宇宙傳送門: 1.5

現時凌晨一時零三分，我坐咗係屋企廁所地下，間離放咗個裝住暖水嘅膠盆，膠盆裏面有隻自我清潔緊嘅鴨仔。

「我叫你咩好吖？」我問隻鴨仔。

「……」

「點解你連叫都唔叫嘅？鴨仔唔會叫㗎咩？」

「……」





「你有冇屋企人？唉…睇嚟你同我一樣都係一個人，我啱啱就係出面失去咗我世界上唯一嘅親人……」我開始對住隻鴨仔講自己嘅身世。

「…..所以，我諗，我可能會變成嗰個痴線佬咁。」與其話係我帶隻鴨仔返嚟照顧佢，不如話係佢照顧緊我，我個心。

「如果俾我再見到個仆街冚家剷….」我望住鴨仔係盆裏面不停咁游，不停咁轉圈。

「圈圈，我以後就咁叫你啦，見你咁鍾意轉圈係度。但你係男定女？」

「…..」





「Okay..」我行出廁所，去咗房攞返套乾淨嘅衫褲。

我將而家着住嘅污糟衫褲除咗，用咗個垃圾袋裝住。然後去沖個涼，將身上面每個角落都洗乾淨，洗出嚟嘅水仲夾雜咗少許嘅血跡。

我同圈圈都沖完涼之後，我哋企咗係個客廳，環望周圍。

我將圈圈放低咗係梳化「我今晚真係唔想係度過夜。」

於是我攞部電話出嚟，打咗俾李浩朗。電話響咗大約二十秒。





「喂…，咩料吖？」對面應該係己經熟睡嘅狀態，夾硬俾我嘈醒咗。

「喂，sorry 吖我，我想請你幫我一個忙。」

「吓？幾點呀而家？….一點半！幫咩忙呀你要？」

「我可唔可以去你屋企過晚吖？」

「…..」

「喂？」

「無啦啦過咩夜呀？邊有人三更半夜先嚟問㗎？」

李浩朗係我最好嘅朋友，亦都係我唯一嘅朋友。我哋由中三識到而家，成個中學時期係得佢會主動同我講嘢，應該話係得我哋會同大家講嘢。





得到李浩朗嘅同意之後，我開始收拾行裝，攞咗啲必需品。出門口前我拎埋袋裝咗有染血衫褲嘅垃圾袋。

我落到樓下，將袋衫揼咗係大廈出面嘅垃圾桶。我都唔知係咪應該揼係度，俾人見到會唔會又報警㗎？我諗咗下，算啦就咁啦。

既然人係樓下，我兜咗個圈去睇睇嗰架貨van。架貨van仲未拖走，但周圍係封住咗嘅。

架車嘅狀態就正如頭先女重案電話裏面張相一樣。我企咗係度諗咗一陣，我係咪唔記得咗啲嘢。

「啊….圈圈。」原來我唔記得帶埋圈圈落嚟。

於是我帶住呢個唔好意思嘅心情去搭𨋢，到咗22樓，𨋢門打開，前面有個人很快咁走過，佢走咗去樓梯嗰邊。

我見到呢個人嘅反應就好似我今日第一次見到嗰個痴線佬咁，佢有啲似我。但我只係見到佢嘅側面，而且係佢行過嘅呢一秒幾我睇得出佢係一個女人嚟。





係𨋢門要閂嘅時候，我撳返個開門掣。一定係睇錯咗，咁短時間，又得個側面，加上我啱啱發生啲咁嘅事，敏感啲好正常嘅，係我多心啫。

入返屋之後「Sorry吖，圈圈。….圈圈？！」張梳化度唔見佢，房入面又冇，廚房又冇。

最後打開廁所門，原來係度。圈圈係廁所地下周圍咁行。

「你揾咩呀？個盆呀？頭先仲未玩夠咩？個盆…咦？」我講講下都發現個膠盆唔見咗，但我好似冇收埋到，定係我有？

「唔好揾啦。我哋走啦，聽日再俾你浸過啦好冇？」我冇等佢同意就一手抱起佢準備離開。

我係樓下截咗架的士，講咗地址俾司機聽。我見到個司機係倒後鏡用奇異嘅眼神望住我兜住隻鴨仔。

司機將我車到李浩朗樓下，落車之後我上到去李浩朗屋企門口諗住撳門鐘，但我費事嘈醒佢屋企人，所以我打算打俾佢，叫佢開門。

識李浩朗咁耐，都去過佢屋企幾次，但過夜真係第一次。我使唔使同佢屋企人都解釋下咩事呢？





呢個時候，道門打開咗，李浩朗出嚟。

李浩朗身高比我矮少少，大約1米65，身型消瘦，好似張紙咁，以前中學係傻下傻下咁，而家換咗個髮型反而係靚仔咗。

李浩朗見到我，隔咗幾秒之後第一句係「做咩攞住隻鴨？….我唔識劏鴨㗎喎。」

「圈圈唔係攞嚟食㗎。」我好認真咁答佢。

「….圈…圈？」李浩朗同個的士司機一樣嘅眼神。