【校園】想成為您的治癒: 89. 天真爛漫
殷書賢回頭一望，張思群嘅目光都落到邱茗然嘅身上，眼見殷書賢望住自己，邱茗然即刻抿着唇忍笑
「人地都笑你啦殷書賢～」張思群即刻挪揄一句
「嗯嗯嗯，你拎完未？」殷書賢敷衍咁點頭，對於張思群所講嘅單唔單身，佢冇特別介意，「行得未？」
「行得啦行得啦！比你咁催法，真係桃花都比你吹走⋯」張思群拎住啱嘅書同筆袋一齊行
邱茗然喺上堂前留低一張memo紙喺殷書賢嘅櫃桶：「要同Chem Bio過日子一定好有趣～」
「哦～難怪咁熟啦！」坐喺邱茗然後面嘅許洛霏目睹一切，一下子伸手捉住邱茗然嘅膊頭
「吓？」邱茗然成個人都震咗一下，猛然回頭望向許洛霏，望住許洛霏嘅笑容，邱茗然即刻將食指抵喺唇前，「噓⋯」
「你地咁樣傾計㗎？」許洛霏識趣地降低聲量，「好可愛呀～」
「間中係啦～」邱茗然直接咁回答許洛霏，然後將摺成小正方形嘅memo紙推入咗，「有時會咁樣寫紙。」
「好可愛嘅相處方式，好似少女漫！」許洛霏細聲地笑道，「表面完全唔熟，但私下好close嗰種反差～」
「令你失望好抱歉，因為我地私底下冇好熟。」邱茗然露出無奈嘅笑容，「你諗太多啦。」
「慢慢變熟囉～我一定等你㗎～」許洛霏高興咁比咗個okay手勢
「吓？」邱茗然完全唔明，除咗無奈都係無奈，「以佢呢種好冷冷淡淡嘅性格，你等到畢業都未等到。」
「哦～睇嚟有人係想熟喎～」許洛霏似乎又捉到一個新嘅點，「冇好感嘅話仲會想熟啲？你講大話啦～」
「我淨係可以承認我係想同佢熟啲，其他就⋯再講啦～」邱茗然真係怕咗許洛霏，佢逼於無奈咁開口講道
邱茗然唔討厭殷書賢，呢個係100%絕對可以肯定嘅事實，但至於係唔係許洛霏口中所指嘅嗰種中意⋯
「又未到嘅⋯」邱茗然嘅心入面大概有個答案
當落堂嘅鐘聲再一次響起時，食飯時間到啦
「快啲行啦，番去擺低嘢就去食飯啦～」邱茗然好快就執好晒枱上嘅嘢
行出課室嘅時候同番嚟嘅殷書賢對望咗一眼，邱茗然笑一笑，殷書賢有啲困惑
行到番埋位嘅殷書賢，直覺覺得大概係有人擺咗嘢喺會櫃桶，殷書賢先坐低將書擺入櫃桶，手摸向筆袋嘅方向
「喂我去個toilet，佢地番嚟同佢地講聲呀！」張思群邊對殷書賢講邊快步走過
「嗯，好呀。」殷書賢見張思群行開咗，佢先將張紙喺櫃桶拎出嚟睇
望住紙上用秀麗嘅字寫下嘅留言，殷書賢不禁一笑：「應該總好過同醫學院過⋯」
「快啲落去擺完簿櫃就行啦！陣間冇位呀！」張萱淇同邱茗然朝後梯急步行去
喺經過E班嘅時候，邱茗然透過面向走廊嘅玻璃窗望入去，見到殷書賢手拎住張紙喺度睇
見到殷書賢笑嘅時候，邱茗然都偷偷地笑咗一笑
⋯
「明明都已經秋天，點解都唔係好有秋天feel嘅？」邱茗然望住出面街上嘅行人
「因為全球暖化。」殷書賢坐喺長櫈上，手上一如既往咁拎住書，今日係中文嘅雞精書
「真係咩⋯我想要秋天呀～」邱茗然托住下巴，手中拎住晏晝同張萱淇一齊買嘅玩具望遠鏡
「宜家涼涼地都唔錯。」殷書賢講道，佢望到邱茗然手中嘅玩具：「你喺邊度買個望遠鏡番嚟？」
「玩具嚟咋～你玩唔玩呀？」邱茗然拎住佢嘅玩具望遠鏡行到殷書賢面前，將望遠鏡遞比殷書賢
「又唔係真嘅望遠鏡⋯」雖然係咁講，但殷書賢都係接過望遠鏡，起身行到矮牆前望向街
「睇到咩呀？」邱茗然即刻行到殷書賢嘅身旁好奇又帶少少興奮咁問，兩人中間隔咗一個人嘅距離
「有個細路一路行一路睇書，然後跌親。」殷書賢平靜地講道
「邊度呀？」邱茗然即刻望向外面八卦下
「嗰度。」殷書賢指一指大概位置，然後將望遠鏡遞比邱茗然，「你睇。」
「唔⋯冇呀⋯」邱茗然接過望遠鏡八卦一番，但卻見唔到殷書賢講嘅小朋友
殷書賢向邱茗然嘅方向企過咗小小：「你呢個位睇唔到。」
殷書賢又向反方向行，指一指佢本來佢企個位，示意邱茗然要行到呢度先望到
「真係？」邱茗然行到殷書賢本來企嘅位置再拎起望遠鏡望，「真係喎～故事教訓我地行路嗰陣唔好睇書。」
「望我做咩？」殷書賢見邱茗然講後半句嘅時候就抬頭望佢，無奈開口道，「我又冇跌親。」
「叫你唔好邊行邊溫書呀～」邱茗然笑道，然後又拎住個望遠鏡繼續八卦
「我只係聽筆記。」殷書賢搖搖頭
「係咩～」邱茗然又笑一笑，佢拎開望遠鏡望向殷書賢
感覺殷書賢同佢好似多咗嘢講，唔似之前咁樣咁冷淡，可能同其他人相比，殷書賢都係偏少嘢講
「可能處女座都係慢熱⋯」邱茗然喺心裏講道，然後望向樹上，伸手拍一拍殷書賢，「睇唔睇麻雀？」
「麻雀？」殷書賢摺起衫袖，感覺有少少熱
「比你。」邱茗然又將望遠鏡遞比殷書賢，伸手指住佢啱啱睇緊嘅位置，「麻雀細細隻好可愛，喺嗰度。」
邱茗然見到殷書賢將衫袖摺起咗，手臂上嘅傷痕都表露無遺
「你宜家都可以完全唔介意咁推起衫袖啦？」邱茗然望住殷書賢嘅手問道
「冇咩所謂，你都唔係唔知。」殷書賢講道，佢好似都覺得手上呢個玩具望遠鏡幾有趣，「既然你都知，咁冇咩所謂。」
IG Link: https://www.instagram.com/nd_cotttoncandy/?hl=zh-tw