宇宙傳送門: 2.20

現時朝頭早嘅唔知幾點，我強制啟動咗我嘅能力，帶家姐同圈圈逃離咗被樹根吞噬嘅木船。

事隔一夜，再次回歸充滿迷霧，又濕又熱嘅街道。我全身赤裸，家姐係後面半裸嘅狀態。

唔使兩日，我哋嘅物資再次回歸於零，係連家姐嘅背囊都冇埋，係木屋度出嚟嘅時候咩都冇攞，現時係真正嘅一無所有。

我行係前面，家姐行係我後面，應該…..。大家係揾到衫着之前都盡量避免對話住，儘管我哋有好多嘢需要講出嚟，而且相信家姐都對我有上千個疑問。

大約無言咁行咗二十分鐘左右，我哋發現咗一間救星舖頭，係一間賣西裝嘅舖頭。





我同家姐各自着咗條西褲同恤衫出嚟。幸好呢間嘢都有埋皮鞋，雖然唔啱Size又唔舒服，但總好過赤腳行路。不過，呢間舖頭就冇水或者食物可以俾我哋拎走。

終於唔係赤裸相對嘅我哋，睇個氣氛好似係要俾家姐盤問。

我整理好手袖口，時不時望下家姐嘅面色。呢下我留意到家姐嘅衫領冇反好，我要唔要伸手幫佢整好佢呢？

我伸個手指出嚟，指住自己嘅衫領，俾咗個眼神家姐。家姐留意咗之後，反好佢個衫領。

大家都整理好裇衫之後，家姐望住我，我又望住佢。





「你要唔要講下點解要咁做？」

「…因為，因為冇其他方法。」

「你係知道一定會成功？」

「我大約知道個觸發條件。」

「就係要錫我？」





「..啊…咁又唔係。係心跳嘅速度。」

「…..」之後家姐只係望住我。

「Okay」

「吓？」

「Okay我話。但下次唔係你想錫落嚟就錫。」

「？」

「我會。」講完之後，家姐開始向前行。

嗯？即係點？講完啦？仲以為我哋要進行一場辯論添。所以家姐係唔想我做主動？而且佢又點解唔問我錫佢嘅原因？





老實講，冇拍過拖嘅我，唔好話溝女，我連同女人相處嘅方式都唔清楚。

咩都唔識嘅我追咗上前，打算同家姐坦白從寬。

「我需要心跳加速先可以用到我個能力，而你就係可以令我心跳加速嘅人，因為….因為，因為我有啲，鍾意你。」

剛才呢個係我人生第一次表白，一講完之後瞬間後悔咗，做咩要係呢個時候嚟講啊～～？！

「….」家姐又再只係望住我。

我扮晒淡定咁望返佢，但心裏面係吶喊咗出嚟。

「我知。」





「？…你知？」

「你，好明顯。太易明。」講完之後，家姐再次向前行。

又轉身走？講完啦又？即係又咩吖？我幾冇經驗都好，都知道我再追問落去唔係咁好。

「但我真係咁明顯咩？」我細細聲咁問圈圈。

「…」圈圈連望都唔望我。

我於是默默咁跟住家姐繼續行。我不時觀察住家姐嘅反應，諗住應該點化解呢個尷尬嘅局面。

「我哋水..揾…我哋係咪要揾水先吖？」

「嗯。」家姐停咗落嚟，擰過嚟面對住我。





「我望住你嘅時候，我只係見到一個小弟弟….」

「…..」睇嚟，我對家姐嚟講都唔算係一個男人。

「….目前為止。」家姐笑咗下，然後一拳打咗落我心口「所以你要好～努力先得。」

「啊…」正常呢啲時候，唔係應該只係細細力打一下㗎咩？點解家姐係完全唔就下力㗎呢？呢下真係打到我濁親。

「做咩吖？太大力吖？」家姐過嚟好擔心咁拍我背脊，諗住幫我順下條氣，但佢連拍我背脊都唔識得就力。

「唔好….（咳）夠..（咳）停…」

雖然家姐又唔識就力，又成日係關心人嘅時候講埋啲奇怪嘢，但我都鍾意。





而且，家姐叫我努力，即係代表我有機會？

我諗我已經揾到係呢個亂世生存嘅希望。呢一刻，好幸福吖我。