【校園】想成為您的治癒: 65. 強調

「嗨～」許洛霏下意識就朝邱茗然打招呼，因為邱茗然都望到佢

「嗨⋯！」邱茗然眨一眨眼後先好似回神一樣對許洛霏打招呼

本來一直望住外面街道嘅殷書賢聽到邱茗然講嘢就擰轉頭望向佢，但就見到邱茗然嘅目光望住其他地方

殷書賢沿住邱茗然嘅視線望去，見到一個同佢地同學校嘅女仔，對方望一望佢兩個然後就喺中間嘅位置坐低

「邊個⋯？同班？」一向都唔留意其他班嘅殷書賢喺心裏問





許洛霏坐低將書包除落嚟，然後擰轉頭同邱茗然對望，許洛霏對邱茗然微微一笑，只係佢好似將一啲說話收咗喺微笑入面一樣

「唔⋯」邱茗然即刻有啲不安，佢望一望殷書賢，但殷書賢若無其事咁又望向窗外，「佢唔會誤會㗎可⋯佢個微笑令我好不安⋯」

邱茗然呢頭先咁樣諗，轉個頭佢就收到來自許洛霏嘅message：「你地拍拖？」

「嘩！佢真係誤會咗啦！」邱茗然喺心裏喊道，然後拎起手機快速打字回覆：「唔係，只係咁啱一齊坐」

「Okay～」許洛霏意外地冇打爛沙盤問到篤嘅打算，好快就接受咗解釋，「第一眼睇以為係」





「真係唔係」邱茗然喺後面仲加多咗個笑喊，「冇啲咁嘅事」

「以為係，仲要同我地級嘅學霸咁癲⋯！」許洛霏回覆道

「一齊搭車啫，朋友朋友」「你唔洗強調，我明嘅～」

「怕你誤會嘛」「佢唔係你中意嗰type？」

「講緊啲咩？？？我冇非分之想㗎！」「（笑喊）好吧好吧～」





「尷尬⋯」邱茗然放低手機，把玩着書包兩邊嘅帶，「比人誤會嘅話仲尷尬⋯」

邱茗然悄然望向殷書賢，殷書賢咩都冇察覺到一樣，目光一直停留喺外面嘅街景上

「邊個同佢一齊就弊啦⋯佢好似木頭咁⋯」邱茗然喺心裏諗，「仲要係心入面除咗讀書就咩都冇嘅木頭⋯」

邱茗然喺心入面一邊講，佢嘅手一邊打開書包拉鍊拎咗盒薄荷糖出嚟，打開盒之後自己先食一粒

「食唔食？」邱茗然用拎住糖盒嘅手嘅手背輕輕拍一拍殷書賢問

「你仲有咁多嘢食⋯？」殷書賢無奈咁望住邱茗然手上嘅鐵盒，然後拎咗一粒糖放入口

「耶～」邱茗然笑一笑

冰涼嘅感覺喺口中擴展，滲到口中每一個角落，的確會令成個人都精神啲





⋯

「叩叩⋯」

「唉⋯」聽到敲門聲嘅殷書賢忍唔住嘆氣，佢抬頭望一眼時間，「先9點幾⋯」

「食唔食蘋果？切咗比你。」媽媽拎住一個碟，上面整齊放住一件件切好嘅蘋果件

「嗯，唔該。」殷書賢禮貌回應，媽媽將碟蘋果放低喺殷書賢嘅枱上

喺媽媽準備轉身行番出去嘅時候，眼尾見到殷書賢嘅枱上放咗包開咗朱古力

「最近做咩一直食朱古力？見垃圾桶成日都有朱古力袋。」媽媽打消行出房嘅念頭，企喺殷書賢身後伸手拎起放喺枱上嘅M&M，入面得番半包，「食咁多零食唔好㗎⋯」





「嗯。」殷書賢開始覺得唔耐煩，媽媽一同佢講嘢佢就覺得攰

「之前都唔見你會食朱古力呢啲甜嘢⋯」媽媽將朱古力放番喺殷書賢嘅枱上

「嗯，最近中意食。」殷書賢嘅語速比啱啱快，佢想快啲結束呢個無趣嘅交談，「我要溫書啦。」

「咁⋯好啦，我唔打擾你⋯」媽媽有少少愕然，但佢冇再講啲咩就轉身行出房順手將門閂上

殷書賢托一托眼鏡然後又開始集中精神溫書，雖然話1月先係最後嘅大考，離考試仲有兩個月多啲，但時間嘅嘢一眨眼就過，考完大考之後兩個月又到DSE，宜家唔係可以鬆懈嘅時候

殷書賢嘅手伸向朱古力袋又拎咗粒朱古力放入口，最近佢真係好似有啲食上癮，一溫書就一直食朱古力，呢包都已經得番幾粒

書同練習題將殷書賢嘅書枱淹沒咗，放喺最底嘅練習題又重又厚，擺喺度都已經可以嚇下人

佢嘅書櫃好整齊，書櫃上有定期清潔，每本來整齊咁放好喺層架上，由雞精書去到練習題一本都唔缺





殷書賢拎住筆喺手喺簿上寫低答案，避免練習題只可以做一次，寫完一題就望一望答案睇下啱唔啱、攞分嘅重點寫得準唔準確

「搞掂一課⋯」殷書賢將書合上，將眼鏡除落嚟，望向放喺枱上嘅時鐘，「12點⋯」

殷書賢自己都冇發現時間行得咁快，好似眨個眼就三個鐘一樣，佢執好枱面準備執刷牙瞓覺

「食晒⋯」殷書賢拎起枱上空空如也嘅M&M包裝袋，「朱古力真係幾好食⋯」

⋯

「張sir今日有事番唔到，今堂自修，攞嘢出嚟做啦。」代課老師喺黑板上寫上自修兩個字

「咁悶⋯？」殷書賢頓時覺得今日好無趣，平日最有意思嘅LS堂今日變咗自修，「做功課啦唯有⋯」





「今日晏晝個小測你溫咗未？」坐殷書賢後面嘅謝澤謙細聲問殷書賢，但未等殷書賢答佢，謝澤謙就代答：「都係嘅⋯你應該溫咗⋯」

「你知嘅話做咩要問？」殷書賢都覺得無奈，問完人又唔比人答，咁問嚟做咩

「順口問下你，求個安心。」謝澤謙輕拍殷書賢嘅膊頭

「求安心去廟，求我冇用。」殷書賢搖搖頭，佢拎起筆坐好做功課

「求學霸保佑我⋯溫咗一半都考到合格⋯！」謝澤謙打開書同時低聲講道

殷書賢聽到後皺起眉頭回頭望向謝澤謙：「你唔溫書仲合格係僥倖，唔合格係正常。」

「冇良心真係⋯」謝澤謙嘆一口氣扮失望

殷書賢再次坐好，托好眼鏡又開始做功課；所有人做功課都要擺書喺隔離邊睇邊做，而殷書賢嘅書擺功課隔離，係用嚟裝飾，冇咩太大用途，睇係會睇，但都只係喺唔肯定嘅時候望兩眼




IG Link: https://www.instagram.com/nd_cotttoncandy/?hl=zh-tw