現時晏就十二點四十三分,我同圈圈一齊嘗試去開解心情沉重嘅李海嵐。

以我嚟講,因為我確定知道已經失去咗,所以我先至有選擇,去接受,去面對,去逃避定係淡忘,有選擇先會有機會可以向前行。

相反,家姐佢哋面對嘅係失蹤,係不確定性。呢種嘅煎熬又係另一個折磨。

家姐摸住圈圈個頭,我見到佢眼眶泛紅,感覺上佢仲係度扮緊堅強。

「極光人,會唔會可以返嚟?」家姐問。





「我都唔知,但我覺得唔係冇可能。」如果平行宇宙之間可以互相傳送,咁理論上應該可以傳送返嚟。

「….」家姐輕輕咁點頭「你食咗嘢未?」

「出嚟之前食咗少少,但我都有啲餓。」

「咁我哋食咗嘢先。」

我拎返個保温袋出嚟,家姐截住「收返佢啦,而家咁熱,我抱住佢先。」





睇嚟家姐應該都感受到,圈圈隱約有種安慰人嘅力量。

離開街巿,繼續行走,揾間餐廳去食個晏就飯。

行行下,家姐嘅表情有啲疑惑「我記得附近應該唔係咁,有好幾間舖頭都係未見過。」

再行多幾分鐘,沿途一間餐廳都冇,我哋又熱又爆晒汗咁。好彩路經有間報紙檔,我哋買多咗幾枝水,原本帶出嚟嘅水已經一早飲晒。

如果有間7仔,都可以入去涼下冷氣。





係停低休息,補充返水份嘅期間,我揾一下呢條街嘅名,牌上面寫住嘅係一個連家姐都冇聽過嘅街名。

家姐話佢完全認唔出我哋而家嘅位置,於是我就諗住GPS下我哋係邊。

「嗯?上唔到網喎。連一格訊號都收唔到。」我嘗試打俾李浩朗,果然係失敗。

之後,我電話直頭顯示為No Service添。

家姐都拎電話出嚟睇「….我都係。」

我問下頭先報紙檔個阿叔「唔該,想問下你收唔收到訊號吖電話?」

阿叔係度整緊佢部收音機「唔好話手機訊號,我收音機都收唔到呀而家。唉,仆街….」

冇得上網都算,唔係太大影響,但而家連電話都打唔到,即係同李浩朗佢哋冇得聯絡,再雪上加霜嘅係,我哋連自己目前嘅位置都唔清楚。





家姐向我搖一搖頭,表示佢都完全打唔出。冇諗過只係過咗兩個鐘頭,就遇到最壞嘅情況,兩方失去咗聯絡。

「定係先沿路返去街市嗰邊先?我哋頭先好似係一直路咁行過嚟。」我指住我哋過嚟嘅嗰條路,如果返到去街市,應該就可以認得路。

「嗯,係直路行過嚟。好,先行返去先。」家姐抺一抺汗,抱返起圈圈。

最後決定先沿路折返,免得愈走愈遠,愈嚟愈迷路。

沿路折返嘅路途中,好彩周圍嘅建築物都係同頭先嚟嘅時候一樣。

見到有印象嘅景物,個人都放心啲。如無意外,一路行過去就會見返頭先個街巿。

一路上,都見到有一、兩個途人,佢哋同樣係收唔到訊號。問佢哋呢度邊到呢,佢哋都係迷咗路。





而家呢個情況,都係由強制傳送引起嘅?

「咩聲?警報鐘?」我突然聽到警報聲音由前面傳過嚟,迷霧一時阻礙咗我哋嘅視線。

頭先我哋問嘢嘅其中一個途人行係我哋前面。

然後,我哋嚟到警報聲嘅源頭,係一間珠寶店嚟。

我哋前面嘅嗰個途人,企係間珠寶店前睇緊發生咩事。

我哋都睇下間舖頭咩料嘅同時,舖面一塊大嘅落地玻璃忽然爆開咗。

隨住玻璃嘅爆開,衝出嚟一個錘仔,旋轉嘅錘仔高速咁飛出嚟,一直線擲向反應唔切嘅嗰個途人,擊中佢嘅頭部,隨即倒地。

唔好話個途人反應唔切,我哋都反應唔嚟。然而嗰個凶手係唔會乖乖地咁等我哋消化好。





一個身高大約有一米九嘅男人係珠寶店嘅正門走出嚟,佢拎低副眼鏡,用外套嘅手䄂抺一抺,再抺埋塊面嘅血跡。

呢個男人行前去瞓係地下嘅途人身邊踎低,執返起個錘仔,望住抽搐緊嘅途人,目無表情,係佢件衫上面抆走錘仔上面啲血。

然後個男人托一托眼鏡,望過嚟我哋度,頭側埋一邊「喔?」

除咗佢殺人,我同家姐仲詫異嘅係呢個男人個樣。

「佢係咪…?」家姐問我。

「係。跑啦。」唔使特別思考都可以判斷到呢個男人又係另一個平行宇宙嘅我,而且又係一個不懷好意嘅我。
已有 0 人追稿