【校園】想成為您的治癒: 25. 誰在打盹
其他班嘅專心上堂喺作為精英班嘅E班面前好似差咗好遠，可能差別在於班上嘅人嘅眼神表現出嚟嘅感覺
E班嘅人個個都好似眼有火咁，用眼神話比人聽「我一定要入到大學」一樣，就算平時再嬉皮笑臉嘅搗蛋鬼，一到上堂嘅時候都好似變咗個人咁
「咦⋯」邱茗然嘅目光自然地尋找最近同佢好似比較熟嘅一個人，但望到嗰個人嘅時候，邱茗然嘅嘴角悄悄上揚，心入面已經笑咗出嚟
從走廊望入去，喺人人都好專心致志嘅情況下，有個人一直喺度點頭釣魚，一個介乎於清醒同瞓着嘅狀態之間
「第一名嘅學霸真係囂張呢～」邱茗然喺心中以輕鬆嘅輕快聲線講道
喺呢個專心認真上堂嘅班裏，殷書賢嘅恰眼瞓特別明顯，雖然都係微微低頭，但佢一直不自覺咁偶爾點頭
頭好似好重一樣，忽然間向下墜一下，殷書賢頓時醒一醒睜開雙眼，但下一秒眼皮又忍唔住合埋，然後又循環起嚟
「學霸真係學霸～」邱茗然喺心中笑道，「上堂仲可以光明正大咁恰眼瞓。」
去完廁所，佢地又番去課室繼續上堂，先啱啱坐低，邱茗然就望住時鐘數緊仲有幾耐先落堂
「好想快啲到小息呀⋯」邱茗然望住秒針飛快咁行，但分針龜速咁行，「陣間小息買咩嘢飲好？飲蘋果綠茶定係飲維他奶？」
邱茗然托住頭，細聲嘆氣，靜靜地上堂同時又等待小息來臨
「叮噹叮噹～叮噹叮噹⋯」小息嘅鐘聲終於響起，班上嘅大家都頓時醒一醒
老師一落堂，張萱淇就拎出佢今朝收番嚟嘅英文功課，準備落去交簿
「茗然陪我落去交簿！」張萱淇拉起邱茗然就行
經過隔離E班嘅時候，邱茗然下意識望入去，見到殷書賢已經直接伏咗喺枱瞓
「今日收得齊唔齊呀？」邱茗然轉頭望向簿面嘅點名紙，「咦～居然收齊呀？連佢都有交今日。」
「好少可會收齊晒真係，你知啦⋯實有一兩個人欠。」張萱淇無奈笑道，有啲人長期欠功課，好似有種「絕對唔可以一次過交齊」嘅強逼症一樣
喺上堂嘅鐘聲響起後，邱茗然跟喺張萱淇身後，拎住地理書行出課室，但兩人行唔同嘅方向、去唔同嘅課室上堂
「佢仲喺度嘅？」邱茗然一踏入E班，就見到殷書賢仲坐喺原位瞓緊，「都打鐘啦⋯」
邱茗然一步一步行近殷書賢嘅座位，準備去上Bio堂嘅張思群見到殷書賢仲伏喺度未醒，伸手就捉住殷書賢嘅膊頭
「喂，上堂啦。」張思群捉住殷書賢搖咗兩下
殷書賢睜開眼坐好起身同時伸手入櫃桶拎Bio書，然後帶住一副倦容企起身，拎走放喺枱上嘅眼鏡
「原來佢坐佢個位～」張思群忽然間覺得自己好似發現咗啲咩秘密一樣，「唔通係咁樣識？」
殷書賢行出坐位，經過邱茗然身旁嘅時候，兩人都下意識側一側身微微避開
殷書賢拖住腳步行，喺佢隔離嘅張思群行到去黑板前嘅時候回望殷書賢嘅座位一眼，又望一望殷書賢，但殷書賢若無其事咁直接行出課室
喺lunch time嘅時候，上x2嘅大家落堂後都各自番自己班，殷書賢同張思群由Bio lab番嚟課室，一番到嚟，殷書賢就一個屁股坐低喺位
「你今日做咩咁攰？」張思群不解地問，平時好少會見到殷書賢恰眼瞓
「琴晚溫書溫太夜⋯」殷書賢摸着自己嘅後頸，感覺一直喺度點頭釣魚搞到頸痛，「溫溫下就已經5點⋯」
「嘩⋯殷書賢你真係太愛讀書⋯走火入魔啦都就嚟⋯」張思群無語地搖搖頭，「我去開locker先啦⋯等埋佢地番嚟再去食飯啦⋯」
「嗯⋯」殷書賢往櫈背一靠，手輕輕地拍打自己嘅臉頰想自己清醒啲，「嗯？」
殷書賢望到喺佢嘅櫃桶入面，有張對摺咗嘅黃色memo紙喺佢筆袋隔離，殷書賢坐起嚟然後拎起memo打開嚟睇：「堂堂學霸居然上堂恰眼瞓！」
「幾時睇到⋯？」殷書賢望坐memo紙上嘅內容不禁有啲疑惑，邱茗然幾時見到自己上堂恰眼瞓？
不過佢今日真係好眼瞓，琴晚溫書同預習得太「忘我」，差啲就冇瞓就去番學，所以今日嘅佢，放學之後選擇番屋企瞓陣
「唔留低啦今日⋯番屋企瞓陣再做功課溫書啦⋯」殷書賢踏出校門嘅時候喺心入面講道，就算係番屋企都唔代表佢會偷懶
殷書賢一如以往地搭巴士，行到上層靠後嘅位置坐低，戴上耳機安靜咁聽陣歌
「呼⋯好彩趕得切～」啱啱為追車而跑嚟嘅邱茗然喘住氣咁行到上層，「好熱⋯」
殷書賢偶然望向前方，就同行緊去靠後座位嘅邱茗然對上視線
兩個人對望一眼，邱茗然行到去殷書賢隔離嘅空位坐低，兩人相隔咗一條走廊
「你今日上堂恰眼瞓。」邱茗然主動搭話
「因為溫書溫到天光所以好眼瞓。」殷書賢平靜地解釋，佢都只係講緊一個事實
「吓⋯」邱茗然一臉「點解要犧牲瞓覺溫書溫到天光」嘅不解表情，然後喺臉上掛上笑容笑言：「你都真係好中意讀書～」
「可能係。」殷書賢真係諗咗一諗再答，不過實際上係唔係，佢其實都唔肯定
邱茗然落咗車之後同平時一樣行一樣嘅路番屋企，一落車行咗兩步就見到行喺佢前面嘅邱旻顥
「屋企好似都冇咩零食⋯」邱茗然喺心裏打起小算盤，「好似都差唔多時候要入貨啦～」
一諗到可以免費買零食，邱茗然諗都冇諗就衝上去，捉住邱旻顥嘅手拉咗一下
IG Link: https://www.instagram.com/nd_cotttoncandy/?hl=zh-tw