【校園】想成為您的治癒: 43. 天台的甜

「好酸⋯！」殷書賢微微張口講道，佢感覺自己個口再擘大啲都會流口水，「酸呀酸呀⋯」

「超酸嘅糖～」邱茗然笑笑口講道，好似完全唔覺得酸一樣咬粒糖

「牙鉸好痺⋯」殷書賢耷低頭，眉頭仍然皺着

邱茗然又拎咗一粒放入口，殷書賢一臉不理解咁望住邱茗然，點解佢仲可以若無其事咁食？

「你仲食唔食多粒呀？」邱茗然笑問道





「唔食。」殷書賢即刻就拒絕，「好酸⋯」

殷書賢掐住自己嘅臉頰，嗰種酸引致嘅口水分泌仲未停到，佢先唔會咁蠢食多粒

「你真係唔食多粒呀？唔好食咩？」邱茗然笑問道

「好酸真係⋯你唔覺咩？」殷書賢吞咗啖口水

「食多粒就唔覺啦～」邱茗然又打開個糖袋遞到殷書賢嘅面前





殷書賢見邱茗然誠意滿滿，就伸手拎多粒，雖然都係有啲半信半疑

「你唔食？」殷書賢喺放入口前問邱茗然

「好呀～我食。」邱茗然拎粒糖直接放入口，見到邱茗然嘅舉動後，殷書賢先將粒糖放入口，「我又唔會害你嘅，你咁驚做咩？」

酸感來襲，殷書賢伏低喺矮牆上，呢種酸爽感覺有啲上腦；邱茗然捉住矮牆前嘅扶手，佢唔討厭呢種感覺

「係唔係好正？」邱茗然雙手捧住自己嘅臉頰笑問道





「唔正囉⋯」殷書賢伏喺自己嘅手臂上搖搖頭

「我覺得幾好呀～」邱茗然喺度笑，佢今日嘅心情睇起嚟唔錯

「先唔係⋯」殷書賢見邱茗然喺度笑，就好似被佢影響咗一樣露出淡淡嘅笑容

兩個人企喺矮牆前笑住食糖，邱茗然見到殷書賢今日露出笑容嘅次數多咗有啲訝異，或者因為殷書賢平日比人嘅感覺太嚴肅

「秋天～」邱茗然望住前方因為風吹而沙沙作響嘅樹葉，「咁樣又到10月，好快又11月啦⋯」

「好快就大考。」殷書賢第一秒諗到嘅係喺聖誕假後嘅最後一次大考

「真係掃興⋯明明有聖誕假喺前面⋯」邱茗然無言咁望向殷書賢，然後伏喺矮牆上，「之後要考試⋯即係逼人溫書啫⋯」

「你可以唔溫。」殷書賢轉身行到長櫈前坐低，突然拎出鎅刀將刀片推出嚟





「咔、咔、咔、咔⋯」殷書賢將刀片推出嚟，邱茗然聽到鎅刀嘅聲音即時回頭望

「佢應該唔會係想做危險動作⋯？」邱茗然皺起眉頭，盯着殷書賢嘅一舉一動，「我係唔係應該要阻止佢⋯？」

邱茗然一直安靜咁留意住殷書賢嘅舉動，佢仲猶疑緊佢係唔係應該阻止佢

「你唔好當住人面做呢啲危險行為。」最終邱茗然都係制止殷書賢，及時止損，「而且你唔係怕比人發現咩？」

「咁你擰轉面。」殷書賢冷靜地講道，「你都睇到啦。」

邱茗然冇真係擰轉面，而係行到長櫈前拉開書包拉鍊，拎咗包朱古力出嚟遞比殷書賢

「請你食朱古力。」邱茗然認真地講道





「點解你仲有嘢食⋯」殷書賢伸手接個包M&M朱古力，「做咩請我食？」

「朱古力有多巴胺，食完會開心啲呀～」邱茗然好似講得好有道理，但殷書賢只係一笑

「以我所知，黑朱古力嘅可可成分高過牛奶朱古力，即係黑朱古力會有效啲。」殷書賢認真咁講出一啲小知識

「我唔食Dark～」邱茗然聳肩，喺行番去矮牆前嘅時候微微一跳轉一個圈，「所以得牛奶朱古力。」

「多謝。」殷書賢望住拎喺手上嘅朱古力，雖然佢唔太食甜咗，但佢都係接受咗邱茗然嘅一番好意

「差唔多時間要走啦！」邱茗然拎出手機望一眼，然後行到長櫈前拎起書包孭到背上，「我走先啦～拜拜～」

「拜拜。」殷書賢以平靜嘅語氣回答，喺聽到天台門閂上後，殷書賢又望一眼手上嘅朱古力：「食完會開心啲咩真係⋯」

⋯





「哈⋯哈⋯好攰呀⋯！跑唔郁啦⋯！」張萱淇講道，「仲有幾多個來回先完呀⋯！」

「我都跑唔郁啦⋯！」邱茗然帶住紅彤彤嘅臉頰崩潰地講道，無論係手定腳都好攰，「淇淇等埋我⋯！」

張萱淇先跑完20個來回跑，叉住企喺操場邊一邊喘大氣一邊等邱茗然喺對邊番嚟

「搞、搞掂啦⋯！」邱茗然跑番嚟喘着氣，艱辛嘅20個來回終於跑完，「飲水飲水⋯！」

邱茗然同張萱淇行到去小食部，拎起放喺枱上嘅水樽

「飲完水去唔去廁所？」張萱淇望住自己雙手手心，「想去洗手⋯」

「哦⋯好呀⋯」邱茗然點點頭，因為口中仲含住啖水，所以淨係發到個大概嘅音





「哈⋯哈⋯」許洛霏跑到過嚟呢邊，佢嘅朋友們都仲跑緊，「好熱呀⋯」

邱茗然同許洛霏對望咗一眼，兩個女仔都露出友善嘅笑容

「我可唔可以，借一啖水⋯？」許洛霏望向邱茗然，一臉誠懇咁問

「哦可以呀～」邱茗然喺將水樽遞比許洛霏前將水樽口抹咗一抹

「洗唔洗離口？」許洛霏雙手接過水樽禮貌咁問

「冇所謂。」邱茗然講道，「飲完放番喺枱得啦～哎哎⋯！」

「陪我去廁所洗手～」張萱淇喺邱茗然嘅都講完嘅時候就拉住邱茗然行

「得啦得啦⋯！」邱茗然比張萱淇拉住行，快步跟上張萱淇嘅步伐

許洛霏回頭望向兩人，然後將水樽嘅蓋扭番好放番喺枱上




IG Link: https://www.instagram.com/nd_cotttoncandy/?hl=zh-tw