宇宙傳送門: 3.12
現時仲係凌晨,奇怪嘅吸血人忽然出現,然後做出一連串意義不明嘅行為,原來係為咗吸我哋啲血。
然後,我終於揾到方法去抗衡呢個狀態,當呢個空間嘅所有嘢都懸浮係半空,吸血人開始吸血嘅時候,我一個人單腳抓實地面,睥住嗰個吸血人。
武器!我需要一把刀去殺死個吸血人。雖然冇然人嘅幫助,但我都盡量嘗試去用我嘅能力,將空中漂浮緊嘅一把刀傳送到我手上。
根據返頭先嘅經驗,每次懸浮嘅時間其實都唔會差好遠,體感上大約係五分鐘左右,呢五分鐘足夠俾我去刺殺個吸血人。
我集中精神,向目標嘅刀伸出手,要記返起頭先成功使用能力嘅感覺。
果然,冇然人嘅幫助底下,並唔可以隨心所欲,隨時隨地咁傳送。
但係而家係緊急狀態,我要把握時機,我要傳送,我要把刀……
呢個時候,似曾相識嘅感覺出現,目標嘅嗰把刀出現極光,傳送要開始,但係我身體出現極光嘅位置竟然係右邊膊頭。
我可以感覺到膊頭有啲嘢係度,有啲唔屬於我身體嘅嘢係度。
眼見時間一點一滴咁流逝,吸血人感覺上應該就要完成呢一round嘅吸血,同時可以刺殺佢嘅時間窗口亦嘅愈嚟愈細,而我嘅右邊膊頭只係傳送出個刀柄,仲有個刀身未出嚟。
旋轉結束,懸浮解除,馬上帶嚟嘅會係雙倍嘅地心吸力。無時間啦!係呢個狀態形成之前,我隻雀腳奮力一跳!
雀腳帶動全身躍起,隨即我左手伸向右邊膊頭,及時奮力抽出整把仲未完全傳送出嚟嘅刀。
吸血人接近落地嘅狀態,我嘅身體嚟到吸血人嘅上空,雙手握緊刀柄,刀尖朝向吸血人,再利用雙倍嘅地心吸力,重量同速度都加倍,刀尖就好似高速嘅跑車,無情咁插向吸血人嘅天靈蓋。
係雙倍地心吸力嘅加持下,我就好似人類踩螞蟻咁,輕鬆地一刀插入個吸血人嘅頭頂,成把刀連同我自己對手都插咗入去佢個頭。
吸血人個頭成個爆開咗,咩角度睇佢都係必死無疑,吸血人嘅威脅就此解除。
我努力咁將雙手抽返出嚟,一大堆血跟住我對手噴出嚟。
我都冇力企起身,成個人攤咗係個吸血人屍體嘅隔離。
我嘅呼吸慢慢咁緩慢返落嚟,然後我舉起雙手,放係自己嘅雙眼面前。
「…..」呢對手好陌生,一對沾滿鮮血嘅手。
啊….係喎,危機並未有完全解除,仲有一個。
我再次起身,行向花劍佬嘅身邊。眼見花劍佬奄奄一息,狀態比我仲差,如果由得佢應該唔使好耐就會死。
花劍佬緩慢咁將視線移到我身上,但佢應該講一粒字都辛苦,只係集中係呼吸上。
嗯~都係唔得,嚟到呢個地步,唔做都做咗咁多。於是我彎低腰,執返起頭先把刀,再坐咗係花劍佬身上面。
花劍佬嘅心口因為有我嘅重量,呼吸變得更加困難。佢嘗試用拳頭錘落我小腳,但力道不足,根本連我嘅注意力都攞唔到。
我左手捉住花劍佬塊面,右手揸刀,刀尖放係佢嘅太陽穴。
花劍佬係我手掌低下發出微弱嘅叫聲「嗯…..嗯…」
我抬高頭,將我嘅視線遠離花劍佬嘅眼神。
係郁手之前,我問咗自己一個問題「…我做緊咩…?」
刀尖由花劍佬嘅太陽穴插入,呢個時候嘅佢都仲有一、兩下嘅掙扎,但兩、三秒之後,花劍佬再冇任何嘅動靜。
我仰天長嘆,抬頭只有一塊石屎天花板,咩都冇。再過幾秒,由眼底照過嚟一道極光,花劍佬被傳送。
就係尋晚,我先同自己講,為咗捉住重要嘅人,我必須要作出取捨,剷除威脅。
但我到底捨棄咗啲咩?
復仇計劃正式結束,眼前嘅威脅都已經全部解決,周圍都回復寧靜。
我起身,望向窗口,迷霧之間滲透着微弱嘅陽光,估計已經到咗朝頭早。
由醫院嗰次開始,我對於奪取他人嘅性命好似冇乜點猶豫過….
定係…殺人根本就係我嘅本性?就好似其他平行宇宙嘅我…..?
我望向然人,佢並冇動靜,於是我行近,檢查完佢嘅呼吸、脈搏,我鬆咗一口氣,佢只係暈咗啫。
仲有圈圈都並無大礙,睇嚟然人保護得佢好好。
我望住然人塊面,仲有佢面上刮傷嘅傷痕,我諗我可以回答到我頭先問自己嘅問題。
我係保護緊人。
「嗯….我係做得啱…」
我將然人孭係背脊,單手托住佢,盡量彎低條腰,唔俾佢跌落地,我另一隻手再抱起圈圈。
我嘅身體比我想像中仲要頑固。
我哋終於可以返去家姐身邊啦。