宇宙傳送門: 2.18

現時仲係凌晨唔知幾點，我身邊暫時冇鐘可以話俾我知時間。

輪到我嚟睇水嘅時間，我先係個池塘浸咗個浴。然後我嚟到小型瀑布底，諗住沖下，點知唔小心向後仆，嚟到一個瀑布後嘅山窿。

山窿裏面有道同呢艘木船格格不入嘅門。我能夠可以係呢個漆黑嘅空間睇到嘢，都係多得呢道門。

面前係一道鋼門，門上面有一條條藍色光嘅坑，門嘅右邊有個門抦，對比起呢個咁高科技嘅發光鋼門，呢個門抦實在太普通。

除咗個門抦，門上面咩都冇，連一個鎖咗冇，密碼鎖又冇，生物識別鎖又冇，鎖匙窿都冇。唔通就咁可以開，咁兒戲？





見到呢道高科技門亦都解答咗我之前嘅問題，呢艘船啲空間並唔係魔法嚟。不過，又多咗個問題，所以呢艘唔係挪亞方舟？定係根本挪亞方舟就係一種高科技？

如果呢道門仲係發緊光，係咪代表呢艘船仲未荒廢？

我諗咁多做咩？打開呢道門咪咩都知。

於是我伸手捉住個門柄，左推右拉，試盡所有嘅方向都郁唔到佢。唔好同我講呢道其實唔係門嚟。

呢個時候，道門開始有反應，門上一條條嘅藍光開始全部漸漸咁變成紅色。我唔知發生咩事，但紅色就點都係代表唔好嘅嘢。





我企咗係原地，靜咗幾秒之後，我感覺到有啲微微嘅震盪。側邊嘅泥牆開始有啲樹根生出嚟，意識到自己奶咗嘢之後，我馬上離開呢度，走返出去個瀑布外面。

成身都仲係勁濕嘅我，唔理得咁多，着返好啲衫褲，執返起仲係池塘度嘅圈圈。

微震開始慢慢變強烈，我亦都留意到天空嘅星星同月亮全部都唔見晒，變晒做一連串冇規律嘅數字。

果然呢片天空係假嘅，就係一個巨型嘅曲面螢幕。

曲面螢幕出現同個山窿一樣嘅情況，有樹根突破個螢幕生出嚟。





我正諗住去叫家姐出嚟之際，佢已經開咗門出嚟「咩事吖？」

地面都開始有樹根生出嚟，如果家姐遲多十秒出嚟就大件事，因為木屋嘅屋頂已經有幾條特別粗嘅樹根突破咗出嚟。

屋頂嘅粗樹根一路向上伸，直至衝破天花板嘅螢幕，而且仲不停咁變粗，最後間木屋俾樹根撐爆埋。

「我，可能係掂咗啲唔應該掂嘅嘢。」

「吓？你亂搞啲咩嚟呀？」

「走出去再講啦！」我捉住家姐隻手，跑向可以通往其他空間嘅木門。

地面嘅樹根越嚟越多，越嚟越粗，令到路面不單止凹凸不平，亦斷開幾層咁。我哋需要左閃右避地面嘅障礙之餘，仲要留意上面跌緊落嚟嘅螢幕碎片。

嚟到木門嘅附近，木門一早已經俾啲樹根吞噬咗。而家我哋所知嘅兩個出口都已經冇咗，可以話係籠中鳥、網中魚。





就算一路避，一路跑，都只係同一個空間，唔會有出口。啲樹根亦都好殘酷咁不繼生長，完全唔俾時間我哋去諗辦法，唔俾空間我哋去站立。而且，仲有好似升緊上去嘅體感。

不過，呢啲樹根嘅目標感覺唔係我哋，疑似係要將呢個地方摧毁。

再咁落去，我哋最後只會被活埋係度。

「而家都仲有一個方法…」

「用你嘅能力？」

唯一一定可以出到去嘅方法，就得返我自己，我嘅極光能力。

「但你都控制唔到。」





最後嗰兩次發光令我大概可以估到，應該就係心跳加速。而家我面對呢個必死嘅險境，我嘅心跳已經加快咗唔少，不過仍然係未開始發光，應該係未夠快。

「火機。」我望住家姐講。

「吓？我個火機？」

我將圈圈交俾家姐抱住，然後我兩手伸出去捉住家姐兩邊嘅膊頭，雙眼望實家姐。

加速啦，我嘅心跳。我將家姐拉近，擁抱家姐。

「…？」

過咗兩、三秒，但係都冇乜反應，於是我放開家姐。

「咩料吖你？已經痴咗線啦？」





「唔好意思啦家姐，剩返最後一個手段啦。」

之後，我錫咗落去。