【校園】想成為您的治癒: 149. 請給我勇氣

六月嘅畢業禮

「今晚見啦哥哥～」邱茗然著起夏季校服出門口準備番去參加畢業禮

邱茗然耷低頭整理一下校裙，今日係佢最後一次著夏季校服，過咗今晚，畢業證書就會到佢手上，佢就正式畢業

「淇淇！」邱茗然一落車就見到張萱淇嘅身影，即刻朝住佢嘅方向跑過去

「嗨～」張萱淇笑一笑，然後望一望邱茗然身後，「咦？今日唔見佢同你一齊番嚟嘅？」





「又唔係平時番學，而且又冇特登約，點會真係一齊番？」邱茗然無奈咁講，但佢都係擰轉頭望咗一眼，今日番嚟之前，佢都有諗過會唔會咁啱撞到殷書賢

「行啦行啦！快啲番去聽rundown～」張萱淇拉住邱茗然小跑起嚟

⋯

聽完rundown之後，大家先喺課室集合換畢業袍

「好好睇呀畢業袍～」張萱淇耷低頭望下自己身上嘅畢業袍





「淇淇你個衫領反晒啦！」邱茗然笑住行到張萱淇身後，伸手幫佢整番好個衫領

「唔該～」張萱淇笑道，「我地影相呀～」

邱茗然同張萱淇兩個好似糖黐豆一樣，去到邊都一齊，周圍搵同學影相

「茗然～」許洛霏小跑跑到邱茗然面前，「影相！」

「好呀～」邱茗然接過許洛霏嘅手機





「我幫你地影呀～」張萱淇朝邱茗然伸手示意將手機比佢

「唔該～」許洛霏拉住邱茗然，企得好埋好親近，「我同埋淇淇影～」

邱茗然同張萱淇換咗個位，今次輪到邱茗然幫佢揸機影相

今日係畢業典禮，大家都著住畢業袍，周圍走周圍跑，搵朋友記錄低呢一個重要嘅里程碑

「落樓下啦～佢地都喺樓下～」張萱淇企喺課室外嘅走廊望落去下面操場

「哦好呀～」邱茗然比咗個Okay，跟住張萱淇一齊落去地面嘅操場，「行前梯定後梯？」

「後梯啦～」張萱淇推住邱茗然往後梯嘅方向行去

喺經過隔離E班嘅課室嘅時候，邱茗然下意識望多兩眼





「唔通佢未番⋯？」邱茗然喺心裏問道

張萱淇同邱茗然落到操場，基本上係一見到熟嘅、同班嘅就會捉住對方影相

「茗然！」張萱淇嘅目光停喺小禮堂嘅方向，伸手捉住邱茗然嘅手將佢拉咗一下，「佢喺嗰度。」

邱茗然望過去小禮堂嘅方向，原來殷書賢番咗嚟，同謝澤謙佢地幾個一齊

「茗然你唔去搵佢呀？」張萱淇輕輕推咗邱茗然一下，「仲可以順便同佢講清楚⋯」

「我冇呢個打算⋯」邱茗然搖搖頭

「咁你都要搵佢影相㗎～」張萱淇笑道，又推一推邱茗然，感覺就好似鼓勵緊佢去做一啲事一樣





「淇淇。」邱茗然望向小禮堂嘅方向，然後拉一拉張萱淇嘅手，「陪我。」

邱茗然拉住張萱淇去搵殷書賢，見到殷書賢嘅身影之後，邱茗然鬆開張萱淇嘅手，小跑上前拍佢

「喂！」邱茗然企喺殷書賢嘅身後探頭望佢

「咦～」謝澤謙佢地即刻識趣咁行開兩步，殷書賢望住佢地嘅舉動好無奈

「做咩？搵我？」殷書然擰轉頭一見到邱茗然，嘴角就忍唔住自動地微微上揚起嚟，「啱啱先見到你喺嗰邊。」

「你唔過嚟叫我？」邱茗然習慣性咁扁嘴問道

「你影緊相。」殷書賢解釋道，「你嚟搵我影相？」

謝澤謙聽住兩人嘅對話都忍唔住偷笑，呢個係咩明知故問嘅對話？





「嗯！」邱茗然點點頭，然後將手機遞比張萱淇

「你地企埋少少。」張萱淇都好識做咁叫兩人企近啲，影張好睇嘅相比邱茗然，「1、2、3⋯ 1、2、3⋯ 1、2、3⋯」

「淇淇你影咗幾多張呀到底⋯？」邱茗然走向張萱淇拎番手機，望住圖庫中10幾張同一個人嘅相，邱茗然就覺得無語，「你影咁多張做咩呀⋯」

「影得唔好睇咩？」張萱淇同邱茗然一齊睇相，「影多幾張比你揀嘛～」

「咁多謝你囉～」邱茗然笑道，佢逐張相睇，長㩒張相仲可以睇到原況影出嚟嘅小動態

邱茗然拎住手機行到殷書賢嘅身旁將手機遞比佢睇，殷書賢微微點頭

「我之後send番相比你呀～」邱茗然抬頭望向殷書賢，對殷書賢笑一笑





邱茗然就咁簡單咁完成咗影相呢件事，佢走向張萱淇打算同張萱淇再去搵其他人影相

「行啦淇淇～」邱茗然喺張萱淇嘅身邊行過，佢直接向前行

殷書賢見邱茗然都繼續去影相，佢就行番去謝澤謙佢地嗰邊同佢地一齊

佢地一早比人捉住影咗好耐相，班上嘅人都影齊，宜家嘅佢地，似係等人嚟搵佢地影相多過佢地去搵人

「喂！你唔係有嘢同佢講，有嘢要比佢咩？」張萱淇一手拉住邱茗然嘅畢業袍衫袖將佢拉番嚟，湊近邱茗然低聲問道，「快啲去！」

張萱淇輕輕咁推咗邱茗然一下，邱茗然向前行咗兩小步，回頭望一望張萱淇，眼神都講緊：「你做咩突然間推我去⋯？我未準備好⋯！」

「去！加油！」張萱淇先用堅定嘅眼神對邱茗然講道，然後又微微抬起頭瞪大眼：「陣間後悔冇講出嚟呀！咁大個機會喺你面前！」

邱茗然深呼吸一下，比少少嘅勇氣自己，然後又一次上前拉一拉殷書賢嘅衫角：「殷書賢⋯！」


聽日結局！記得嚟睇！！！


IG Link: https://www.instagram.com/nd_cotttoncandy/?hl=zh-tw