「茗然早晨!」許洛霏喺邱茗然行入課室門口前叫住咗佢

「早晨!」邱茗然笑道,「啱啱冇見到你嘅?」

「你梗係見唔到我㗎~」許洛霏嘅說話明顯有弦外之音,邱茗然都蠢唔晒,都知佢想暗示啲咩,「正常嘅~」

「我見到啦!宜家就見到你啦!淨係見到你啦!」邱茗然以漸強嘅方式講道

「你今日心情咁好嘅?」許洛霏直覺覺得今日嘅邱茗然笑容都特別燦爛





「係咩?」邱茗然自己就唔多覺,佢望一望今日嘅天氣,「可能因為今日天氣幾好,我又夠瞓啦~」

「唔係因為今日見到佢?」許洛霏笑問道

「我日日搭車都見到佢,咁應該日日都開心⋯」邱茗然忍唔住反咗個白眼

宜家張萱淇同許洛霏提起殷書賢嘅頻密程度,幾乎係佢以前中意潘景諭嘅時候嘅十倍,可能因為至少佢同潘景諭唔係同級生

「不過,今日要交嗰份地理功課,係唔係上堂先check?」許洛霏提道





「好似係⋯?是旦啦,做咗就得啦~」邱茗然聳肩同時,張萱淇都番到嚟

一番到嚟就見到邱茗然又係同許洛霏一齊,心入面即刻就不滿咁抱怨咗一下

「淇淇你今日咁早嘅?」邱茗然行到張萱淇嘅座位旁

「哦係呀⋯」張萱淇第一下嘅反應仍然係抱住唔高興嘅感覺,但下一秒佢即刻擠出笑容,「今日早咗出門口,所以早咗番嚟⋯本來仲諗住睇下撞唔撞到你⋯」

「以為你未做晒功課,所以咁早添~」邱茗然笑一笑,「你食咗早餐未呀?洗唔洗陪你去買嘢食?」





「都好。」張萱淇笑一笑,佢偷望許洛霏一眼,然後偷偷一笑就企起身準備去小食部

「行啦!」邱茗然講道,佢回頭望一望許洛霏,然後同許洛霏揮揮手

邱茗然行去幫張萱淇買嘢飲,張萱淇就去買嘢食;邱茗然買咗包維他奶,彎腰拎起一轉身,就見到殷書賢突然出現喺佢身後

「嘩⋯!你突然喺度嘅?」邱茗然嚇咗一跳,手放喺心口輕拍咗幾下,「比你嚇死⋯」

「你冇留意啫。」殷書賢微微聳肩,將幾個$2塞入投幣口

「你又會落嚟嘅?」邱茗然自然咁企喺殷書賢旁邊,佢望住殷書賢㩒咗罐罐裝咖啡,「你好眼瞓呀?」

「幫謝澤謙買。」殷書賢聽到「哐噹」一聲後就蹲低將咖啡拎出嚟

「哦⋯」邱茗然回頭望一眼,但喺只有小貓幾隻嘅小食部入面都見唔到謝澤謙嘅身影





「嗯?佢做咩同緊人地傾計⋯?」張萱淇買完嘢食,望向飲品機就見到邱茗然同殷書賢一齊,「真係呀⋯」

「你仲戴住眼鏡嘅?」邱茗然留意到仍然頂喺殷書賢鼻樑上嘅眼鏡

「啱啱溫緊書。」殷書賢托一托眼鏡,將有少許下滑嘅眼鏡托番喺鼻樑上,「比人捉咗落嚟買咖啡。」

「哈哈⋯」邱茗然微微一笑,殷書賢呢個不滿嘅表情好少見,「轉頭都要落嚟早會㗎啦~早啲落嚟都唔緊要啦~」

「邱茗然!」張萱淇連名帶姓一叫,邱茗然即刻回頭望,見到張萱淇面帶笑容望住佢,笑容好似講緊:「重色輕友啦係唔係呀?」

「呃⋯放學你去圖書館㗎可?」邱茗然喺番到張萱淇身邊前問殷書賢

「嗯。」殷書賢微微點頭





「咁放學見啦~」邱茗然比咗個okay手勢後露出陽光嘅笑容,然後行番起張萱淇嘅身旁

