同依旋，但問題係…我都仲未諗好點復佢，但聽日就係…
叮噹…，咦，呢個時候上黎嘅，其他姊妹唔係約左係葵芳等咩，嗯？，麗晴？
「麗晴你咁早嘅」「冇呀，見冇咩做咪早啲過黎，樂盈你點呀？」一直係茶餐廳傾左個半鐘，直到十一點先離開餐廳，點知就係呢個時候遇到影天兩兄妹…
「樂盈姐姐」一見到我就好似成個排球咁跳左落我度，而兩個姊妹又係度笑…
「唔好意思呀，依旋你咁樣整襯樂盈架」「哦，有異性冇妹性呀你呢個阿哥」係度發阿哥脾氣嘅依旋，一邊望住我有咩反應，一邊又望住佢阿哥有咩動作…
「點解你地係度嘅」唔到半分鐘嘅時間，依旋又彈左呢個問題出黎。
「我地係樓上住炸嘛…」芝詩好似想咩秘密都爆出黎咁嘅款，禁都禁唔住…
「咦，我同阿哥都住附近架炸，不如依家上黎教我囉？」依旋出奇不意嘅攻勢，令我地三姊妹都有啲尷尬，仲要…一陣係約左易心同樂愛去行街添…
「哈哈，我地一陣約左人，不如星期二先…」推得就推，最好就，呀唔係喎。
「就星期二，咁星期二放學我黎搵你，走囉阿哥」好似奸計得遑咁就跳走左…
「果個係？」「心上人個妹」芝詩同我答左之後，麗晴望住我嘅眼神又唔同左…
「芝士唔好成日爆我啲野出黎啦」面紅紅向著好朋友抗議，唔到一陣就見到…
「咦，點解盈盈面紅哂嘅」「岩岩比人撩囉」麗晴回想著岩岩嘅情節回應道。
「WOW，睇黎有人好快就出到Pool喎」樂愛好快就望著我講出句說話。
「喂，唔好講我啦，唔係行街架咩」對住佢地四個都唔知講咩，唯有向前行。
「係喎，你地學校幾時測驗？」麗晴問呢個問題果陣，芝詩好明顯黑面一下。
「兩個禮拜後呀，下個禮拜應該唔去排舞啦…」樂愛好快就講左自己嘅無奈。
「樂盈你搞得掂」麗晴講嘅唔只係讀書，仲有…係依家真空狀態嘅屋企。
「應該…冇問題掛」好快我地係葵芳行左幾個圈，之後仲有時間就出左旺角。
「你地今晚可以食飯架何？」問完樂愛同易心，就決定左今晚係紅茶解決。
「學校見」解決左晚餐之後就返左荃灣解散，再黎就同佢兩個渡過嘅夜晚。
同兩個姊妹傾左差唔多成三個鐘，到左一點果陣，雙眼終於攰到睜唔大……
「十分嘈…」「咩事呀…」芝詩聽到呢個鈴聲之後就埋怨起黎，佢仲未想醒…
「早晨！」麗晴嘅聲音就係洗手間傳出，原來佢已經起左身梳洗好。
「早晨，想食咩早餐？」「係樓下買個包得」唔到兩分鐘，麗晴已經出左門口…
「死芝士，起身啦」麗晴唔係度，咁就用最暴力嘅方法叫佢起身。
「係…係…」佢起身嘅時間已經係七點十五分，離遲到仲有一個鐘…
「你快啲，我整個早餐先」好快就整左餐蛋治比自己，食完就好快就返學校。
「係喎，呢兩日咁忙…」「樂盈姐姐」係後面傳黎熟悉嘅聲音，果然係依旋…
「依旋早晨」「早晨樂盈姐姐，聽日係邊度補習？」永遠都唔會忘記呢樣野…
「聽日我地…」「樂盈，呢位係…」「兩位姐姐好，我叫劉依旋」聽到佢個姓，兩位姊妹都已經驚訝起黎，依旋離開之後，佢地係度狂問關於佢嘅問題。
「都唔知點好，其實咩都冇準備到…」諗起聽日就幫佢補習，但咩都冇準備。
「唔駛驚，樂盈你係全級頭五黎，咩都係你個腦度啦」芝詩一句點醒左我。
「不如你地三個都黎，咁我咪唔洗咁尷尬囉？」「喂，你點樣一打四呀…」講到我好似要幫埋佢地補習咁…，其實我只係想有班姊妹陪，唔洗傾啲尷尬問題。
鈴鈴，上堂嘅鐘聲好快就響起，而我同芝詩兩個都返課室，過左完整嘅一日。
叮…，放學之後，手機好快就收到一個訊息，係舞室傳黎，今日要取消課堂？
鈴鈴…，不到兩秒，麗晴嘅電話已經到…，可能佢知道我地岩岩先放左學。
「麗晴你知唔知咩事？」「我都唔知，不如返舞室睇下？」約定左之後我同芝詩都開始行返舞室，而易心同樂愛係前面不遠處，睇黎都可以叫埋佢兩個。
「樂愛」叫住左其中一個，講左發生咩事，佢地就話，今晚冇堂可以一齊去。
「老師」見到幾個水桶，而舞蹈室嘅情況都幾嚴重，今個禮拜應該都冇堂…
「今個禮拜要處理漏水嘅問題，所有堂會延後一周，請大家留意」群組內收到呢一個訊息，而四位姊妹冇野做，就齊集係我屋企…，開左第一次溫習會議。
「咦，不如今個禮拜都係樂盈屋企開溫習小組？」「聽日小妹妹都上埋黎溫？」大家好快提左呢個建議，亦都唔等我嘅意見就訂左落黎，而且仲…
「依旋，聽日可以係我屋企溫書，放學係圖書館門口等」芝詩搶左我電話send左呢條訊息過去，而好快就收到「好，快啲到聽日就好😍😍」嘅回應。
「嘩，睇黎佢好仲意你喎樂盈」「哈哈，我都唔知自己想點…」係咁同佢地溫書傾計，時間一分一秒咁過，好快就到夜晚七點，係時候落街搵野食…
「今晚不如簡單啲食茶記？」「好…」「樂盈？」係遠處傳黎一男一女傾計聲…
「影天？」「姐姐」唔知點解，總覺得係呢個時候都撞到佢地唔係一個巧合。
「不如…一齊食飯？」「哦…」完全唔知點回復嘅我只係講一個字「哦」
比佢地帶左去一個比較高級嘅地方，之後就叫左幾樣野食，好似一個常客咁…
「姐姐，聽日係唔係圖書館等？」搵野傾嘅開頭，依旋已經帶起左個話題。
「嗯…，不過你咩科最弱…」開始問起需要補習嘅內容，而佢拎左本書出黎。
「係呢科…」數學？，點解唔問自己阿哥，數學應該係男仔強過女仔架？
「嗯…，仲有冇？」對自己數學冇咩信心…，所以就希望從另一科開始。
「咁呢科先」綜合科學，呼，都算係強項…，雖然依家讀緊嘅三個分開。
「好野，咁聽日我等你啦姐姐」好快就望住眼前嘅食物發光，之後就開餐。
呢一餐都算開心，而四位姊妹食完飯都幫住影天，係度不停咁講好說話。
「唔駛比答覆我住，阿妹就交比你啦」手機突然又彈出個咁嘅訊息……