宇宙傳送門: 1.2

現時夜晚七點四十八分，係我屋企有幾個人係度對峙緊。有我、有被脅持嘅我阿媽、有攞刀嘅痴線佬、同啱啱打咗999嘅李生。

李生撳完999之後，將電話放係耳邊。電話對面有把女聲傳出嚟嘅期間，李生望住個痴線佬，痴線佬都繼續睥住佢。

電話對面不停咁問有冇人，但李生仲未講到嘢。佢嘅面色有啲蒼白，睇嚟佢好驚。

李生擰轉身望一望我「放..放心，我幫你報警。」之後佢攞住部電話行咗出門口。

我好無奈，呢個李生係完全幫唔到忙。





「你聽我講，我唔知你發生過啲咩事，或者經歷過啲咩。但你絕對唔需要咁做，呢個唔係解決方法。」我重新將注意力放返係呢個危險人物嘅身上。

「你知唔知有一次，我以為係眼花，終於俾我見到佢係度笑。佢係恥笑緊我，佢係享受緊吖。」個痴線佬嘅笑容漸漸咁消失。

「於是就係嗰晚，我推咗嗰個男人落去。同一晚，我將呢個女人都一齊解決埋。」佢歎咗口氣咁講。

聽到呢度，我心跳嘅頻率已經達到咗前所未有咁快。我不斷咁問自己，我可以做啲咩，點算點算點算點算……

「嗰時我同樣都係用刀。一刀，兩刀，三刀，四刀，五刀，六刀…..唔知第幾刀開始我已經冇數落去。嗰刻，我知道，終於解放，終於自由！」佢皺住眉頭咁望向天花板。





我全身已經出緊冷汗。我諗我係知道將會發生咩事，但我仲可唔可以阻止到？

「同一晚，我先認清楚，真正嘅惡魔。」

「我求求你，放過我，殺.....」我媽話語未落，個痴線佬右手攞住刀向下拉，蓄力….

呢一瞬間，時間變得好慢，好慢。個痴線佬表情好用力，手背嘅青筋浮現。而我媽好似仲未見到佢下巴就嚟有把刀插上去咁，佢只係睇住我。

我嘅思緒好似違背咗常理咁，一秒內千萬種嘅情感爆發出嚟。我睇住我媽嘅表情…





刀尖到達下巴。

我，我哋咁難得可以重新開始。我都可以放低以前嘅嘢，我只係需要一個可以叫阿媽嘅人，即使只係得表面都好。

刀尖突破表皮。

仲以為我已經捱過咗地獄。

刀尖突破真皮。

唔好剩返我一個。

刀尖再突破埋皮下組織。血沿住刀身不斷咁湧出來。

個天係咪嫌我唔夠慘。





三分之二嘅刀身插咗入我媽個頭。

冇啦….，完啦….。

個痴線佬將啱啱插入去嘅刀再掹返出嚟。我媽七孔流血，一大堆嘅血灑到滿地都係。

「啊～～～～～～～～～！」時間正常咁流淌返，悲鳴聲由我把口叫出嚟。

我媽跪低咗半秒再瞓低係自己嘅血池度。

個痴線佬慢慢咁離開廚房，將把刀隨手揼咗係飯枱上面，而我亦都慢慢咁走向我媽。「唔好唔好唔好唔好……..」

我踩住我媽啲血，跪低慢慢抱起佢。





「媽….？媽….媽..？」佢已經係失去咗意識，但佢對眼仍然係擘到好大，就好似佢仲係望住我咁。

我捉住我媽隻手，啲眼淚開始走出嚟遮住我嘅視線，就好似叫我唔好睇咁。

我下意識望向嗰個殺人犯，佢背對住出面咁坐咗係窗口。

「殺過咁多次，呢次係最精彩。你知唔知點解？因為今次有你睇住。」佢滿足嘅眼神望住我空洞嘅眼神。

「差唔多要瞓醒㗎啦你。」講完呢句，佢背向式咁跳咗落樓。

我個腦一片空白….

周圍變得好靜，好似真空咁，一直到我媽隻手由我手掌內慢慢咁，無力咁，墜落。