【校園】想成為您的治癒: 138. 求你了

喺考前嘅前一日，殷書賢全日無論去到邊都係拎住本書同佢一齊，完全冇放鬆嘅打算

喺小息嘅時候經過E班，E班都係一片寂靜，只係聽到風扇轉動嘅聲音，除此之外咩聲都冇

「見到佢地班咁靜，搞到我行過嗰陣都唔敢講嘢⋯」張萱淇拉一拉邱茗然，細聲咁對邱茗然講道

「嗯⋯」邱茗然嘅目光肯定咁落喺戴住眼鏡嘅殷書賢身上，喺心裏默默地講咗一句：「希望佢唔好咁大壓力自己⋯」

喺轉堂上地理嘅時候，邱茗然寫咗張memo貼喺殷書賢嘅櫃桶中，然後喺對摺好嘅memo上放一粒糖壓住





喺落堂之後，殷書賢番到嚟嘅時候邱茗然仲執緊嘢，只見邱茗然悄悄地喺冇人發現嘅情況下指一指殷書賢嘅枱

「memo紙⋯？」殷書賢坐低喺位伸手入櫃桶，摸到放喺最入面嘅紙質類同一粒長方體

「考試加油，請你食甜嘢減壓！」memo紙上寫住活潑嘅打氣字句

殷書賢將memo紙摺番好放入筆袋，喺佢嘅筆袋中已經有好幾張摺咗嘅memo紙；佢將糖紙拆開，將糖拎起放入口，糖嘅甜香或者可以暫時舒緩一下因為近在咫尺嘅考試所帶嚟嘅壓力

