宇宙傳送門: 1.16

現時夜晚七點三十二分，我同少女，仲有未完嘅晚餐。

少女聲稱留低太耐，各宇宙之間會有強制傳送。雖然我唔知咩原因我冇傳送到，但都好似嗰個的士司機咁，唔能夠保證個個都好似我咁好彩。

事情去到呢個地步，我已經唔知講咩好。

我哋再次夾起已經凍咗嘅餸菜，起碼都食飽咗先。

我同少女已經識咗幾日，但真正相處嘅時間就只有今日。然而，我哋對大家嘅認識都仲係好淺薄，但我已經開始對佢放低戒心。





終於食完嘅晚餐，我哋一齊執拾返啲碗碟。

「一齊洗啦。」幾日以嚟都係佢洗，雖然我都叫做供住供食，但畢竟今晚都最後一晚。

我哋分工咁洗，佢用洗潔精，我過水。

佢嘅心情明顯低落咗好多，明明幾個鐘頭之前，我先感受到佢心情好似好咗。

「呢度，係你去過嘅第幾個宇宙？」我見到佢完全唔講嘢，應該係諗緊聽日要走嘅事，所以想幫手轉移下佢嘅注意力。





「吓？我，如果計埋本身嗰個，今次係第五個。」佢突然好似俾我叫醒咗咁。

然後，我哋展開咗一個漫長嘅對話。由佢去各個平行宇宙遇到同發生嘅事，到我哋個人嘅喜好等等，不知不覺我哋傾咗幾個鐘。

我唔打個喊路都唔知，原來已經係凌晨嘅三點鐘。我哋連嗰個爛咗嘅蛋糕都已經食晒。就連圈圈都頂唔順，瞓著咗覺。

「你呢幾日係邊個位瞓㗎？」我問。

佢指住個梳化「梳化。」





我指住我媽間房「你瞓嗰間房張床啦。」其實應該一早叫佢入去瞓，我又點估到今晚會係最後一晚，佢又真係咁老實。

佢望住間房諗咗諗「嗯。我想沖埋個涼先。」

我不斷咁點頭，用手示意佢隨便「換咩衫你自己攞啦。我….入房，有咩你敲我門。」

「嗯。」

然後，我入咗房，閂埋門，瞓咗係張床上面。我自己個腦都係咁諗，我真係唔知佢本人會係咩感受。

如果我都有傳送嘅能力，我會唔會係為所欲為嗰啲人？呢刻個腦仲有好多嘢諗，睡意未算好大。

大約過咗15分鐘之後，我房門出現敲門聲。「哦？」

「係我。」係少女把聲。





「哦？..哦！做咩吖？」我即刻成個人彈起身，跳咗去門口。

我開咗門，少女企咗係門前，佢應該啱啱沖涼出嚟，頭髮仲係濕嘅，條毛巾掛咗係佢條頸度。

「做咩呀？」我問。

少女有啲唔好意思咁「聽朝，可唔可以陪我去今日晏就我講嗰間茶餐廳呀？」

「晏就間茶餐廳….，可，可以。」

「好。咁我唔阻你啦，早抖。」佢輕輕咁揮一揮手。

「早抖。」我望住佢入我媽間房閂咗門，我都閂咗門。我企係門後面諗咗諗，覺得自己好似忽然多咗個妹咁。





之後成晚我都冇乜點瞓過，瞓下醒下咁。到朝頭早，唔夠八點我就起咗身。

我出咗房，先去梳洗下，順便仲洗埋個頭。

過咗十分鐘，少女醒咗出嚟「早晨。」

「早晨。我嘈醒你？」

「唔係，係圈圈。」

吓？圈圈？圈圈係客廳地下自己同自己玩緊，不過我成朝都聽唔到啲咩聲。

「我哋行啦。」

記得尋晚佢有同我講過，尋日買完餸返屋企嘅路上，經過一間茶餐廳，係同佢之前個宇宙嗰間茶餐廳一模一樣。





「哦，好呀。」

「我哋食完呢餐早餐，就係嗰度講再見啦。」

我哋短暫咁對望，雙方都帶有可惜嘅情感。

「喔？」少女忽然驚嚇咗下。

佢指住咗圈圈「你睇下佢。」我都跟住望過去。

「佢放屁吖，粉紅色㗎喎。」少女指出。

由第一日見到少女開始，佢已經話聽到圈圈啲叫聲，然而我係咩都聽唔到。





今次唔太一樣，放屁聲我係冇聽到，但粉紅色我都睇到。

我哋帶住好奇又驚訝嘅心情，慢慢行近圈圈身邊。

圈圈就係客廳地下，而係佢身下腳邊圍住咗一團粉紅色嘅煙霧。

「粉紅色嘅？你確定係屁嚟？」我皺晒眉頭咁問。

「嗯…我的確係聽到放屁聲，噗！咁樣。」少女同樣係感到奇怪。

圍住圈圈嘅粉紅煙霧，開始慢慢咁散開。

「啊！又嚟啦。」少女再伸隻手指出嚟。

今次確實見到，粉紅色嘅氣體係由圈圈嘅屁股位走出嚟。

「好濃下喎，我哋係咪俾錯啲咩佢食呀？」

「吓？唔會呱。點食啲屁都唔會變做粉紅色呱。反正我係未見過。」

「…」「佢會唔會係第二個宇宙嘅鴨嚟㗎？」

「….有可能。」

「叮噹！咯、咯、咯！叮噹！」聲音由大門傳出嚟。

少女去咗開門，打開門之後，一把熟悉嘅聲音「喂！我都係唔放心你。你知唔知你樓下有人極光…………..啊～～～～～～～～！」