殷書賢行到起小食部入口等謝澤謙,謝澤謙去完廁所過嚟,一行到殷書賢面前,殷書賢急不及待咁將咖啡塞到謝澤謙手中

「唔該晒~」謝澤謙企喺小食部門口打開咖啡,即刻大啖咁飲兩啖

「嗯。」殷書賢企喺原地等謝澤謙飲完咖啡

「你做咩戴住眼鏡嘅?又唔係上堂。」謝澤謙飲咗兩啖感覺精神咗,抬眼望到殷書賢嘅眼鏡

「啱啱溫書。」殷書賢解釋同時撇開臉望向外面,今日天氣好好

「啱啱?你係溫緊書咩?」謝澤謙露出疑惑嘅表情,「你啱啱喺課室都冇戴眼鏡。」

「正準備溫書就比你拉咗出嚟。」殷書賢嘅腦袋一轉,即刻掉出一個解答





邱茗然回頭望向殷書賢,一望到佢再加上今日嘅好天氣,邱茗然又諗起嗰日佢喺圖書館小睡醒後嘅事

「棟起嘅file,拉咗落嚟嘅窗簾⋯所以係點解?」邱茗然不禁問道,呢個問題其實佢都問咗自己好多次,不過始終得唔到解答,「係因為我覺得好曬⋯?算啦,都唔重要⋯」

「茗然!」張萱淇見邱茗然發呆,一下子伸手捉咗邱茗然嘅手一下,「諗緊咩呀?」

「冇呀⋯」邱茗然稍微回神後搖搖頭,「可能係我諗多咗⋯」

「咩諗多咗呀?我同你一齊諗下。」張萱淇有啲好奇邱茗然苦惱緊啲咩

「真係人不可以貌相,雖然話殷書賢好似成日都好靜搞到好cool咁,但有時⋯就覺得其實佢都幾⋯」邱茗然講到一半,諗唔到要用咩形容詞形容殷書賢,張萱淇輕皺起眉頭一臉緊張咁望住邱茗然,等緊佢繼續講落去,「體貼⋯?定溫柔⋯?唔知呀,大概係咁。」

「吓⋯?咁突然嘅⋯?」張萱淇比邱茗然呢個突如其來嘅想法嚇親,有啲跟唔上邱茗然嘅思想,「發生咗咩事令你有咁嘅想法⋯?」





「唔⋯就係前兩日我喺圖書館瞓咗,嗰日咁啱好曬,曬到我正一正,但因為我太攰,所以就冇理照瞓⋯」邱茗然回想着當日嘅事,「我醒番之後,見到我個位同佢個位前面嘅窗簾拉咗落嚟,我面前棟咗個LS file喺度,啱啱好擋晒啲光⋯」

「哦~」張萱淇一個食花生食得津津有味嘅表情,「好warm呀~心動呢~」

「係幾warm嘅⋯」邱茗然微微耷低頭,唔想比張萱淇見到佢忍住嘴角唔上揚嘅表情,「跟住放學嗰陣好曬,我就調咗位企佢另一邊,用佢擋太陽,佢冇嬲,反而問我「唔曬啦?」咁樣⋯」

「哦~」張萱淇更加忍唔住笑,表情管理失敗,笑容直接掛喺臉上,「你好衰呀咁樣撩人~不過處女座本來就係默默對人好嘅類型呀。」

「嗯,我都知⋯」邱茗然抬起頭望住張萱淇,但張萱淇一同佢對視就係一個想笑嘅表情,「你笑咩呀⋯!」

「哎呀~自己都忍唔住啦?」張萱淇笑問道,「喺初戀後迎嚟下一個心動嘅人啦~不過類型都差太遠啦掛!?」

「我冇講嘢呀⋯!」邱茗然撇開臉澄清道,比張萱淇咁樣一講之後,臉頰都泛起紅霞,「你自己諗㗎咋⋯!」

「佢唔抗拒其實都冇問題嘅~唔洗擔心啦~」張萱淇湊前細聲地講道,「你估佢對你有冇好感呀嗱⋯!」




IG Link: https://www.instagram.com/nd_cotttoncandy/?hl=zh-tw