宇宙傳送門: 1.29 第一幕 結幕

現時朝頭早九點三十分，十四日嘅強制隔離終於結束。

我同李浩朗搞完啲手續嘢，係醫院大堂等埋佢家姐。

家姐同另一個目無表情嘅女人一齊出嚟。呢個目無表情嘅女人我認得係嗰晚我孭走嘅另一個受害者。

然而，等家姐嘅人唔只得我哋，仲有幾個差佬。

家姐佢哋同差佬講咗十分鐘嘢，我同李浩朗係一邊等。





家姐話冇提及到我同個叔嘅嘢，只係話我同李浩朗孭走咗佢兩個出去。

個垃圾場嘅CCTV只係影到我出入間房，間房裏面係冇CCTV。

如今個阿叔都死咗，佢嘅屍首都難以辨認佢嘅身份，知道係佢做嘅相信只有我。再者當時情況咁混亂，都難係CCTV去追尋佢犯案前嘅行蹤。

係佢哋溝通嘅期間，另一個受害者嘅眼神同我有短暫嘅接觸。

我唔知佢知唔知道我孭咗佢出去，我更加唔知嘅係佢而家嘅感受。





佢表情呆滯，由佢嘅眼神係完全閱讀唔到任何嘅感情。佢只係望住我，令我懷疑佢當時係咪唔想我救佢。

佢哋交談完咗，家姐返嚟我哋身邊，班差佬只係帶走咗嗰個只剩低軀殼嘅女人。

我哋經過十四嘅隔離，終於重見天日。但出到嚟外面，薄霧仍然依舊。

「好似濃咗喎啲霧。」李浩朗伸隻手出嚟係空中亂掃。

唔知係我哋之前係上面望嘅角度問題，定係李浩朗講啱咗，啲霧的確比起前兩日睇落濃咗啲，而且仲好濕。





「你老豆老母唔嚟接你哋嘅？」我問。

「我叫咗佢哋屋企等得啦，咁大個人。你呢，星妹唔嚟接嘅？」李浩朗笑住咁周圍望。

「你有個妹㗎咩？」家姐係隔離聽到，好奇一問。

「啊…唔係。係有個咁嘅人啫。」係喎，家姐好似都仲有好多嘢未知，再係咁落去，終有一日會同佢講清楚。

「大家今日都係唔使返工係咪？發生啲咁嘅事，聽日都仲係要返工真係…..，有車。」李浩朗同家姐上咗架小巴，呢架小巴可以直接到佢哋屋企樓下，但唔經我屋企，所以大家要分開走。

家姐臨上車前拍一拍我手臂，用返平時冷酷嘅語氣「睇路呀。」

佢究竟係想關心我定係想警告我㗎？普通就咁叫我小心啲唔得㗎咩？

但去到今時今日，我知家姐係想關心我嘅，只係佢表達得奇怪啫。





過多五分鐘，我都上咗架巴士，我揀咗上層嘅窗口位嚟坐。

原本諗住望下啲街景，享受一下短暫嘅平和。不過周圍都係霧，遠少少嘅景都已經望唔清。

車窗玻璃同頭先隔離間房嘅窗口一樣，鋪滿咗水珠。

兩滴小水珠相遇，合體變做大水珠，一齊向下流走。我由望街景變咗做望水珠。

望望下水珠我先醒起，唔知嗰兩個重案有冇瀨到嘢。又好似冇聽到佢哋嘅消息，頭先醫院大堂都唔見有佢哋，應該都凶多吉少。

可能係因為大霧嘅關係，馬路上面嘅車都行得比較慢。我坐咗三十分鐘車程，係屋企附近嘅車站落車。

返到屋企樓下，好似成個月冇返嚟咁。但係落咗車之後，氣溫好似比起醫院嗰邊暖咗啲。





係大霧之中，都大約可以見到一個熟悉嘅身影由大廈門口出嚟。

係隔離單位嘅李太，佢大住個肚咁拎住兩袋嘢。我上前幫手拎，順便打個招呼「早晨。」

「早晨吖細佬。喔，唔該。好耐冇見你喎。」

我幫李太拎一拎佢嗰兩袋嘢，係兩袋空嘅玻璃樽嚟，仲幾重下。今日平日，李生應該返工。

「喔，係吖。上次個排骨好好食，嗰個食物盒陣間攞返俾你。」

「啱啦啱啦。我今晚整沙茶牛肉呀，你今晚過嚟拎啲啦。」

我將兩袋玻璃樽揼落去回收桶「喔….好呀。」

感覺上係我媽死咗之後，李太對我嘅態度親切咗好多，其實唔只係李太，李浩朗同家姐都係。我失去咗最重要嘅人，曾經以為我嘅世界就只有屋企人。





我同李太一齊行入𨋢「仲有幾耐預產期呀？」

「四月吖。你估下男定女？」李太笑住，輕輕咁用膊頭撞向我。

而家企得咁近睇，其實李太好似比我想像中仲後生。

「嗯～女仔？」

「唔係。」

「原來係男仔。」

「都唔係。」





「….龍鳳胎？」

李太怕怕羞羞咁笑住點頭，雙手摸住自己個肚。

「恭喜晒。」咁啱部𨋢已經到達22樓。

「記得今晚過嚟拎吖。」李太入返自己個單位。

今次係第一次同李太有五分鐘以上嘅對話，俾我感覺佢都幾少女。

我都去返我個單位，準備開門。原本應該空無一人，得四面牆同一隻鴨嘅屋企，我都覺得有啲空虛。

但係而家唔同，呢道門後面除咗圈圈之外，仲有一個人等我返屋企。

諗起第一次見佢，同樣都係而家呢個位置，嗰時冇諗過屋企有佢，會有呢個感覺。

我開門入去。

「喔，你返嚟啦。」少女係面前歡迎我。

「嗯。」我以微笑回應。