宇宙傳送門: 3.14

現時應該係中午時分，我同然人企咗係一個單位嘅門口，就係我哋之前借住嘅嗰個單位。  如果唔係我自己迷路，其實返到嚟嘅路線好近，加上有然人嘅帶路，只需要十五分鐘左右就到達門口。  回程嘅道路上，幸運地，並冇遇到特別嘅問題，只係然人間中會望向身後，露出疑惑嘅表情，但佢口講就話冇事。  途中，我同然人進行咗都幾多對話，由佢口中或多或少都得到啲情報。  首先，我問然人點解會同林日辰一齊行動。佢答我話因為林日辰救咗佢一命，所以決定跟住佢。  以我對然人短暫嘅認識嚟講，我覺得佢冇必要講大話。但對於林日辰救人呢個行為，我有所保留。  不過，的確林日辰都算係救咗我，而且佢仲救埋家姐佢哋。如果林日辰只係需要保住我條命嘅話，佢冇必要去救埋家姐…..，又或者救家姐係為咗我可以有呢啲配合佢嘅目的？  點講都好，林日辰對我嚟講就係一個痴線佬，完全理解唔到佢個腦究竟諗啲咩。  第二，關於然人佢嗰邊嘅宇宙，平行宇宙嘅概念一早就存在，但從來冇被證實過，因為平行宇宙嘅根本就係應該要互不相干。  因為每個平行宇宙所存在嘅事物、物理定律、物理常數等等可能會一樣，亦可能唔一樣，所以每個宇宙唔會有任何嘅聯繫或者訊息嘅互通。  如果平行宇宙之間可以互相交流、連接嘅話就會產生出好多唔同嘅問題。例如同一種生物未必可以係唔同宇宙生存到，各種物質未必同時存在係每個唔同嘅宇宙。  當一個宇宙出現咗該宇宙唔存在又唔應該出現嘅生物或者物質，後果就不堪設想。  簡單嚟講，即係每個平行宇宙都有自己獨有嘅法則、規律。各自獨立，互不接觸嘅平行宇宙，先係平衡嘅狀態。  而強制傳送就正正打破咗平行宇宙嘅最基本原則。所以，我哋呢啲林日星可以傳送係唔同平行宇宙嘅人就係一個錯誤，應該似係一個電腦病毒嘅存在。  然而，係近呢幾個月，然人嗰邊嘅宇宙都有出現過極光事件。  然人嗰邊嘅極光事件同我哋呢邊嘅都係大同小異，唔知道佢嗰邊宇宙有冇‘我’嘅出現呢?  至於然人就係一場葬禮嘅途中被強制傳送到我哋嘅宇宙。  然人所參加嘅係佢爸爸嘅葬禮，佢爸爸死於工業意外。然人三歲嘅時候，媽媽就死咗，就係生完佢妹妹之後過咗身。  然人嘅家境清寒，爸爸係一個唔稱職嘅父親，對然人嚟講幾乎可以話係一個陌生人。因為佢爸爸係然人五歲嘅時候，為咗生計就賣咗然人兩兄妹俾某國際組織做實驗。  講到呢個組織嘅實驗，就要補充一下係然人嗰邊宇宙嘅一啲基本資料。  係70年代，佢哋嘅地球出現咗異於常人嘅人類，呢班人擁有普遍人類冇嘅能力，但只係佔全人類嘅極少數。  呢類人一啲一出生就有同然人一樣嘅感知力，一啲人就後天產生出超人嘅力量、心靈感應、遙視力，意念力等等。  後來經研究，發現其實佢哋係開發咗人類真正可以做到嘅能力，即係話每個人，全部人類都可以擁有呢啲能力。  普通人類只會用到人類真正能力嘅5%，運動員、科學家、藝術家呢類人就略勝普通人類一啲，6至7%。而以上提及，異於常人嘅人類就係8-10%，順帶一提，然人就係8%。  隨之，各國政府同組織都開始集中投資去研究呢個新人類嘅計劃。然人就係被賣咗去某個大嘅國際組織，開發新人類嘅計劃，做實驗體。  由於各國政府都需要開發新人類去提高自己國家各方面嘅能力，所以基本上政府都默認咗呢一種人命買賣。  多年之後，佢哋世界陸續誕生更加多嘅新人類，能夠使用嘅百分比亦都越嚟越高。普遍5%嘅人依舊被叫做人類，自然開發至8%-12%嘅人被叫做新人類，被強制開發8-12%嘅人叫做再人類，至於12%以上嘅就叫做X人類。  現今，雖然冇公開承認，但基本上全世界都知係背後真正統治佢哋地球嘅人，有三個人，分別係24%，28%，同埋31%嘅X人類。呢三位X人類所擁有嘅能力，對於平民百姓嚟講，已經同神冇分別。  然人由5歲開始做實驗體，多年嚟受盡各種非人道對待，強制咁被開發能力，難怪佢份人平時冇乜心情起伏，對一啲血腥嘅畫面都無動於衷。  我同然人嘅成長背景都係咁扭曲，佢仲比我黑暗好多倍，要承受嘅痛苦更加多。但望到佢而家堅強嘅樣，唔多唔少對佢產生咗啲敬意。  最後，我問咗然人佢頭朵紫色嘅花係咪個個再人類都有，佢話只係某部分人有，呢朵花嘅存在可以增強感知力。  仲有，然人竟然唔係一個十幾歲嘅細路，佢原來只己經29歲，被開發之後嘅再人類壽命會延長，平均可以有180歲命，壽命嘅延長同時可以緩慢衰老，所以然人先睇落仲係細路咁嘅樣。  時間返到嚟現在，地點返到嚟我哋之前借住嘅嗰個單位門前，我係推開門之前，道門就俾入面嘅人打開咗。  打開門嘅係李生，由於呢道門係一道爛門，裏面看守住嘅李生一早就知係我哋返咗嚟。企係李生身後嘅，仲有李海嵐。  我對住門後嘅兩位稍為咁微笑「我哋返嚟啦….」