宇宙傳送門: 3.2

現時凌晨十二點十九分，我哋四個終於嚟到郭俊言同一班面具人嘅所在地，係一個荒廢咗，有五層高嘅樓宇。復仇之戰即將展開。

目前要對付嘅面具人總共有十個人，我哋有三個人同一隻鴨，其中嘅我同林日辰先算係戰爭力。

林日辰有一定都戰爭力同經驗，而且佢係不死之身，加上佢話會保護我，所以有啲咩就可以拎佢嚟做擋箭牌。

我自己嚟講，都叫做非正常人，加上然人嚟做我嘅遙控器，都算係一個有用嘅能力，假如配合得好嘅話。

至於然人，作為一個起能力者，佢嘅戰力係個未知之數，但畢竟佢都只係個細路。





係荒廢嘅樓宇門口前，有一個完全瞓著咗嘅人做看門口。

迷霧同黑暗成為咗我哋嘅掩護，只要安靜咁前進，就可以完成一場完美嘅暗殺。

林日辰係毫無商量底下，自己一個打咗頭陣。

係呢個環境底下，我想嗌佢都嗌唔住。於是我都揸實手中嘅兩把刀，深呼吸咗一下，叫然人跟係我身後，尾隨住林日辰去開始呢場突襲。

當我小心翼翼咁行到嚟門口前，已經見到林日辰踎低，揞住個看守人嘅口部，而個看守人嘅下巴已經俾林日辰插咗把刀入去。





個看守人原本瞓咗覺，都擘大咗眼，流住血淚，然後漸漸咁瞳孔放大。

林日辰慢慢咁放低佢，再抽返把刀出嚟，然後向後轉身，望住咗我。

我見到呢一幕，一時之間呆咗係度。唔係因為我見到死人，亦都唔係因為我見到殺人，而係見到林日辰用同樣嘅手法殺死呢個人，就好似嗰晚佢殺死我媽咁。

我望住瞓係地下，流出大量血液嘅陌生人，變得啞口無言，個身仲有少少抖震。

呢條仆街係咩事？佢係特登係我面前咁做嘅？





「呢層冇其他人啦係咪？」林日辰眼望住我，但佢條問題就應該係問然人。

「呢層冇啦，三樓以上先開始有人….」然人夾係我同林日辰兩個嘅對峙中間，本身冇乜表情嘅佢都略顯難受，連佢都感受到我同林日辰之間嗰股衝撞嘅氣流。

我慢慢咁將個視線由嗰死人移到去林日辰嗰對凌厲嘅眼神。

絕對係。佢呢個眼神話俾我聽，佢絕對係特登嘅。

我同林日辰之間嘅氣流就好似凝固咗咁，如果有人經過都應該會窒息。

我除咗死魚咁眼望住林日辰，我做唔到啲咩。如果而家嚟同佢搞大件事，就只會變成危機，危害個復仇計劃。

我唯有係啞忍林日辰嘅挑撥，俾佢繼續前進。

「心跳一下子升太快，你要冷靜落嚟，唔係會好麻煩。」然人同我講。





我合埋眼，抬高頭，吐出長氣「呢個我諗要你幫下手。行啦。」

我好似暫時忘記咗林日辰本身就係一個痴線佬。

「其實佢都只係一個受過傷，唔肯長大嘅人。」然人搖咗搖頭之後跟住行。

唔肯長大嘅人…..，我冇去深究然人呢個形容詞，但林日辰絕對唔係一個好人，亦稱唔上係徹底嘅壞人….？畢竟佢又真係救咗我同家姐。

我開始諗唔明林日辰嘅目的係咩，令我有啲質疑自己同佢合作嘅呢個決定。

究竟俾林日辰留係我同家姐身邊，係咪一個危險嘅決定？