【校園】想成為您的治癒: 98. 討厭文言文
「逐行出嚟拎番上次入統測啦。」Miss Tong捧起疊卷，「你地啲文言文真係搞唔掂呀⋯」
邱茗然跟住前面個同學行出去拎卷，佢有啲擔心呢個文言統測，畢竟佢超唔擅長文言文
「句子語譯仲要得拎到1分⋯」邱茗然一接到統測即刻打開卷睇，「好彩有下定決心做練習⋯」
文言統測，淨係考三篇文言文，結果係明顯嘅慘烈，邱茗然掀多幾掀都唔好意思睇落去：「睇嚟要再做多啲文言練習先得啦⋯」
「呀！我真係唔想做文言文呀⋯」邱茗然喺心入面無聲吶喊，「到底學嚟做咩㗎⋯！？」
邱茗然聽住Miss Tong嘅講解，由文章嘅內容開始講起，邱茗然盡量令自己集中精神唔會恰眼瞓
「好難呀⋯同數學一樣係火星文⋯」邱茗然都就嚟精神出走，佢拎住筆圈字啲字，「要做多幾多個練習先可以再拎到多啲嘅分？」
邱茗然望向張萱淇，咁啱張萱淇望向佢呢邊，張萱淇用口型問：「你幾多分呀？」
「62。」邱茗然做手勢同時將自己嘅卷掀到第一頁比張萱淇望一眼，「你幾多？」
「55。」張萱淇笑一笑，吐一吐舌頭
「放5分鐘嘅toilet break。」隔離上緊孖堂嘅E班，阿sir喺第一堂結束前五分鐘講道
殷書賢從書包中拎咗包紙巾，然後即刻就起身去廁所
「呯！」殷書賢行入廁格閂上門，即刻就解開袖口鈕，將衫袖推起
「嘖⋯鎅太深⋯又滲血⋯」殷書賢拎出紙巾抹走傷口滲出嘅血，「啱啱一太大動作就扯到傷口⋯」
殷書賢淨係將裇衫嘅衫袖拉番落嚟，好彩嘅係白裇衫冇沾染到血跡
殷書賢將衫袖拉番好，然後行出廁格番課室繼續上堂
⋯
「問下茗然去唔去買嘢食先～」張萱淇喺老師敬完禮落堂後起身
張萱淇起身打算行去邱茗然嘅座位，先啱啱踏出一步，就見到許洛霏走向邱茗然，張萱淇嘅邁步再行嘅動作即刻窒咗
「你幾多分呀？」許洛霏問邱茗然，然後細聲地講道，「我又唔合格啦文言文⋯」
「我62。」邱茗然都細聲咁講
「咁勁嘅你？」許洛霏望住邱茗然嘅卷有啲目瞪口呆，「好高分咩事？」
「做咗好多個文言練習訓練出嚟⋯」邱茗然無奈咁嘆氣，「做到生不如死⋯」
「但回報都唔錯呀～」許洛霏笑一笑講道，「下次我唔識又問你先～」
「我唔係識好多啦～」邱茗然笑道，「我文言文都超渣⋯」
「你唔係有個學霸比你問咩？」許洛霏嘅手放喺嘴邊擋住，湊前細細聲咁講道
「我問佢嘅話，佢實會同我講「DSE又唔係我幫你考，自己諗。」」邱茗然唔洗真係開口問都知道殷書賢會係咩反應
「哦～咁了解人地呀？」許洛霏即刻露出搵到邱茗然破綻嘅笑容，「連問都唔問就知人地會講咩啦？」
「先唔係因為了解佢！」邱茗然即刻反駁許洛霏嘅講法，「係因為佢次次都咁講囉！不過佢都唔會唔肯教嘅。」
「茗然！」張萱淇大步走向邱茗然，打斷咗兩人嘅對話，「陪我去買嘢食呀～」
「哦好呀～」邱茗然微微點頭，然後起身同張萱淇一齊行出課室
張萱淇喺臨走前望咗許洛霏一眼，許洛霏感覺有啲奇怪
「啱啱講你個學霸啲咩呀？」張萱淇好奇地問一句，想知道佢地啱啱講緊啲咩
「冇呀～霏霏講起成績嗰啲嘢咋嘛～」邱茗然笑道，啱啱講嘅都唔係啲咩重要事，陣間比人聽到都唔知會唔會誤會
「哦⋯」張萱淇臉上嘅笑容緩緩地消失，心入面覺得許洛霏好似又比佢知道多啲嘢一樣
⋯
「茗然你今日係唔係去圖書館？」張萱淇孭好書包行到邱茗然嘅座位
「係呀～」邱茗然點點頭，孭起書包，拎起放喺枱上嘅書抱喺懷中
「又同人地約好咗呀？」張萱淇細聲咁問
「冇約好，只係咁啱我地都喺圖書館⋯」邱茗然行離座位，同張萱淇一齊行出課室，「不過功課唔識有人教我都係好事嚟嘅～」
「人地係咪淨係教你咋～」張萱淇又笑問道，「簡直就係偶像劇情節～」
「你要偶像劇情節去搵你個補習同學啦～人地最近約你約得咁密～」邱茗然反擊一下，最近張萱淇嘅story基本上都係同李雨揚一齊嘅story
「我冇你咁好氣呀！」張萱淇抿着唇忍住笑意，但下一秒佢都係破防：「有新進展話你聽～」
「好呀～」邱茗然爽快咁答應，然後往上層行，「我上去圖書館啦～拜拜～」
「拜拜～」張萱淇笑一笑，望住邱茗然快步行上去
⋯
「唔⋯呢個係咩呀？」邱茗然用筆戳殷書賢嘅手一下，「唔識做⋯」
「文言文？」殷書賢望一眼放喺邱茗然面前嘅功課
「嗯，今日派嘅功課⋯今日派文言統測嗰陣，Miss Tong話我地文言文真係好渣，所以就派咗兩份文言練習要我地做⋯」邱茗然一臉不情願咁拎起筆，「明明我今次已經考得好過以前好多⋯」
「睇下？統測卷。」殷書賢忽然間有啲好奇，邱茗然嘅文言程度有幾好
「吓⋯？」邱茗然即刻有啲慌張，佢嘅分數絕對唔係好好嘅分數，「唔係唔比得，但⋯你唔好笑我⋯」
殷書賢將兩邊嘅衫袖摺起，因為除咗邱茗然之外，就只有坐喺外面借書處嘅職員
「嗯。」殷書賢爽快咁答應咗，但就喺邱茗然嘅卷到佢手上，見到分數嘅一刻，「好低分⋯」
「你話咗唔笑我㗎⋯！」邱茗然輕輕地打咗殷書賢一下
「80分滿分，你都係得7成分。」殷書賢有啲嫌棄咁掀開統測卷睇
「我文言文本來就唔叻嘛⋯」邱茗然扁起嘴一臉委屈咁望一望自己嘅卷又望一望殷書賢，「而且我又唔係你⋯邊似你咁叻，咩科都叻⋯」
「將勤補拙。」殷書賢望向邱茗然，輕輕一笑，「我都唔係天生科科叻，都要勤力先得。」
「所以咪做緊文言練習⋯」邱茗然疲倦咁望住眼前做咗一半嘅練習
IG Link: https://www.instagram.com/nd_cotttoncandy/?hl=zh-tw