宇宙傳送門: 2.30

舊時林日辰細個嘅時候，嗰日佢老豆第一次帶嗰個女人返嚟，嗰個孕育惡魔嘅惡魔。

跟住落嚟係由林日辰所講，佢過去嘅嘢：

失去咗母愛冇耐之後，連父愛都離我而去。當時嘅我好需要別人嘅關懷，任何人都可以。

而嗰個女人正正就係我脆弱嘅時候，出現咗係我面前。

呢個女人由第一次見面就對我好親切，佢話俾我聽「由而家開始，你唔再係一個人。」





呢個女人不斷咁同我講，佢就係我嘅親生阿媽，當時我年紀又細，加上年月嘅洗腦，我就咁到十幾歲為止都認為原本嘅親生老母就係佢。

呢個女人重新俾到温暖我，令我覺得我唔再孤獨，我係有人愛，我係阿媽個仔。

唔使好耐，老豆就同佢結埋婚。就算唔結婚，我都已經叫緊佢「媽咪。」

半年之後，飲醉酒嘅老豆開始打嗰個女人，每晚都打，我有嘗試去阻止老豆，但我一個細路哥可以做到啲咩。

就係呢個時候，個女人漸漸開始變咗做另一個人。





係我九歲嗰年嘅一晚，個女人俾老豆打完之後，佢過嚟同我講「辰吖，你愛媽咪係咪？」

「嗯。」

「咁你要幫媽咪分擔痛楚。」

之後，佢就開始打我。

「呢啲就係你老豆俾你嘅痛楚，唔係媽咪打緊你，係你老豆打緊你。」





佢一路打我，一路逼我講一次頭先佢講嘅嘢。

我一邊喊，一邊講「係老豆打緊我。」

「你要記住，呢個世界，你就得返我一個，你要保護媽咪，知嘛？你講一次。」

「….嗯….媽咪，好痛吖～」

「講吖！」佢大力咁摑咗我一巴。

「…呢個世界，我就得返媽咪一個，我要保護媽咪。」

「乖仔。」佢抱住我講。

就係咁，每次個女人俾老豆打完，佢就會重複以上嘅程序，將佢嘅痛苦傳遞俾我，然後又要我重複佢講嘅嘢。





久而久之，長期嘅洗腦令我得到嘅概念就係呢個世界，我就得返媽咪一個，得我可以幫佢，我要保護佢，老豆就係惡魔。

之後嘅日子，個女人只係變得愈嚟愈奇怪。有一次，佢帶咗隻老鼠返嚟，叫我係佢面前用刀殺咗隻老鼠，雖然有啲唔願意，但最後我都照做。

然後下一次，係一隻啱啱出世嘅猫，我照做。成年嘅流浪貓，我照做。麻雀仔，我照做。成年嘅流浪狗，我照做。

時間耐咗，次數多咗，我亦都習慣咗，用刀殺動物對我嚟講已經係冇乜感覺。

時間嚟到十六歲嗰晚，個女人被毒打完，用眼神示意我入房，我乜都冇講就自動入房，準備同佢分享痛楚。

個女人又再開始對我拳打腳踢，每一下都係模仿返老豆點樣打佢。

「而家唔係我打緊你，係邊個吖？你答我。」





「…..係老豆…」

「冇錯。..啊…哈…哈哈。」

一路以嚟，每一次，每一次，每一次我都係老老實實唔還手，任佢打。因為我一直以為我係幫緊佢。

但係，今次我終於聽到，聽到佢嘅笑聲，佢嘅恥笑聲。

「哈哈….哈哈哈…..」

我係被暴打嘅期間，無意咁見到個女人嘅表情，佢個惡魔嘅笑容。呢個人係，係度享受緊。

結束之後，我諗起啲恥笑聲同佢個惡魔嘅表情，開始懷疑自己所相信嘅嘢，開始質疑呢個女人。

呢個時候個女人捉住我，指向趴係窗口嘅老豆。





「佢爭少少就會跌落去，少少…」個女人叫我推老豆落樓。

我慢慢咁行前，靠近老豆嘅背影，兩手一伸，推咗佢一下。

老豆身體向前傾，係完全跌落去之前捉住咗個窗框，成個人懸掛咗係窗口出面。

「啊…啊…拉返起我…」老豆對住我講。

咁多年嚟，呢個男人對我嘅無視，當我唔存在，知道我俾個女人虐待都冇理過我，冇幫過我。佢根本冇當過我係佢個仔，所以佢都唔係咩好人。

於是我無視咗老豆嘅請求，反而係伸手，幫佢逐隻手指咁鬆開，最後望住佢由廿二樓跌落去。

「哈哈哈……」個女人係側邊拍晒手掌咁歡呼。





我默默無言咁轉身去廚房，拎咗把刀，嗰把平時用嚟殺小動物嘅刀。

「辰吖……」個女人見我拎咗把刀過嚟。

「一直以嚟，當正你係我親生老母。」

「你做咩吖？」

「但你就當我玩具咁玩。」我手握住把刀，慢慢靠近個女人。

「你講咩吖？晨吖，我係媽咪吖，你要保護我㗎。」

「你收嗲！」

「你殺埋我，你就永遠都得返你一個！」

「本來就已經係。」我手起刀落，一刀斬落佢膊頭。

「啊～辰吖..，仔吖！」

一刀，兩刀，三刀，四刀，五刀，六刀…..唔知第幾刀開始我已經冇數落去。嗰刻，我終於解放，終於自由。