【校園】想成為您的治癒: 140. 「我會在的」
「唔係我想要做讀書機器，只係⋯」殷書賢垂低頭， 望住傷痕累累嘅左手淡然一笑，佢自己都覺得自己嘅左手有啲慘不忍睹，「我好多時都會覺得，冇咗成績，我真係咩都唔係⋯所以先要更加更加努力⋯！」
「唔係㗎！你唔會咩都唔係！所有人都有佢嘅意義，冇人會係冇意義。」邱茗然柔聲講道，然後猶疑咗一陣後再次緩緩開口，「我話過，我唔怕你會放負，所以係唔開心嘅就講啦！我⋯都會喺度。」
殷書賢抬起頭同邱茗然四目相對，邱茗然嘅說話就好似狠狠打中佢心入面嘅柔軟之地一樣，可能因為邱茗然講嘅嘢係佢一直以嚟想聽到嘅嘢
「如果你喊嘅話，我發誓我唔會同人講⋯！」邱茗然笑笑口咁細聲講道
「唔會喊⋯」殷書賢比邱茗然突然嘅一句逗笑
「我覺得，如果你堅持要行自己想行嘅路，你爸爸媽媽都會支持你，好好解釋就係。」邱茗然認真咁講道，「你想讀咩科，同佢地講清楚，醫科又好，其他科都好，冇人話狀元一定要讀咩科先啱，只係世俗觀念嚟。」
「其實⋯我都係想讀Chem⋯」殷書賢嘅心好似平靜咗落嚟，佢伸手將紙巾從邱茗然嘅手上拎走，手上嘅血都已經乾晒，紙巾上面紅紅白白的，「讀Chem都好呀⋯但我媽唔比⋯」
「同佢地講囉～我諗佢地都會明白你。」邱茗然點點頭表示支持，「佢再話你嘅話，你就同佢講，係我用我嘅實力換番嚟嘅機會！憑咩唔比我揀我想行嘅路！」
「我媽實又嬲死⋯」殷書賢望住邱茗然繪聲繪色咁講嘅時候，佢都忍唔住露出笑容
「食唔食糖？」邱茗然伸手入裙袋摸索，然後拎咗一粒紫色獨立包裝嘅糖出嚟：「鏘鏘～今日係提子味嘅萬樂珠～嗱，食完唔好唔開心。」
「你當我3歲小朋友？」殷書賢接過邱茗然手上嘅糖，佢拎住粒糖微微低頭，沉默思考咗一陣之後緩緩開口：「但，多謝你⋯喺好多方面嚟講⋯」
「想多謝我嘅話，你快啲同我打起精神！」邱茗然對殷書賢講道，聽到殷書賢對佢嘅感謝，邱茗然嘅內心係高興嘅，「聽日考試啦，我地嘅學霸大人唔可以狀態唔好咁嚟考試！」
「好，知道啦。」殷書賢望住邱茗然嘅認真，笑一笑點頭
「你會考得好㗎。」邱茗然認真咁講道，「真係會！」
「嗯，我會。」殷書賢呢句係肯定句，佢本來有啲擔心，但喺邱茗然以堅定嘅語氣同佢肯完之後，殷書賢就有種佢嘅擔心係多餘嘅感覺
「就嚟夠鐘啦，行未呀？」邱茗然先一步起身拎起書包，佢望住殷書賢，佢唔知道自己開解咗佢幾多，但只可以好肯定咁講，只要殷書賢要呻，佢一定會聽
⋯
聽日已經係中六嘅年終大考，邱茗然坐喺書枱前盡最後嘅努力溫好聽日作為打頭陣嘅數學
「數學真係好難呀⋯！」邱茗然做數做到眼都就嚟合埋，聽住cal機嘅制嘅聲就好似催眠曲一樣令人想瞓覺，「唔得唔得！唔難唔難！我要加油呀！今晚要早啲瞓，聽日一切都順順利利！」
邱旻顥灘喺上格床，佢微微坐起身望一眼邱茗然，望住佢嘅努力，佢都回想起當初考DSE嘅自己，所以就算媽媽再點講都好，佢都可以肯定邱茗然好比心機
「考試加油呀⋯」邱旻顥喺心裏講咗聲加油，為仍然努力溫習緊唔擅長嘅科目嘅妹妹打氣
另一邊廂，殷書賢嘅屋企
殷書賢坐喺書枱前拎住cal機計數，聽日打頭陣嘅科係佢拿手嘅數學科，所以佢要萬無一失
「呼⋯」殷書賢鼓起兩泡腮呼一口氣，佢抬起頭撥一撥頭髮
