【校園】想成為您的治癒: 33. 科長

另一邊嘅張萱淇一番到屋企就即刻將校服除落嚟換番屋企衫，然後就灘低喺床上

「淇淇，就嚟食飯啦！」張媽媽行入張萱淇嘅房，就見到張萱淇一個頹廢樣灘喺床上面，「起身去洗手啦！」

「哦⋯」啱啱先灘低嘅張萱淇一臉不情願咁起身行去廁所洗手，將手機放喺床上面

食完飯行番入房一拎起手機，就見到手機多咗成10個message

「點呀⋯」張萱淇有啲無奈，「李雨揚真係得閒得濟⋯」





張萱淇最後都係揀咗覆佢，李雨揚一直問佢做咩問到張萱淇都覺得煩

「嬲完覆我啦終於都」「冇嬲，只係唔想覆」

「所以你仲未同我講你嬲咩」「都話冇嬲」

「真係？」「係」

「星期六得唔得閒？食唔食飯？」「之後再答你」





其實星期六嘅話佢好得閒，但只係佢唔想咁快就答實李雨揚，免得李雨揚以為佢一問自己就會答應，容易拿捏；雖然張萱淇自己都覺得，就算自己拒絕咗李雨揚，李雨揚可能轉頭就約咗其他人

「唉～算啦，唔理佢咁多，過幾日再算。」張萱淇從床上起身坐到書枱前，「做埋份essay先～」

今晚張萱淇預留咗時間去煲劇，佢冇咩特別嘅興趣，唯一成日會做嘅就係煲劇，劇入面嘅世界好似應有盡有，佢可以將現實呈現亦可以將現實冇嘅嘢變成有

「搞掂～」張萱淇放低筆，都唔再check下先收起，直接將essay紙摺起放入file，佢對自己嘅文科能力一直都好有信心，「聽日有冇默書測驗呢⋯冇⋯」

翌日冇測驗嘅話，張萱淇都唔會去溫書，平日嘅佢中意喺默書測驗前兩日先開始溫，所以日日都好似好得閒咁





正當佢打算起身就收到邱茗然嘅message問佢功課

「做咗呢題未？send比我」邱茗然send咗題數學過嚟求答案

「做咗」張萱淇喺書包拎出數學簿，影低嗰題就直接send比邱茗然，message先啱啱send出去就變藍剔

「Thx～」喺收到邱茗然嘅回應同時，張萱淇再諗一諗自己有冇未做完嘅功課

「嘻～做晒啦～做完嘢就要休息啦～」張萱淇行到床邊，拖鞋一踢就拎住手機灘喺床，「睇下出咗新一集未先～」

「張萱淇你唔洗溫書咩？」媽媽拎住一個用紙巾包住、摵好咗嘅橙行入嚟，「日日都喺度追劇，唔洗溫書？」

「呢兩日都冇嘢測，休息下。」張萱淇坐起身接過橙，摵開一件放入口，「我有去補習呀！」

「淨係靠補習得啦？」媽媽半信半疑咁問，「唔洗再溫下書鞏固下？」





「我自己知㗎啦～」張萱淇望住手機回答，佢宜家淨係知上次暫停嘅劇情今日會係點樣，「我會溫書㗎啦～」

「你係先好講⋯」媽媽輕皺起眉頭，「你唔好最後出嚟考衰咗⋯」

「媽，你要對我有啲信心先得㗎嘛！」張萱淇不滿地講道，然後充滿自信咁講，「我可以㗎！」

「好好好⋯對你有信心呀⋯」媽媽無奈地敷衍點頭，「加油啦咁你⋯」

喺媽媽出咗去之後，張萱淇又繼續佢嘅放鬆時間，喺溫習上佢有自己嘅規律同節奏，佢知自己要點做

⋯

「今日番去做文言，科長幫我派簿。」Miss Tong指一指放喺簿櫃嘅文言練習，「陣間同大家講咗做邊度。」





邱茗然聽到Miss Tong話要科長派簿，自動起身行去簿櫃，稍微彎腰拎起放喺疊喺最面嘅文言練習

「唔⋯」邱茗然拎起疊簿之後猶疑咗一下，上面第一本簿已經唔係佢地班嘅同學嘅名，睇真啲原來唔係佢地班嘅簿，「Miss Tong，疊文言唔係我地班⋯」

「吓！？唔通我擺錯班！？」Miss Tong有少少慌張，「可能我將你地疊簿擺咗喺隔離班⋯茗然，麻煩你幫我去換番疊簿番嚟先啦！」

「哦⋯哦！好⋯！」邱茗然窒咗咗窒，但都係點點頭，「宜家去攞⋯？」

「係！」Miss Tong肯定地點頭，「去隔離E班換番疊簿。」

邱茗然拎住E班嘅簿踏出課室，去拎番佢地C班嘅簿番嚟

「隔離班上緊咩堂⋯？」邱茗然未行到E班已經覺得尷尬，「要喺人地上堂入人地課室真係尷尬死⋯」

邱茗然行到去E班嘅門口，企喺緊閉嘅大門前時騰出一隻手去敲門





「叩叩。」「入嚟。」

喺敲門聲響起嘅一瞬間，E班嘅人嘅目光都朝門口望去

「好大壓力突然間⋯」邱茗然喺心裏緊張地道，但佢都係一臉平靜咁推開E班嘅門

「係？」企喺黑板前拎住粉筆嘅阿sir望住邱茗然

「唔好意思，Miss Tong叫我嚟換番疊簿，擺錯咗班。」邱茗然臉上掛上禮貌嘅微笑

「哦好呀，你入嚟啦。」阿sir微笑點頭

邱茗然快步行入去，喺阿sir嘅身後經過行到去簿櫃前，想快啲換完就走，喺人地嘅課室太尷尬





「佢咪之前同殷書賢一齊嗰個女仔？」謝澤謙一眼就睇到邱茗然，仲認到佢

雖然話同一間學校，仲係同級生，但佢冇同邱茗然同過班，佢一直都喺精英班生存；題目啱啱做咗一半嘅殷書賢一抬起頭就見到邱茗然喺黑板前面行過

「佢喺度做咩？」殷書賢嘅目光跟住邱茗然郁動，由黑板移到去簿櫃




IG Link: https://www.instagram.com/nd_cotttoncandy/?hl=zh-tw