起舞吧!愛與舞蹈的感覺: 5
「咁早呀，我地係依旋屋企，一陣荃灣站等？」「不如半個鐘後係巴士站等？」我地四個係度傾究竟點樣去先好，因為我地啲衫仲有半個鐘先可以拎得。
「咁我地半個鐘係去尖沙咀嘅巴士站等」用左兩分鐘傾好左結果，決定巴士出尖沙咀…，呼…，都係差唔多五點到尖沙咀，應該唔會太多人掛。
「小姐，你朋友啲衫得啦」工人姐姐係呢個時候叫左出黎，而我地都認領返我地啲衫，搞掂哂所有野之後就一齊離開依旋嘅屋企，嗯，依旋佢都跟埋出黎。
「依旋你唔約自己啲朋友出黎玩？」「佢地都唔出黎玩，跟坐姐姐你地咪幾好」好快就到左巴士站，而芝詩亦都已經係度等緊我地，唔
洗兩分鐘就上左巴士。
「岩岩練舞練成點？」「唔錯呀」一路係度傾緊閒計，我就一路按住隻腳…
「樂盈你隻腳又出事？」麗晴係我耳邊問左呢個問題，刻意唔比佢地聽到。
「小事啫，應該係岩岩跳舞太用力，休息返一兩日應該冇咩事。」雖然係咁樣回復麗晴，但係我知道…如果我再咁用力去跳舞，隻腳遲早唔要得，但係我…
「下一站中間道」好快就到左我地目的地附近，所以大家落車，走向麥當當。
「不如係Deli and Wine算啦」大家好似心意已決，無論我同麗晴點講都唔聽。
「我地兩個去，唔好理佢地」好快就走左Deli and Wine門口，慢慢排隊入去。
「你隻腳真係冇事？，後日果堂駛唔駛請假抖下？」「唔好呀，我唔想老師有咩擔心，更加唔想依旋佢因為咁而內疚」好快就回應左麗晴嘅提議，而佢地亦都係五分鐘之後過黎搵我地…，嗯，佢地過黎係因為麥當當冇位而要一齊食飯。
「今日會唔會太多人」係個四人枱塞左成六個人，好彩大家都夠瘦唔會太迫…
「平安夜係咁啦，大家食哂飯不如去行下？，定係想倒數？」大家都沉思緊呢個問題，直到十分鐘大家都未有決定，但係我地背後已經有幾個姐姐等緊位。
「不如去誠品行一陣再諗下點？」其實我地今次出黎嘅目標只係想聚埋一齊…
就係咁我地好快就行左去誠品書店，大家都各自分散去睇書，嗯咦，出左啦？
「姐姐睇緊咩？」依旋呢個妹妹一直都係我隔離一齊睇書，直到見到梁望峯嘅著作，望左幾眼都唔錯，但係諗起屋企個書櫃…，唯有等佢有電子書再買…
叮叮…，不如一陣去倒數囉？」離倒數仲有成兩個鐘，你地捱唔捱到咁耐呢？
「冇問題，但依旋係度喎」我一邊復一邊望住隔離嘅依旋，點知佢打緊電話…
「阿哥，我想同姐姐倒數埋先返，應該唔會遲過一點返到黎，我求下你啦，好啦，做下好…」佢地嘅對話越黎越細聲，因為依旋不知不覺已經行遠左…
「嗯，錫哂你88」差唔多五分鐘嘅時間依旋先慢慢走返黎，好似已經傾掂數。
「冇問題呀，但倒數完要即刻返屋企」依旋甜甜笑咁望住我，而大家都冇問題，所以係誠品睇到差唔多十一點就落左去天星碼頭附近，幾乎人貼人咁行…
「大家唔好走散呀」就算芝詩咁樣講，我地六個人其實越行越遠，只有依旋拖住我隻手先一直係一齊，直到大家倒數完係地鐵站口等齊人先慢慢上車離開。
「嘩，下年真係咪搞我，好攰呀…」大家一路傾一路禁電話，直到睇到片文…
「咦，係天使咖啡店喎，不如搵日一齊去試下？」睇到地址係尖沙咀同沙田，所以大家快快手約左下個禮拜一齊去試下，嗯，咦，有愛情諮詢服務喎。
