【校園】想成為您的治癒: 118. 待着
「你真係對佢有興趣呀？」謝澤謙好奇問道
殷書賢冇即刻比反應，反而係沉默咗兩秒、思考完之後微微聳肩，比出一個模棱兩可嘅答案
「咁神秘㗎⋯」張思群無奈咁講道，「仲以為有咩聽下添⋯」
「冇嘢比你聽。」殷書賢比佢地更無奈
⋯
「呀⋯好攰呀⋯」許洛霏伸咗個懶腰，地理嘅45分鐘補課終於結束，「可以番屋企啦⋯！」
「你做晒功課啦？」邱茗然順口一問，許洛霏愣一下後搖搖頭
「梗係未啦⋯！仲有英文派嗰份past paper都未做。」許洛霏打個喊露，睇起嚟番到屋企可以即刻灘低瞓覺，「仲有LS筆記嘅P.37。」
「係喎⋯要做LS筆記，我仲擺咗佢喺locker添⋯」邱茗然忍唔住反咗個白眼
「你番課室拎囉～落兩層啫～」許洛霏講道，因為佢地嘅補課多數都會喺地理室，今日都係喺地理室補課
「落兩層仲唔夠呀⋯我仲要上番去圖書館⋯」邱茗然只係咁樣諗下都覺得好攰
「聽日早啲番嚟做囉～」許洛霏提議道，兩個女仔手拖手落樓梯
「吓⋯我唔想喎⋯」邱茗然搖搖頭，莫名地開始解釋，「唔想早啲番嚟⋯早啲番嚟就要早啲起身，就要搭早一班車，就會好眼瞓⋯我都係乖乖地番課室拎啦⋯」
「你同緊邊個解釋？」許洛霏笑問道
「自己嘅疲倦⋯」邱茗然嘆一口氣，不經不覺已經行到中六課室所在嘅樓層，「好啦我番去拎嘢啦⋯」
邱茗然同許洛霏揮揮手講拜拜，目送許洛霏落樓梯、消失喺轉角位之後，邱茗然轉個身朝C班嘅課室行去
「咔—」邱茗然打開locker門，望到放喺入面嘅LS厚file
喺指尖掂到file嘅時候，邱茗然眼睛嘅餘光望到地上因為陽光而照出嘅影子，腦海中浮現出上次佢睜開眼嘅時候，望到眼前棟起嘅LS file
「拎完就去圖書館啦⋯！」邱茗然自行打斷呢個想法，將其中一份LS 筆記從file拆出嚟
邱茗然行出課室嘅時候順手咁掀開筆記望一眼，見到要做嘅部分佢已經做晒，即刻忍唔住反自己一個白眼：「哎⋯唔記得咗我上堂做咗⋯」
「算啦唔再又行一轉啦⋯」邱茗然將書包孭到前面，將筆記放入書包
邱茗然朝後梯行去，行到E班嘅課室門口嘅時候，因為入面開住燈而下意識朝入面望一眼
「佢仲喺度嘅⋯？」邱茗然不禁瞪大眼，因為殷書賢仲坐喺位，課室得佢一個人
邱茗然企喺門口安靜咁望咗兩秒，然後猶疑咗一秒之後踏一步行入E班嘅課室範圍
「叩叩—」邱茗然禮貌咁敲敲門，殷書賢抬頭就見到邱茗然行緊過嚟佢嘅座位
「你仲喺度嘅？」邱茗然面帶微笑走近殷書賢，最終坐低喺佢前面嘅座位，「仲以為你已經去咗圖書館添～」
「冇⋯」殷書賢耷低頭望一望書，「放學前溫緊書，唔想溫到一半就打斷去圖書館，所以就冇去。」
「哦～」邱茗然微微點頭示意知道
「你補完課？」殷書賢將書頁掀到下一頁
「係呀～不過漏咗LS筆記所以落嚟拎，不過原來我已經做完⋯」邱茗然無奈咁笑道，但大腦轉一轉之後，邱茗然就有啲疑惑：「你又知我補課嘅？」
「嗯⋯」殷書賢嘅視線稍微從書頁上移開咗一秒，然後點一點頭，「今朝咁啱睇過補課時間表。」
「哦，係呀⋯」邱茗然望住殷書賢嘅書，上面寫嘅對佢嚟講就係一堆合埋一齊就唔識睇嘅英姐，「你食緊糖呀？好香糖味。」
「你比嘅報酬。」殷書賢淡然地講道，然後又抬眼望一望邱茗然，「你唔上去圖書館？」
「唔洗都得，我做晒功課啦～」邱茗然搖搖頭後露出笑容講道
「唔好食咁多糖。」殷書賢忽然間拋出一句冇頭冇尾嘅說話，邱茗然有啲不解，殷書賢稍微抬眼望咗邱茗然一眼後緩緩開口講出後半句：「咁甜真係會蛀牙⋯」
「吓⋯？咩意思⋯？」邱茗然冇問出口，只係喺心入面問自己，雖然唔會得到咩答案，「蛀牙⋯？」
課室內又變回安靜無聲，殷書賢專心溫佢要溫嘅嘢，邱茗然安靜地坐喺佢前面
「雖然坐喺度好悶，但我都冇功課可以做啦⋯」邱茗然嘅雙腿交叉搭住，佢低頭望住自己嘅雙腳前後搖晃
邱茗然四周張望，明明同自己嘅課室一樣，但又好似唔係真係咁一樣⋯就算係已經落堂放學嘅E班課室，仍然會彌漫住一種書卷氣息
「讀得精英班當然係精英⋯」邱茗然喺心裏講道，佢回頭望向殷書賢，見到佢頂喺鼻樑上嘅幼框眼鏡，「唔知點解佢戴呢類⋯文青眼鏡，就會比人一種一睇就覺得呢個人係學霸嘅感覺⋯」
邱茗然唔想打擾殷書賢溫書，佢默默咁觀察眼前溫緊書嘅學霸，愈想移開視線就愈係移唔開
「好斯文、好溫柔嘅感覺⋯」邱茗然嘅嘴角微微上揚，然後撇開臉望向窗外，陽光有啲耀眼
「佢仲坐喺度⋯」殷書賢偶然抬起頭，見到仍然坐喺佢前面、百無聊賴嘅邱茗然，「佢真係唔去圖書館溫書啦⋯？」
殷書賢抬頭嘅時候，望到嘅啱啱好係望住窗外嘅邱茗然嘅側面
「係喎⋯」殷書賢忽然醒起啲咩一樣，手伸入褲袋拎咗張對摺咗嘅memo紙出嚟
殷書賢將memo紙佢放到筆袋入面，唔知點解喺memo紙放入筆袋之後，殷書賢又下意識咁望咗邱茗然一眼
「又會咁啱一食糖就見到佢⋯？」殷書賢喺心裏問咗一句，聞到口中嘅糖嘅淡香，露出淡淡嘅笑容之後又耷低頭溫書
IG Link: https://www.instagram.com/nd_cotttoncandy/?hl=zh-tw