宇宙傳送門: 2.11

現時凌晨三點五十九分，我係一間超巿嘅倉庫遇到一個戴面具又拎住把刀嘅男人，佢威脅我要將圈圈留低俾佢。

「我哋都幾鍾意鴨肉㗎～」面具男用刀指住圈圈。

呢個面具男，係呢個咁嘅時期載戴住個面具都知佢唔會係個好人，而家仲要拎住刀嚟要脅我要留低圈圈。

當然，我唔會放棄圈圈啦，圈圈仲要繼續做我嘅傾訴對象。原本諗住逃避打鬥，但而家係避無可避。

不過問題係面具男拎住把刀，如果係赤手空拳都有啲機會。唔單止咁，佢仲企咗係唯一嘅出口隔離，想就咁走佬都要同佢打過先。





「仲諗乜撚嘢吖？有咩咁難吖？隻鴨你養大㗎？」面具男嘅語氣變得唔耐煩。

係我不停尋求解決方法嘅同時，圈圈係我懷中開始掙扎，然後走甩咗，跳咗落地，跑咗去右邊個冷藏室嘅方向。

「圈….」

「喔！咁心急想俾我食呀？」面具男即刻跑咗去捉住圈圈條頸，將佢成隻咁抽起，圈圈腳踢翼拍咁係度掙扎

「放低佢先。」





「哦。原來識講嘢嘅，即係你頭先係玩鳩我？」

我冇時間去諗啲咩策略啦，佢已經捉住咗圈圈。

不過我諗住衝過去同面具男展開搏鬥之際，右邊嘅冷藏室傳出嚟一啲動靜。

半掩嘅冷藏室傳出某啲器皿跌落地嘅聲音。呢度仲有其他人係度？冷藏室意外嘅聲音，打斷咗我同面具男嘅對峙，我哋同時望向冷藏室裏面。

面具男距離間冷藏室比較近，於是佢先係鬆開咗圈圈，再小心翼翼咁打開冷藏室嗰道半掩嘅門。





冷藏室入面仲黑過呢度，面具男好似唔知望到咩咁，一路注視住入面，最後甚至乎唔當我係一個威脅，自己先行咗入去。

面具男入咗去之後，我諗住抱起圈圈就走佬，但點知圈圈都行咗入去。

我於是乎拎起地下嘅電筒，跟埋入去間冷藏室。入到去一照，我前面一米嘅距離係個面具男，再前三米嘅位置有一隻嘢係度進食中。

呢隻嘢彎低身係度食緊地下嘅一個人，一個女人。呢個時候，我醒起頭先個透明石頭人講嘅老婆，會唔會就係地下嘅呢個內臟出晒嚟嘅女人？

前面呢隻進食緊嘅生物終於知道我哋嘅前來，佢起身，伸直成個身，我嘅視線一路跟住呢隻嘢個頭向上升，佢嘅身高有成個人咁高，仲高過我。

呢隻生物擰轉個正面過嚟，而家可以知道佢應該係蝙蝠嗰類嘅生物，但佢係成身都冇毛，只有全身皺摺，肉色嘅皮膚。

巨型肉色蝙蝠雙眼全黑色嘅瞳孔，圓碌碌咁望向我哋，佢成口都沾滿紅色嘅血。不過，佢見到我哋嘅反應同我預想嘅相反，佢並冇任何特別嘅反應，只係望住，頭傾向一邊咁。

呢個時候嘅面具男嚇到坐咗係地下，巨型肉色蝙蝠暫時放棄咗佢腳邊嘅食物，緩慢咁靠近面具男。





面具男開始向後爬「啊！唔好埋嚟吖！」佢迅速咁轉身想跑向門口，可惜佢撞到我右腳，一下仆咗向門口，閂咗門。

我俾面具男撞到向後跌，同樣坐咗係地下。面具男不斷想開門出去，不過冷藏室呢道門入面嘅開門方式同出面嘅唔一樣，慌張又忙亂嘅佢一時之間開唔到門「仆街～！」

電筒再次跌咗係地下，但光線依舊照向隻蝙蝠。隻蝙蝠都仲係冇乜特別反應，好似對我冇咩攻擊性，我覺得佢只係對我哋好好奇。

隻蝙蝠唔係啱啱先食緊個女人咩？見到我哋又點解唔攻擊嘅？唔通個女人本身已經死咗，唔係佢殺嘅？

電筒照射到嘅唔只係隻蝙蝠，仲有一隻鴨係佢腳下，係圈圈。

巨型肉色蝙蝠同圈圈雙眼對望，圈圈可能緊張咗少少，打咗個冷震然後再放咗個屁，粉紅色嘅氣體由圈圈嘅屁股釋出。

粉紅氣體向上升，然後巨型蝙蝠將呢啲氣體吸入。大部分嘅粉紅色氣體都走咗入蝙蝠嘅鼻窿入面。





見到呢一幕嘅我皺咗眉頭，係動物之間都會咁做，定係呢隻蝙蝠鍾意咁？

吸入咗啲粉紅氣體之後，隻蝙蝠個樣同身體都開始變得奇怪，全黑色嘅瞳孔逐漸變成紅色，口中嘅獠牙稍為變長、變尖，肌肉嘅線條同青根都變得明顯。

巨型肉色蝙蝠由好奇嘅視線轉為凶狠，咬牙切齒咁對住我，然後向我發出一聲咆哮，一聲刺耳又帶有攻擊性嘅咆哮向我衝過嚟。

巨型蝙蝠隨即向我撲過嚟，坐咗係地下嘅我用雙手接住咗佢嘅雙翼並且捉住。

蝙蝠用佢尖銳嘅獠牙向我個頭起勢咁發動攻擊，我雙手唔夠力量去阻擋佢嘅攻擊，於是我收起埋對腳，踩係蝙蝠嘅胸口撐住，我用晒四肢去撐住佢唔好咬我。

用埋對腳嚟撐住之後，雖則可以暫時擋住隻蝙蝠嘅攻勢，但始終我都係處於劣勢，捱唔到好耐，而且隻蝙蝠嘅利爪亦都抓到我嘅手腕出晒血。

於是，我將身體向左側，連同我捉住嘅蝙蝠一齊側，之後趁佢有少少失平衡嘅時候，再用盡大髀力將佢踢開去一邊。

踢甩咗隻蝙蝠之後，我短暫咁望一望個面具男，佢竟然仲未開到道門。





巨型肉色蝙蝠唔使兩秒就企返起身再次向我發出咆哮。