宇宙傳送門: 1.23

現時夜晚九點五十九分，皮膚掂到就會生紅瘡嘅泡泡來襲醫院。

大家都由窗口望落去。「比想像中矮，應該可以。」

「快，攞晒啲布過嚟。」家姐指揮。

呢個病房最多嘅就係布，被、床單、窗簾、遮簾、枕頭套。唔使全部用晒，綁埋做一條繩，放出窗口，如無意外就可以輕鬆掂到底。

於是大家二話不說，開始動工整呢條救命繩。





「要check清楚啲結係咪綁實晒。」家姐提醒。

救命繩已經完成。中間綁嘅結，我哋仲用咗啲醫生紙膠布再綁咗幾個圈去加固，咁就萬無一失。

「大家準備好未？唔知出面會唔會有嗰啲泡泡，所以笠好個垃圾袋。」

家姐將條救命繩綁實係個窗框，一切逃生準備就緒。

李浩朗負責係窗邊拉住條繩，做個雙重保障，所以佢最後一個走。





我哋唔知條繩可以承受到幾多重量，所以每次一個，逐個逐個走。

家姐打頭陣，第一個落去做接應。

「小心吖。」李浩朗叮囑。

家姐笠好個垃圾袋，企上個窗邊，背向出面咁捉住條繩，小心翼翼咁落去。

佢大概用咗五分鐘，就由三樓安全咁落到地下。見到佢成功，我哋都好放心。





然後第二個落去嘅係我，參照返家姐個方式咁落去應該就冇問題。我捉實條繩，雙腳踩牆撐住自己，一手換一手咁慢慢移落去。

到而家為止，成個逃生計劃都幾順利，同埋醫院嘅外圍都好似冇嗰啲泡泡。

嚟到二樓嘅我，並無異樣，只要唔心急，大家都可以安全離開。

不過呢個時候，我感覺到條繩好似有啲動靜，我望上去，透過半透明垃圾袋我見到有個人爬緊落嚟，應該係李浩朗。

點解我都未落完，李浩朗就開始落嚟嘅？上面係咪發生咗啲咩事？有人撞入房？

過咗兩秒，笠住個袋都可以見到，三樓窗口發緊光，而且係好光，光源覆蓋咗成個窗口。

極光？呢個時候？係要傳送走啲咩定有嘢傳送過嚟？

「星~，快呀！」李浩朗係我上面大嗌。





唔理佢咩都好，而家我同李浩朗都吊咗係半空，又唔知條繩承唔承受到，要盡快落咗去先。

過咗幾秒之後，樓上三樓間病房嘅玻璃窗全部爆開咗，巨響環繞周圍。大量嘅玻璃碎片散落。

我望上去，見到原本嘅窗口位有一大堆嘢湧出嚟，就好似一個打橫噴嘅火山口咁。

湧出嚟嘅嘢，噴出咗幾米之後，隨即係空中漂浮、散開。

笠住個半透明垃圾袋嘅我忽然睇得幾清楚，係一大堆嘅泡泡。之所以睇得清楚，係因為我個垃圾袋有一條短嘅𠝹痕，應該係啲玻璃碎𠝹開咗。

我即刻耷低頭，唔係等陣接觸到啲泡泡。

不過，好彩啲泡泡噴遠咗，我哋幾乎係貼住牆，理論上啲泡泡漂過嚟之前我哋都仲有啲時間。





我同李浩朗立即加快速度，呢個距離直接跳落去都仲係有啲高，希望呢條救命繩可以頂多陣，唔好斷。

但禍硬係不單行，我經過二樓窗口嗰陣，二樓有人開窗，想執我哋雞。

「借嚟！」總共有四個人搶住爬出嚟，條救命繩因而左右搖到仆街。