728鏡現場: 2

當佢哋合唱完，彈到尾段嘅時候，仲聽到有fans大嗌：「結婚啦！！！」

彈完琴之後，佢哋緩緩企起身，除咗件衫佢。

AL仲問EDAN：「唔係跳舞吖嘛？」

EDAN答佢：「唔係唔跳吖嘛？」

然後《Elevator》響起，大家又high爆紅館。





就唱咗無幾耐，連副歌都未到，上面塊mon無端甩咗落嚟，就係咁而砸中dancer。

其實砸落嚟嗰個位，就喺前幾秒之前AL同EDAN先喺嗰個位度跳緊。就係咁啱佢哋分開行開咗兩邊之後塊mon就向下砸。

塊mon跌落嚟當然有聲。雖然唔係好響，但係嗰下「啪嗱嗱嗱」嘅恐怖聲音仲要持續咗幾下。

我目睹一塊咁樣嘅mon無啦啦跌落嚟當然呆哂唔識反應，然後就係唔信，再嚟就係諗：應該冇事嘅，可以起翻身繼續跳......

請大家唔好笑我，我作為一名現場親眼見住塊嘢斷繩跌落，真係有咁樣嘅反應。





喺一剎那間之後，舞台上最快知道嘅係周邊啲dancer，佢哋已經用最快嘅速度反應過嚟，跟住就去扶返起被壓住嘅數名dancer。

而AL同EDAN因為大家都帶住全降燥earmon，仲要佢哋背對住意外嘅位置。

所以唔知情繼續唱係一件正常不過，而且冇做錯嘅舉動！

當AL唱完最後一句「Come On, oh...」之後，佢終於見到發生咩事。然後就被工作人員帶走咗。

嗰陣時仲要熄咗燈，令到工作人員到觀眾都根本唔知實際情況係點。





大概一分鐘之後，就有類似司儀嘅聲叫大家離開。但係根本冇人走，而且大嗌「開燈！」

兩分鐘之後，開返燈，見到有職員出嚟組咗兩個圈。

跟住花姐出嚟講嘢，叫大家真係要走。

有人用粗口開大聲咁鬧佢，佢都只係震住聲咁要大家離場，最後由工作人員扶返走。