「姐姐你睇緊咩？」「愛情諮詢，不如你問我呀」係我肩上訓著左嘅依旋唔知咩時候醒左，亦都比佢望到我睇緊呢樣野…，一直到我屋企樓下都不停煩住我…
「你實幫住你阿哥嘅，我先唔信你」係依旋走果刻先咁樣同佢講，而佢就若有所思咁行返自己屋企，我就同芝詩兩個愎慢行返屋企…，倒數完真係好攰…
「阿女你冇野呀嘛？」「冇事，只係有少少攰，我訓醒就冇事」好快就同爹地媽咪講聲晚安就去左梳洗訓教…，叮…叮…叮，手機嘅聲音不斷響起，十一點？
「我訓左咁耐架啦？」係個心度問著自己呢個問題，之後就落左樓食野……
「樂盈」突然聽到麗晴嘅聲音，好快就同左佢去食晏，又傾到愛情呢個話題。
「你話好唔好星期四去果陣問下小詩姐姐？」個貼文度寫住愛情諮詢，而眼前呢位姊妹有著同樣嘅煩惱，所以大家一直傾一直傾，直到餐廳轉左下午茶牌…
「好啦，星期四去果陣再問下姐姐，我走先啦」同麗晴講左再見之後就係度深思，如果有個男朋友係身邊會唔會比較好？，佢會唔會好鍚我，會唔會就我？
慢慢行到返屋企，再望下日子…，嗯，聽日先要再排練，不如拉下筋同溫書？
「下學期會教呢啲，嗯嗯…」一路望住教科書下學期會教嘅野一路係房度拉筋，直到電話響起，咦，係易愛嘅電話喎，呢個時候佢唔係去左補習架咩？
「盈盈你依家得唔得閒呀？」「得呀，我拉緊筋炸嘛」「不如出黎玩呀」聽聽下背後就發現芝詩同樂愛都係度…，咦，麗晴把聲都係度，四姊妹想玩咩呀？
「好呀，你地係邊」問左佢地真實位置之後就即刻換衫出去，目的地係旺角。
「搞咩你地黎旺角？」「行下街掃下街咁啦」一路傾果陣發現麗晴好似有心事…
「麗晴你冇事呀嘛？」「下…，Er…」口窒窒嘅麗晴，係呢個時候係最有可疑。
「芝詩，你地想去邊？」「我地都係四周圍行下，你有地方想去？」「不如我同麗晴去行下，有野想搵佢比下意見…」就咁帶走左麗晴，同佢慢慢咁返荃灣。
「做咩呀傻妹」係條街度一路行一路同佢傾住計，發現佢細細聲咁喊出黎…
「冇事冇事，我係度」唔通麗晴未到星期日四就已經受情傷？，定係比人…？
「樂盈呀，係唔係所有男仔都係咁衰，開頭仲對我好好，咩都覺得我係最好，但依家…」佢一路講眼淚就一路流，之後仲比埋佢地嘅對話內容我睇，嘩…
「BB豬，不如一陣去食XXX囉？」「BB，要唔要呀」一開始仲係呢D對話，慢慢開始，就算麗晴Send咩過去都好，只會得番「嗯」「哦」「好」嘅回復。
「我地嘅關係好似淡左好多…」「之前你唔係考慮緊拍唔拍拖，原來係煩惱緊同佢嘅野，差啲比你呃左」突然諗返起之前同麗晴一齊傾嘅野，真係比佢呃左。
「咩喎，我咩都冇講，係你覺得我同你一樣炸」「咁…」由開解麗晴到最後兩姊妹係荃灣海傍打情罵俏咁玩，一直到差唔多傍晚時份，屋企人嘅來電而終止。
「喂爹地？」「嗯嗯嗯，我一陣出黎搵你地」好快就收左線，今晚又係尖咀食。
「係唔係要出去？」「係呀，陪左你返屋企先，行啦」同麗晴慢慢咁行到佢屋企樓下，我就行去巴士站，一路上諗起之前同佢一齊嘅事情，但大多數都係苦…
「甜嘅係有一兩件，但係…」「尖東站」巴士上慢慢廣播出黎，一起身就見到…
「佢係巴士站嘅…」真係日頭唔好講人，影天就咁岩企左係巴士站度等巴士…
「樂盈？」「Hi」我地兩個一直咁對望，好似呢個世界得番我同影天兩個咁…