「我哋約定大家，十年後嘅今日大家都單身，我哋就結婚，好唔好？」: 4.

「碰！」
「上！上你隻四筒。」
「食！無花，一個東，對對糊，五番。」
⋯
⋯
⋯
未入到去，喺門口除鞋嘅時候，門外已經聽到一大堆打緊牌嘅聲。

間Party Room 都算大，打開門就見到同我同班嘅呀偉同呀藍喺度篤緊美式桌球。右邊就係Wendy，Tatiana，Denise同呀杰喺度打緊牌。右邊入小小仲有間房仔，入面有張沙發，一部42寸電視，一部Switch同埋一部PS4 Pro左邊有張大枱，大枱上面放咗一大堆嘅今晚嘅晚餐兼宵夜，壽司，薯片，Pizza，仲有兩一枝Black Label，一枝綠茶同七喜。 



呀杰開心到邊笑邊講
:「自摸十三么！」 

Wendy，Tatiana，Denise同時望住呀杰副牌 
Wendy企咗起身再望一望阿杰講
：「X呀？你琴晚打完飛機冇洗手呀？！」 

Denise：「肯定係啦！呢舖唔算呀！」

Tatiana：「啱呀！啱呀！」



我好奇行到去呀杰後面企望住佢副十三么心入面都驚嘆一聲
雖然我對麻雀嘅程度係零，但都知十三么好難先食到

呀杰分別指住上家嘅Denise，對家嘅Wendy同下家嘅Tatiana講：
「算你老豆！」「打你老豆！」「啱你老豆！」「你哋依家分別總共淨我十八杯呀，一陣食完野記得還喎！」 

原來佢哋玩緊一番飲一shot Black Label 

Wendy同Tatiana 一向都係酒量差，而Denise，自從畢業禮後，喺街見過一次之後都就冇再見過。我同Wendy，Tatiana 好熟，因為中學一齊讀會計，最差又係我哋三個，每日都俾Miss Chan捉住放學留低做數。有一次，Tatiana同我上咗Wendy屋企食飯慶祝考完會計嘅Mock，我哋就打邊爐，呀杰亦不請自來咁買咗幾枝青提子味嘅真露上埋嚟。我哋食完，執埋，洗埋就開始咗飲酒之旅。飲咗唔夠2枝，Wendy同Tatiana 都相繼收皮，得返我同呀杰。再過多陣，Wendy 就嘔返頭先食嗰啲芝心丸，肥牛，菜。Tatiana 就好少少，只係得菜同芝心丸，因為佢唔食牛。我執佢哋手尾令我之後幾個月都冇再食過啲丸，肥牛同菜 



我搭住呀杰膊頭講
：「掂啦，雀神上身喇！」 

呀杰縮一縮個膊頭
：「你知唔知打牌搭人膊頭死咗會俾人燒春袋㗎？」

我再用力摙住呀杰膊頭 

呀杰向後望一望
：「Alice呢？」 

我：「佢同Jessica一陣先上黎。頭先喺樓下見到條海哲佢突然話有野做再電聯喎。」