喺考試前一日嘅放學時間，殷書賢最後可以用嚟溫書嘅時間唔多，呢幾個星期已經令佢好攰，要溫書、要面對屋企人比嘅壓力又要面對對成續下跌嘅擔心





佢同媽媽亦因為琴晚嘅事而一直唔講嘢，殷書賢其實知道佢講嘅嘢可能真係會因為佢講嘅真心話而唔高興，但係佢冇道歉嘅想法，媽媽亦冇再講啲咩

只係由琴晚嘈過之後開始，去到今朝早都好，媽媽一大清早起咗身，但兩人都係各有各，當睇唔到對方一樣，大家都唔想開口講嘢，冇人願意低願做先開口嘅一個

喺琴晚瞓嘅時候殷書賢有諗過，佢嘅父母會唔會因為佢講嘅說話而真係反思一下自己所做嘅事係唔係一直逼迫佢，佢都係有少少期望佢嘅父母會明白佢嘅想法

「算啦，唔諗呢啲嘢⋯專心溫書好過⋯」殷書賢喺心裏放棄思考同琴晚有關嘅事

邱茗然坐喺佢隔離同佢一齊溫書，邱茗然雖然都對考試呢件事有啲緊張，但係佢同殷書賢比起嚟，睇起嚟就輕鬆好多





邱茗然拎住cal機計緊數學題做最後嘅掙扎，殷書賢一臉苦惱咁托住額，佢拎住筆一邊做練習題一邊做最後嘅複習，將佢嘅心思都放喺乙部嘅題目上

「唉⋯」殷書賢望一望時間，見到時間已經去到差唔多5點，「休息一陣先⋯」

殷書賢手上嘅筆同cal機啱啱先放到枱上感覺到手機嘅震動，見到係媽媽直接打電話過嚟

「唔想聽⋯」殷書賢望住手機螢幕有啲猶疑，殷書賢又有少少期待係唔係媽媽有啲咩都同佢講，於是都係㩒咗接聽，將電話放到耳邊，「喂？嗯⋯喺學校⋯溫緊書⋯嗯⋯」

邱茗然不以為然咁望向殷書賢，眼見殷書賢只係一直將電話放喺耳邊但又冇講嘢，喺佢收回視線繼續做數嘅時候，又聽到殷書賢唔耐煩咁細聲嘆氣嘅聲音

「嗯。」殷書賢聽住媽媽喺電話裏講嘅說話，面露不悅咁嗯一聲回答，「嗯，拜拜。」

邱茗然聽到殷書賢用冷淡嘅聲線回答，回答完最後一句之後，邱茗然聽到殷書賢嘆氣嘅聲音；殷書賢將手機收入褲袋，想當冇聽到媽媽啱啱喺電話裏同佢講嘅嘢

「嘖⋯！煩死⋯」殷書賢細聲咁講咗一句，淨係聽語氣都知殷書賢嘅心情超唔好





「好似唔係好應該再開口同佢講啲咩⋯」邱茗然有啲猶疑，雖然見到殷書賢呢個反應都知道，但殷書賢宜家煩躁到極致，佢都覺得宜家開口唔太啱時候

「唉⋯啪嗒！啪嗒！啪嗒！」左邊忽然傳嚟好密集一連串嘅聲音

邱茗然抬頭望過去，見到殷書賢黑住面、好快咁將枱上嘅嘢全部執走，將所有嘢塞晒入書包，一手抽起書包就走

「哈⋯？去邊呀佢⋯？」邱茗然瞪大眼，一頭霧水咁望住殷書賢快步匆忙離開嘅背影，「咩事呀⋯？」

殷書賢一下子推開圖書館嘅門，直接匆步行上天台，窒息嘅感覺湧到上嚟卡喺喉嚨，佢忍受唔住呢種感覺

「係唔係發生咗咩事⋯？」邱茗然望住眼前嘅練習題放空，大腦浮現嘅都係啱啱殷書賢嘅行為同表情，「佢好似好凝重⋯」

邱茗然眨一下眼回過眼，拎出手機望一望時間：「5點⋯佢咁早番屋企⋯？」





「佢啱啱走嘅時候⋯」邱茗然回想一下啱啱殷書賢嘅表情，又回想起最近殷書賢講過嘅嘢：「佢話過佢覺得好辛苦⋯佢，唔會諗唔開呀嘛⋯？」

一種唔好嘅感覺從心底冒出，佢好快咁執晒枱上嘅嘢，然後拎起書包就打算去追殷書賢

「唔⋯」邱茗然行到樓梯口，望住上同落嘅樓梯思考起嚟，「佢會番去，定係上天台⋯？」

⋯

殷書賢拎起鎅刀，喺手上好快就鎅咗幾多，冇絲毫嘅猶疑，亦冇絲毫痛楚一樣

窒息嘅感覺先令佢最痛，要好努力咁讀書好辛苦，有太多嘢勒住佢一樣，令佢每行一步，難以呼吸嘅感覺又明顯啲

「哈⋯哈⋯哈⋯」殷書賢用力咁吸氣，想快啲令自己嘅呼吸調整番嚟，「唔得都係⋯」

正當殷書賢要再落刀嘅時候，天台嘅門「呯」一聲一開





「你果然喺度⋯！」邱茗然匆忙咁行出嚟，一眼就望到殷書賢，「殷書賢！」

邱茗然見到殷書賢拎起鎅刀毫不猶疑咁喺手上鎅，邱茗然直接朝殷書賢跑去，將書包同攬喺懷中嘅書都掉到長櫈上

「你突然間做咩呀？」邱茗然跑到殷書賢面前，不解咁問殷書賢，佢啱啱跑到上嚟都有啲上氣唔接下氣

「你唔好理我啦！」殷書賢已經唔顧得咁多，窒息嘅感覺愈逼愈近，佢提手就要喺前臂上留多兩條痕

「好啦！唔好再鎅啦！」邱茗然企喺殷書賢面前，一手將鎅刀從殷書賢嘅手中搶走，「真係會死！」

比壓力壓垮嘅殷書賢崩潰咁坐低喺長櫈上，無力垂低嘅左手一直滲血，大腦似乎都冇辦法運作起嚟

邱茗然緩緩喺殷書賢嘅面前蹲落嚟，雙手搭喺雙膝上，手上拎住刀片被推出嚟嘅鎅刀，擔心咁望住殷書賢，佢唔知要點樣令殷書賢感覺好啲，但一定唔係將鎅刀還番比佢








IG Link: https://www.instagram.com/nd_cotttoncandy/?hl=zh-tw