宇宙傳送門: 2.14

現時朝頭早十一點十三分，我同家姐係尋人嘅路上，遇到一棵識郁嘅肢體樹。

肢體樹上面嘅每一隻手都係度向我哋揮手打招呼，我哋睇到呆呆地之餘，都有禮貌咁揮返佢手。

覺得太神奇嘅我哋，行近作進一步嘅觀察，其中一隻適當高度嘅手向我伸出，表示要握手。

我係度心諗呢棵樹只有手，又冇眼，係點知我係度？

我見棵樹應該冇乜惡意，於是我都伸手同佢握手。我隻手一握落去，的確係人手嘅觸感，但都係好似有啲怪怪地，發覺有啲痴笠笠嘅觸感，呢種程度應該唔只係手汗咁簡單。





我鬆開手嚟睇返，心諗唔會呱…？然後擺上個鼻聞一聞，絕對冇錯，係人嘅精液嚟…….

我立即拎一包紙巾出嚟，用晒成包紙巾去抺乾淨我隻手。然後我見到家姐都正想伸手出去握，我就即刻捉住佢隻手，阻止佢。

以最下層嘅手嚟講，呢個高度都真係可以配合返普遍香港男人條嘢嘅高度。

然後，肢體樹唔再揮手，開始用手做出各式各樣嘅手勢，有舉中指嘅、有心心嘅、仲有啲係完全睇唔明嘅手勢。

「手語嚟㗎？」





「好似係。」

感覺上肢體樹係度用手語嚟表達緊啲咩，可惜我同家姐都睇唔明手語，所以唔能夠解讀佢想表達啲咩。

睇嚟呢棵肢體樹唔單止有意識，而且仲有智慧。

呢棵樹應該唔係外星嘅生物，畢竟佢係由女性人類嘅手組成，又或者外星人個樣可能同人類嘅外表係一樣。

既然同唔到肢體樹溝通，我哋唯有離開呢個廣場，繼續周圍探索。





可能係因為極光人嘅原因，途路上可以遇到嘅人幾乎係少之又少。

其中，我哋遇到一對父女，一個爸爸拖住大約只有五至六歲嘅女仔，個爸爸見到我哋之後非常之警惕，即刻抱起咗佢個女，行快兩步咁離開咗，都真係唔知佢哋經歷咗啲咩。

跟住落嚟嘅幾個鐘頭，情況都係差唔多，幸好地而家為止都冇遇到啲咩危險嘅情況。

我哋準備要去揾今晚瞓覺嘅地方之前，再次遇到一個令人嘆為觀止嘅奇物。

係一個充滿迷霧嘅城市當中，出現咗一艘巨大嘅木船，呢艘船成個船身嘅材料都係由木頭嚟製成，大小約係半艘遊輪咁大，雖然我冇親身見過遊輪。

巨大嘅木船霸佔咗幾條街，只有十幾米闊嘅街道根本唔夠呢艘木船去棲身，周圍嘅樓宇俾木船侵蝕咗咁。

木船嘅結構唔係一般木船咁有桅桿同帆，船嘅甲板上面係一間大嘅木屋，而且船身嘅形狀係接近正方形。

暫時呢艘巨大嘅木船俾我嘅一種感覺，佢就好似創世紀入面嘅挪亞方舟，雖然我都冇睇過創世紀。





巨大木船嘅周圍佈滿咗藤本植物，有部分嘅木頭已經係腐爛咗，船底嘅位置亦都充滿咗海洋污損生物，硅藻、藤壺、牡蠣、貽貝之類。木船睇落已經有一定嘅歷史。

我哋面向嘅呢一邊冇任何嘅入口，於是我哋就兜咗去另一邊。

木船嘅另一邊有一個巨大嘅入口，門嘅高度應該有三米，可能再高啲，高到令我覺得呢艘船係挪亞方舟嘅可能性又大咗。

我哋經由接駁上大門嘅木板行上去，嚟到呢道門前，門嘅重量由我哋兩個人嚟開根本就冇可能。

正當我係度可惜緊冇得參觀呢艘充滿奇蹟嘅船之際，家姐係一邊趟開咗一道門「你…要自己過嚟睇下先得啦。」

家姐開嘅係道大門右下角嘅細門，應該就係設計俾人入嘅入口。原本道門應該係入面先開到鎖。但啲木都腐爛晒，所以有冇鎖都唔成問題。

我行過去，望咗一眼入面，再望返出面。





「我都唔知應該點講出嚟。」

我望完一眼隻船嘅內部就明白家姐想講啲咩。入面完全係另一個空間嚟。