宇宙傳送門: 3.7
現時凌晨唔知幾多點，復仇之戰即將進入最後勝利，敵方剩低嘅就只有喪失戰意嘅郭俊言，因為係佢面前嘅，係連子彈都殺唔死嘅我。
喪失戰意嘅郭俊言並唔係我注意嘅對象，而係佢手上把槍。
郭俊言嘅危險警告已經解除，佢同把槍都唔再係一個威脅，但我都想試下我能力嘅範圍。
我隔空注視住把槍，把槍同我右手同時出現極光。
把槍由郭俊言手上消失，再由我右手手掌慢慢咁伸出嚟，我成功將把槍傳送咗嚟自己度。
我本人係有啲驚喜，我大概知道自己可以傳送其他嘢出嚟，但從來都唔係我自己可以選擇，如今我成功可以傳送我想要嘅嘢，唔多唔少都有啲興奮。
相反，郭俊言已經唔會有咩特別嘅反應，睇嚟佢真係放棄咗。
「你究竟係咩人….？」
我冇諗過竟然可以由郭俊言眼神當中，感受到佢嘅絕望，嗰個以前就已經打橫行嘅郭俊言。
「你想要啲咩？….報仇？吓？你諗清……..啊！～」
我係郭俊言求情之前就開咗一槍，射中佢右邊大髀「唔好意思，我同你一樣冇乜耐性。」
郭俊言撳住佢嘅右邊大髀，跛下跛下咁向後退「啊～～～等等等等…..你聽我講先，你有………」
呢個時候，我嘅目光俾右手邊嘅物體吸引咗過去，完全聽唔落郭俊言講嘅嘢。
頭先一到達呢一層，就略略見到右邊角落嘅巨型異物，但由於昏暗嘅環境，同埋需要集中精神係頭先嘅生死鬥爭當中，我根本就冇餘力去留意呢個異物係咩嚟。
然人係我身後走出嚟，佢一手抱住圈圈，一手拎住電筒，照向右邊嘅異物。呢下可以確認，係一個恐龍頭插咗係呢層嘅窗口。
照咁睇就應該係暴龍嚟，但唔係普通係現今博物館可以見到嘅恐龍化石，而係有肉，仲有…毛？
棕色嘅毛覆蓋晒所有表皮，尤其係眼眉同嘴角嘅位置特別濃密。
呢隻恐龍頭同我所認知嘅完全唔一樣，而且我都唔知係咪暴龍嚟，甚至乎可能唔係恐龍嚟。
但點都好，呢個頭應該係死咗，如果要醒都一早醒咗，唔會有威脅，只係令我有啲好奇。
「……你睇。」郭俊言指住個死恐龍頭「而家呢個咁嘅世界，有你嘅能力，加上我，我哋可以一齊做呢個時期嘅王者。」
呢個時候，郭俊言嘅說話先慢慢開始入我耳。
「……」
「吓？點吖？星仔….可以為所欲為喎…我哋兩個。」
「……」
「我睇得出你同我，係同一類人。」
「….我的確唔係一個好人。」我重新將視線移到郭俊言身上，槍口繼續指向佢。
「係囉。呢個世界，唔會容納到好人，從來都係。」郭俊言開始露出微小嘅笑意，覺得自己仲有一線生機。
「冇錯。為所欲為，聽落都幾爽。」
「係咪呢～？哈，你同我…」
「砰！」我再向郭俊言開多一槍，今次係佢左邊嘅大髀，諗住平衡下佢右邊嘅痛楚。
「…啊！～我屌你老母！」
兩隻腳都中槍嘅郭俊言，已經冇能力企係度，佢挨住窗口邊坐低咗。
「林日星～！你諗清楚，你一個人….一定生存唔到。」郭俊言開始變得面青口唇白，講嘢仲愈嚟愈冇力。
我放低咗把槍「邊個話我係一個人。」然後執起地下其中一把斧頭，轉身嘅時候見到然人望住我「唔想睇嘅，暫時擰轉面先。」
「我唔係細路仔。」然人好冷淡咁答我。
「你需要嘅…係我，我先…幫到你….。」郭俊言仲未放棄說服我。
我拎住個斧頭，行過去郭俊言身邊踎低「你會唔會唔太清楚而家嘅情況？」
我指嘅係地下嘅六具屍體，仲有奄奄一息嘅郭俊言佢自己「而家，你先係剩低嗰個，你先係生存唔到嗰個。」
郭俊言用唔甘心嘅眼神怒視住我，但並冇再反駁我。
「你記唔記得，我係7仔同你講過嘅嘢？」我捉住郭俊言隻右手放係地下，然後攤開佢每隻手指。
「……」
「我話，要你死十次。」
「……」
「由你右手手指公開始，每過十秒我就斬一隻。」我用斧頭對準郭俊言個右手手指公。
郭俊言開始掙扎，郁身郁勢，但都係無力嘅反抗，於是我就事不宜遲，手起斧頭落。
「啊～～～～」
由於郭俊言不停咁郁，所以我第一下斬入咗好多，但冇完全斬到隻手指公落嚟，所以我馬上補多刀，徹底咁斬咗佢隻手指公落嚟。
「啊～～～～～屌你老母…..」
「10、9、8、7、6…….」聽住郭俊言嘅慘叫聲，我都開始進入十秒嘅倒數。
係呢一刻，我覺得自己好似有啲陌生。冇錯，郭俊言呢種人係需要剷除，但而家我咁樣，係要為咗李太報仇？定係為咗我自己….？
係我斬嘅期間，我諗返起郭俊言由以前開始對我做過嘅所有嘢，再望返佢而家生不如死嘅表情，我有種…難以言喻嘅快感。
「….1。」今次係食指，一刀就斬斷。「10、9、8…….」
如是者，我斬到去中指，郭俊言已經變得冇乜反應。斬完手指尾，我諗郭俊言已經係暈咗，失去咗意識。
我亦都停止咗倒數，既然郭俊言都冇咗意識，咁我繼續斬落去都冇意思。
我諗呢個時候嘅我，已經有啲走火入魔。
我，鬆開唔到我嘅拳頭，放唔低把斧頭。
我望向然人，然人由頭到尾都拎住個電筒，係後面幫我照住。於是我諗咗一陣，抺一抺額頭啲汗，然後問然人「用你嘅超能力，應該可以叫醒佢吓話？」
「……….可以。但你真係有呢個必要咩？」
「咁你幫我叫醒佢。」我無視咗然人嘅問題，可能係俾復仇嘅快感掩蓋咗雙耳。