【校園】想成為您的治癒: 91. 距離
喺餐廳先啱啱坐低，佢地就各自睇手機，宜家食飯前唔睇手機點得？
「陣間有冇小測？琴日有冇講？」坐喺謝澤謙對面嘅張思群問道
「冇講喎～」謝澤謙稍微抬頭，「今日邊有小測？」
「你交咗LS未？」殷書賢見謝澤謙一臉輕鬆便問道
「未喎～」謝澤謙搖搖頭，「寫咗一半。」
「你唔寫嘅話，今日咪要留堂。」殷書賢講道，「Miss Cheung唔係叫你放學前要交？」
「留堂嘅話咪可以同你一齊走～」謝澤謙用手肘輕撞殷書賢一下
「唔洗啦多謝。」殷書賢毫不留情地距絕，「我習慣自己一個人走。」
「大家咁熟，唔洗咁見外。」謝澤謙伸手就搭住殷書賢嘅膊頭，「定你要幫我手做LS份嘢？」
「我唔要，我拒絕。」殷書賢一臉嫌棄地將謝澤謙嘅手推開
「殷書賢你有冇見到，出嚟嗰陣。」謝澤謙忽然講道，殷書賢抬頭望向謝澤謙
「見到咩？」殷書賢好似咩都冇留意到一樣
「成日同你一齊嗰個女仔，有個男嘅送飯比佢，睇起嚟超close。」謝澤謙講道
「男朋友？」趙遠寧即刻加把口入嚟講，仲要擺出震驚嘅表情，「佢有男朋友㗎？」
「我點知。」殷書賢嘅反應仍然平淡，佢拎起枱上嘅水杯飲一啖水
「佢有男朋友嘅話，你仲日日同人地行咁埋唔係幾好掛？」謝澤謙有啲擔心，「陣間人地分手就唔好啦～」
「可能係阿哥呢～」張思群比較冷靜，唔似謝澤謙一嚟就估係男朋友
「咁如果係男朋友咪死？佢有冇男朋友㗎？」謝澤謙問殷書賢
「我點會知。」殷書賢無言地講道
「你未沉船㗎可？」趙遠寧撞一撞殷書賢問道
「冇⋯」殷書賢抬眼望向趙遠寧
「不過都真，佢有男朋友嘅話，你地唔好行咁埋好啲。」趙遠寧提醒道，「免得大家有誤會啦～」
雖然殷書賢唔知佢地緊張啲咩，但佢都覺得好似真係有啲道理，不過宜家佢地想像嘅同實際情況完全相反⋯
下午5:52
「拜拜～聽日見～」邱茗然喺落車前對殷書賢講道
「拜拜。」殷書賢提一提手
邱茗然喺巴士靠站後，等車門打開就輕輕一跳落車，殷書賢嘅手放喺窗框上托住下巴，拎出右邊耳機戴上
「哥哥！」邱茗然一落車就見到邱旻顥喺巴士站等佢，「你又會嚟嘅！？」
「邊個話今晚要食韓燒？媽媽叫我地去買。」邱旻顥無奈咁講道
「哥哥你比錢呀？咁我一定要揀好食嘅！」邱茗然挽住邱旻顥嘅手臂，「食咩好呀？我想食肉！」
「你買啦，媽媽會比番錢我。」邱旻顥講道
「耶～」邱茗然挽實邱旻顥，「咁我就真係揀好食㗎啦～」
「係係～」邱旻顥微微點頭
「真係男朋友。」坐喺上層嘅殷書賢睇到晒一切，「真係比謝澤謙講中咗，不過，男朋友又會咁光明正大送飯嚟學校⋯？」
雖然殷書賢自問同邱茗然之間真係冇咩，但佢都覺得今日晏晝嘅時候，謝澤謙佢地講嘅嘢有道理：「避免誤會。」
⋯
「早晨～」邱茗然一如既往咁行上車，行到佢企開嘅位置，一如既往咁同殷書賢打招呼
「早晨。」殷書賢望邱茗然一眼後默默地撇開臉望向窗外
殷書賢提起右手，好似習慣咗一樣摸右邊嘅耳機，但諗到啲咩之後佢又默默咁垂低手
「你今日同之前一樣著咗冷衫。」邱茗然笑一笑打開話題
「哦，係呀。」殷書賢微微點頭
「淇淇成日send呢啲嘢過嚟⋯」邱茗然拎起手機覆張萱淇嘅message，望住佢send比佢睇嘅搞笑短片，努力咁忍住唔笑出嚟
「男朋友？」殷書賢瞄邱茗然一眼，第一個喺大腦冒出嘅想法係男朋友搵邱茗然，「佢男朋友應該係大學生？嗰日睇起嚟好似都大過我地。」
殷書賢清理一下大腦入面呢啲冇用嘅嘢，又專心聽筆記講解；邱茗然笑完之後抬眼望一望殷書賢
殷書賢察覺到邱茗然嘅視線落喺佢身上，佢嘅目光一移，同邱茗然對上視線
邱茗然一副乖巧嘅模樣微微側着頭，臉上掛住朝早唔清醒嘅時候好難出現嘅活潑開朗笑容，但殷書賢咩都冇講就收回視線
「嗯⋯？」邱茗然作為女仔，直覺感覺到怪怪地，然後開口半好奇半關心問一句：「你好攰呀？琴晚溫書溫到好夜？」
「少少。」殷書賢回答嘅語氣聽起嚟比平日嘅佢更有隔閡一樣
邱茗然微微鼓起兩泡腮，察言觀色同時緩緩開口：「你唔恰一陣⋯？」
「唔啦。」殷書賢罕有咁唔望住佢講嘢，平時殷書賢就算再專心都會望住人講嘢
「唔⋯好啦⋯」邱茗然微微點頭，佢就係覺得殷書賢今日怪怪的：「邊個惹到佢⋯？」
⋯
上完西史堂嘅邱茗然番到課室，Chem堂一早完咗落堂
「佢有冇答我？」邱茗然行番埋位坐低，拎起佢一早擺咗喺櫃桶嘅memo紙
紙上仍然只有邱茗然寫嘅一句「放學去唔去圖書館？」，邱茗然不禁有啲困惑
「佢係冇睇到？」邱茗然將memo紙摺番好放，但佢見到翹起嘅角位，「明明係有睇呀⋯」
因為邱茗然喺有黏力嗰邊寫字，方便佢將紙對摺嘅時候可以黏住張紙，明明張紙係有被打開過嘅痕跡呀⋯
「做咗已讀我呀⋯」邱茗然無奈地將紙放到筆袋中，「寫兩個剔都好呀⋯」
IG Link: https://www.instagram.com/nd_cotttoncandy/?hl=zh-tw