宇宙傳送門: 第一幕 1.0

現時夜晚六點零四分，我收工之後，係公司樓下搭車返屋企。

返到屋企附近，諗住買個外賣返去食。

係等外賣嘅期間，我拎個電話出嚟碌下。

電話畫面顯示標題「葵芳某便利店職員遭受殘忍殺害」，我好奇撳咗入去。

內容大概就係今日數小時前，該職員係當值期間俾一個男人用刀殺死，全身有多處刀傷，當場死亡。





凶手攞走咗一千蚊嘅現金，最後仲向閉路電視鏡頭嚟咗個會心微笑。該post仲公開咗當時閉路電視嘅部分片段。

正當我諗住打開條片嚟睇嘅時候，「28號～！」茶餐廳員工嗌號碼，佢打斷咗我。

我拎住自己張飛遞俾佢，我同茶餐廳員工一手交一手。 攞完飯轉身諗住行返屋企嘅時候，離我只有幾米距離企咗一個男人。 我望到佢個樣之後，呆咗一呆。

呢個男人驟眼望過去，年紀應該同我差唔多，重點係個樣同我生得好似，但佢高我一個頭，身型比例幾好，仲要眼大大咁。

佢完全就係一個靚仔咗又高大咗嘅我。





就係我望住佢，驚奇緊嘅兩、三秒之間，我發現原來我哋係對望緊。佢同樣都係望住我，但佢嘅表情同我唔一樣，係略帶啲笑意。

情急之下，我下意識地轉移咗視線。頭望向地下，拎住份外賣，迎面係佢旁邊快速咁走過。

行咗大約一分鐘，我聽到後面有道聲音傳過嚟。

「林日星？」

聽到之後，我停低咗，有人嗌我個名。我擰轉身望過去，就係頭先嗰個靚仔版嘅我。





「你叫我？」

「果然大部分都係呢個名。」靚仔版嘅我一路講啲莫名其妙嘅嘢，一路慢慢咁行近我。

「先生，先生，我唔知點解你會知我個名，都唔知你想sell我啲咩，但我全部都冇興趣，我趕時間，係咁先。」我冇諗住聽埋佢講落去，所以趁早就截停佢。

我轉身就嚟個急步走，諗住快啲擺脫佢。

係我行緊嘅期間，我諗返起佢頭先講嗰啲嘢。咩大部分都喺呢個名？完全估唔到佢會係想sell我啲咩。定係近期新興嘅一個邪教嚟？

「我諗你會對我講嘅嘢有興趣。」佢不知不覺間已經追到上嚟我隔離。佢用同樣嘅步速同我並肩行緊。

「喂！唉～你…真係…」我將右手放係心口位置，以表示我真係俾佢嚇親。

「我盡量簡短啲咁講喇，平行宇宙知道嘛？我就係其中一個宇宙嘅你」佢同我解釋。





「呀靚仔！啊唔係…先生，你唔好咁痴線啦，你再係咁煩住我就報警㗎啦。」我將食指都攞埋出嚟指住佢，再一次截停佢要講嘅嘢。

我又再轉身嚟個急步走。今次我冇乜聽到身後有啲咩動靜，睇嚟佢真係放棄咗啦今次。

「16歲嗰年！你老豆又係飲醉咗，照舊不停咁打你老母，踢佢吖，摑佢吖。」佢係後面大聲咁講。

我開始放慢腳步，最後停低咗係度。

佢冷笑咗一下之後用返正常嘅音量「當折磨完之後，覺得唔服氣，佢就擰轉個頭望向你。然後，又係分享嘅時間。」講完，佢抬起頭望向我。

佢知道已經成功攞到我嘅注意力「之後老豆就趴咗埋去窗口，唱晒歌咁係度。」佢行上前，企咗係我面前。

「經過長年累月嘅洗腦同折磨，理性嗰部分已經唔存在，特別係我哋。」





「個女人同你講，望住佢背影，佢差少少就會跌落去，少少，而你住22樓。」

「之後，你推咗佢落去。你，殺咗佢。」佢用平靜嘅語氣講。

我望住佢，盡量掩飾我驚訝嘅心情，因為佢所講嘅嘢，部分真係發生過。

我哋對望咗一陣，然後我開口先「我冇推佢落去，我更加冇殺過人。」雖然唔係完全啱，但點解佢會知嗰夜啲嘢？

佢點咗點頭「嗯～但點睇你都係同我一樣喎。咁你老豆仲係度？」佢右手搭咗落我膊頭度。

「我唔知！」係我揈開佢隻手嘅同時，攞咗個電話出嚟，打開數字鍵盤，入咗999。

「你唔知？即係佢走咗佬？咁你個所謂老母呢？佢仲在生嘛？我想見下佢，我嗰個已經死咗…」佢不停咁追問我。

我將入咗999嘅電話畫面擺咗係佢面前「我唔知你點查到我啲嘢出嚟。但，最後警告你！唔好俾我再見到你。」





係兩個人都冇再出聲嘅情況下，我同佢四目相對咁對峙，成個畫面就好似靜止咗咁。

十幾秒之後，佢打破咗呢個小僵局。

「Okay。」佢用從容不迫嘅態度嚟答返我，仲附帶埋個微笑。

我第三次轉身走人。行咗幾分鐘之後都真係冇聽到任何動靜，今次相信佢係唔會再跟上嚟㗎啦。

我擰轉頭望，果然，佢已經冇再跟上嚟。我原地深呼吸咗下，諗返起佢嗰個眼神…「呢區啲痴線佬真係多到呢～」真係心都寒埋。