一抬頭，背一靠到櫈背上，殷書賢就見到佢放喺玻璃櫃中嘅一張聖誕卡
「希望你可以日日開心，同我一樣笑多啲～」殷書賢記得喺卡中所寫嘅一句
「唉⋯聽日考試，點笑得出⋯？」殷書賢輕輕一笑喃喃自語問道
殷書賢望住枱上嘅書就覺得有啲頭痛，佢好擔心同時亦想有自信心，今個學期令佢覺得好崩潰、好痛苦
每一個與書為伴嘅日子令佢覺得煩躁，家人嘅炫耀同期望更加令佢壓到難以呼吸，手上嘅傷亦愈嚟愈多⋯
一切嘅事就好似朝住一個唔好嘅方向發展一樣，佢唔想變成咁，但又好似冇辦法阻止
「今個學期，我會考到第一㗎可⋯？」殷書賢嘅手按住太陽穴，痛感由頭內而出一樣，佢都有啲猶疑，「我可以保持一貫水準⋯？」
「你會考得好㗎。」
「真係會！」
邱茗然肯定嘅說話忽然間喺佢腦海中閃過，當所有人都係要求佢考到第一嘅時候、連佢自己都自我懷疑嘅時候
邱茗然比咗一個好肯定嘅答案去支持佢、鼓勵佢、比信心佢⋯邱茗然冇開口講明，但殷書賢都察覺到，邱茗然明顯地係有留意到佢嘅心情同壓力，一直都話比佢知佢可以做到
「佢真係永遠都會喺適當嘅時候講最啱聽最適當嘅說話⋯」殷書賢笑一笑，臉上掛上好淡嘅笑容，「我真係要加油⋯」
喺所有人都努力嘅時候，殷書賢更加唔可以鬆懈，一定要比其他人更努力去達到佢想要嘅目標
休息咗一陣，殷書賢又拎起筆同cal機繼續溫數學；殷書賢全晚都計緊數，連休息都唔敢休息太耐
「希望成個考試都係咁安靜⋯」殷書賢喺心裏講道，因為今晚係冇人入嚟打擾佢嘅一個晚上，佢可以專心溫書
⋯
「早晨！」邱茗然精神奕奕咁上車行到殷書賢嘅面前，臉上掛住滿滿嘅自信一樣微微仰起頭笑道
「早晨。」殷書賢今日冇戴耳機，手上亦冇拎住任何嘢
「咦～今日咁少見嘅？咩都冇拎住喺手，亦唔係溫緊書，好有自信啦？」邱茗然當然好快就留意到殷書賢同平時唔一樣
「喺個腦度。」殷書賢輕碰一下自己嘅額角，臉上一副柔韌有餘嘅自信表情，「而且琴晚好早瞓，今日嘅精神好好。」
「睇嚟我地嘅學霸，自信又番晒嚟啦～」邱茗然笑道，但下一秒笑容就塌咗落嚟，「好緊張呀⋯今日考數學⋯」
「唔洗緊張，照平時咁就可以。」殷書賢拎咗粒薄荷糖放入口
「平時咁樣嘅話，係咪即係我唔識可以行過嚟問你？」邱茗然開玩笑咁講道
「我唔會理你。」殷書賢搖搖頭，將薄荷糖遞比邱茗然，「食粒薄荷糖，等個腦清醒下啦。」
「我希望陣間打開卷之後，都係我識做嘅題⋯」邱茗然雙手合十祈求
「識晒part a都夠合格。」殷書賢淡然咁講道，「part b睇運氣算啦。」
「你居然會話睇運氣算？」邱茗然對於殷書賢呢個講法係有啲愕然，然後豎起手指公：「咁你一定超好運⋯」
「出嚟出去都係嗰啲題目，冇咩好大嘅變化。」 殷書賢聳肩，佢先唔係超好運，係天生對數學嘅理解力比較好，「有變化就執生。」
「多謝你嘅tips，同冇講冇分別⋯」邱茗然輕嘆一口氣
「唔洗擔心，同平時一樣咁做就得。」殷書賢講道，「信我啦。」
邱茗然望住自信心滿滿嘅殷書賢對佢講出「信我」嘅說話，邱茗然點點頭，佢好似都有少少信心可以發揮平時嘅水平
IG Link: https://www.instagram.com/nd_cotttoncandy/?hl=zh-tw