有一晚，我打飛機打到條jer斷左: （42）

「有一個秘密，我一直都收埋左無同你地講。」

老豆用嚴肅認真嘅語氣對我地講：「其實，我係一個外星人。」

呢句說話講完嘅同時，老豆嗰一副無頭嘅身體，突然「咚」一聲單膝跪落地下。

原因係佢嘅右腳成隻斷開左，令身體無法支撐再企喺度。

我同阿媽都呆左，已經唔知點反應。



老豆繼續講落去：「我其實嚟自一個叫『斯比列特』嘅星球，喺大約五十年前，我跟住屋企人移民左嚟地球。」

「雖然係嚟自另一個星球，但係我地斯比列特人，無論喺外形上、身體結構上，甚至語言上都同地球人極度相似，唯獨有一樣嘢唔同…」

「就係身體各個部分可以隨意分離？」我心急搶住發問。

「如果一樣嘢本身係黐埋一齊，然後分開左，咁樣先叫『分離』，但我地唔係。」老豆回答。

「即係咩意思？我聽唔明。」



「或者咁講，地球人天生啲手手腳腳就係連埋一齊，相反我地斯比列特人，一出世就係手、腳、頭、身各自分離，如果係男性嘅話，就連碌jer都係分離。」

「天生就係分離？」我滿腦問號，仲係理解唔到。

「你試下理解成斯比列特人係一盒超人模型，模型入面啲手手腳腳、頭同身，天生就係砌唔埋一齊，而我地就係以咁嘅狀態生存。」我老豆再解釋。

我開始get到老豆嘅意思：「問題係，啲手手腳腳斷開曬，咁樣點生存到？」

「呢個問題我都答你唔到，因為我出世嗰陣，已經有左靈結石，所以我自己都無經過喺最原本嘅狀態下生存。」



「靈結石又係咩？」我立即追問。

「喺一百年前，有粒細隕石撞落我地星球，呢個隕石除左會發光之外，仲會散發一種奇特嘅能量，能夠令我地斯比列特人分離嘅肢體，完美咁接合埋一齊。」

「換句說話講，你一出世嗰陣雖然係斬件上，但受呢舊石嘅能量影響，你啲手腳可以駁得埋一齊。」

我一邊講，個腦入面就一邊想象幫一個BB砌返啲手腳，成個畫面有啲詭異。

「無錯，靈結石嘅能量理應係可以貫穿整個銀河系，我嚟左地球咁多年，啲手腳從未無斷開過。照目前咁嘅情況推斷，我諗好有可能靈結石出現左啲問題，又或者係受到破壞。」