由青梅竹馬開始: 勤的突襲

勤主動邀請琪琪今晚再吃頓飯。但琪琪早就約好了父母是晚回家晚飯。勤沒有放棄:“等你食完飯見個面傾幾句得唔得?”琪琪既然也不是要對勤決絕，就應承了他。
 
晚上九點多，琪琪離開父母家，就打電話給勤說可以見面了。勤說不如在附近的麥當勞見面。琪琪就先走到麥當奴坐下。在等待勤的時候，琪琪想起這間麥當勞的意義。當初兩人拍拖時，就是在這間麥當勞一起打暑期工賺拍拖的開支。過了這麼多年，餐廳裝修不同了，運作模式也與以前有很大變化。但琪琪仍然記得以往曾經在哪個角落和勤甜言蜜語過、在哪個地方和勤親吻過。
琪琪在一張二人檯坐了幾分鐘，勤就趕到。勤甫坐下，琪琪就問：”你有乜想講呀？我尋日話要諗下個喎。”
 
勤：我知、我知。
琪琪：咁你又咁急搵我？
勤：有……有啲野醒起想同你講呀嘛。
琪琪：做乜好似咁緊張咁？
勤：唔……琪琪你記唔記得我地喺度返過工？


琪琪：記得。
勤：估唔到周圍啲舖頭差唔多都變晒，呢間麥當勞仲喺度。
琪琪：證明佢真係賺好多……
勤：香港變左好多咁……
琪琪：咁呢個必然啦。全世界都不停咁變。有啲野好左，有啲野差左。喂你唔係想同我研究香港經濟……
勤：唔係唔係……
琪琪：咁講正題啦。
勤：ER……咁你覺得我同你有冇變到？
琪琪：咁多年……有可能冇變過咩？
勤：唔……但有啲野其實冇變。


琪琪：咩意思？
勤：你喺我個心入面嘅地位冇變過。
琪琪：我唔係唔鍾意你咁講。但係我唔係細路女，你咁樣講我唔受架啦。
勤：唔……
琪琪見到滿臉通紅的勤低著頭，就語帶溫柔地說：”我唔係話你呀。唔好咁。將來無論點，我肯定你喺我個心入面都會有好重要嘅位置。但你真係要俾啲時間我諗清楚，或者俾啲時間我地再了解返對方。”
這時勤吸一口大氣，再在袋中拿出一個小盒。勤將小盒放在枱上並說：”送俾你！”感到有點愕然的琪琪問：”我打開佢得唔得？”勤點頭示意後，琪琪就打開小盒。小盒內有一隻戒指。琪琪正想問勤為何要送這厚禮，勤已搶白道：”我想話你知。我準備好娶你做老婆！”
琪琪的腦海這刻一片空白，完全不懂得應怎麼回應，只能拿著盒子凝視著勤，又留意著身邊的食客有沒有向他們報以奇異的目光。勤續說：”我唔係要你今晚答我。但係我想你知道，我真係想以後都同你一齊。我記得你以前講過想廿八歲結婚。對唔住我遲左。但係我真係準備好。”
 
開始回過神來的琪琪說：”你咁算係求婚呀？”勤回應：”算。但係你可以話考慮下先都得嘅。唔好一句REJECT我啦最好……”
琪琪仍然不知道應該怎樣回應。她真的有點感動，但又懼怕自己太衝動。她同時想起今早貓跟她說的話，於是內心開始傾向說”是”。不過她本來有的憂慮還存在，所以又覺得很難在此時此刻應承勤。勤見琪琪沒有回應，心裡其實很慌張，但仍然故作鎮定地說：”或者我今晚唔可以幫你帶起隻戒指佢。不如你收左佢先，再諗下先答我。好唔好？”


 
琪琪點點頭，隨口說了一句：”你求婚連花都冇架！？”勤即說：”等我半分鐘！”說罷勤就走出餐廳門口，再旋即捧著一束玫瑰回到琪琪面前。可想而之，這時有不少食客的注意力都被那束花吸引了。”琪琪料不到勤有此一著，即慌忙地示意勤坐下，以免他跪下來令全間麥當勞的人都望著他們。勤也遵從琪琪的意思坐下，再將花遞交給琪琪。