宇宙傳送門: 3.9

現時凌晨唔知幾多點，我差兩隻手指就完成對郭俊言嘅承諾，但呢個時候，傷痕纍纍嘅林日辰重新出現，隨後嘅仲有兩個平行宇宙嘅我，疑似係兄妹。

「嗯～～，就係你唔肯放我哋走？」性感林日星問我。

「我唔知你哋講咩。」

「雖然唔知咩事，但你仲可以留係度，就代表你唔係正常。」花劍佬指住我講。

「點解你唔諗下，唔正常嘅係你哋。」





假設大部分平行宇宙嘅我都係差唔多嘅成長背景，咁佢哋之所以可以開始傳送，就係因為死亡，大概由佢哋自殺開始，所以佢哋都類似於林日辰咁扭曲，咁變態。

除咗少女林日星之外，每一次出現另一個我，都係要喊打喊殺，個個都心理唔平衡，唔正常嘅係佢哋先啱。

諗到呢度，我突然覺得….，定係其實我都係同佢哋差唔多？頭先我對郭俊言所做嘅嘢，係出於咩嘅心態？報仇？防患未然？定係殺人嘅慾求？

唔係唔係唔係唔係！我同佢哋唔同，佢哋殺人係隨機，根本就係滿足私慾。而我，只係懲罰惡人，出於保護嘅心態。

我做得冇錯…..，我冇做錯。





「而家留係度，強制傳送繼續加速，然後世界末日，大家都係度等死。到時呢個宇宙好大機會就會滅亡。」性感林日星講。

「…..」

「到時，其餘人全部死晒，剩低我哋呢啲”死極都死唔去嘅人”，死完復活又再死，變成無限地獄。」性感林日星嘅表情隨住說話嘅內容變化，眼神放出些少嘅殺氣。

「…..」結果又係兩個喊打喊殺嘅。

「你唔走嘅話，大家都走唔到。」





「……」

「你唔係咁自私唔救自己人吓話？」對面兩個林日星已經擺出戰爭姿態，一場意料之外嘅打鬥將要展開。

頭先我開槍射完郭俊言就將把槍放低咗係地下「你哋憑咩咁肯定殺咗我你哋就可以走…？」於是乎我舉手伸向地下把槍嘅方向。

我嘅計劃係想將把槍傳送嚟自己手上，一嚟係想展示出我嘅能力，嚟個下馬威。二嚟，有把槍係手就應該可以避免到不必要嘅麻煩，直接結束呢個回合。

在場嘅所有人都望住我伸手指向地下把槍，現場氣氛突然變得凝重。

對面兩個林日星都一頭霧水，完全唔知我要做啲咩，但同時都保持住警戒。

我集中所有精神，個腦諗住要傳送把槍俾自己。然而，時間默默咁經過咗十秒，只有寂靜嘅氣氛，並冇出現任何嘅極光。

我就好似一個中二病患者咁，隻手用晒力，爆晒青根咁對住距離自己三米嘅物體進行零作用嘅超能力。





我無助咁望向然人，然人都表示無奈「應該要….練習下。」佢細細聲安慰我。

無奈地，我只可放低自己嗰隻尷尬嘅手，然後嘆一口氣。而家俾唔到個下馬威都算，仲留咗個傻仔印象俾人。

呢刻，我嘅雜念變多咗。新嘅生死鬥隨時展開，而地下把槍係我嘅勝利關鍵，率先搶到把槍就大機會成為贏家。

現場可以戰爭嘅就得我，然人已經確定唔係一個戰力，屬於輔助型，而嗰隻林日辰就已經係同死人冇分別。

由此，造成現場一打二嘅情況，所以我更加需要把槍。

而家把槍稍為近我多啲，只要我郁一下，對面兩個就會跟住一齊行動，所以嘢都會發生係電光火石之間，如果我搶唔到把槍，就會陷入苦戰，好大機會被殺死。

緊張嘅氣氛蔓延到整個空間，一滴汗珠由我額頭流出，呢滴汗隨住地心吸力嘅帶動，沿住我嘅面頰一路流到下巴，直到離開我嘅身體，滴落地面。





呢一滴汗就好似一下警號咁，開啟咗呢場打鬥嘅序幕。我拔腿就跑向把槍嘅位置，雀腳助我一腿之力，全力跳向把槍。

對面兩個林日星係我其中一舊肌肉開始郁嘅時候，就已經有反應，馬上行動，過嚟想阻止我拎到把槍。

我空中橫飛，撲向把槍，盡量伸長隻手，距離掂到把槍就只有二十厘米。

不過呢個時候，我伸出去嘅嗰隻手開始偏離正軌，我嘅身體向內彎，腹部出現劇痛，一股力量重創係我身體嘅中心位置。

花劍佬原來一早已經係我要掂到把槍之前就到達咗我身邊，然後一腳勁射，踢向我個肚，於是我受到反作用力，成個身體向內彎。

花劍佬成功阻止咗我，仲俾佢一腳踢埋咗一邊。

點解個個平行宇宙嘅我都咁好打，咁敏捷？

咁樣一嚟，我不戰而勝嘅希望破滅，注定陷入苦戰。